(1)
الصداقة من أقوى العلاقات الإنسانية ,علاقة يميزها أنها تجمع عدة مشاعر وأحاسيس في إطارها مثل المحبة ,التضحية وغيرها ,
يمكن اغلبنا واقدر أقول يمكن كلنا حصلت له مواقف مع أصدقاءه منها الحلو ومنها المر منها اللي تقوي العلاقة ونها اللي تنهيها .
قصتي تتكلم عن ها الموضوع , تقدرو تقولون انها تحمل مشاعر اكثر منها احداث لكني قررت بعد تفكير طويل اني اعرضها للناس عشان يستفيدو منها , احنا كمجتمع للرجال حدود الصداقة غالبا معروفه عندنا واغلبها تكون للوناسة والمصلحه انا ما اقول الكل بس اكثرها لكن اللي صار معي شي ثاني وهاذي قصتي ...
في عام 1408هـ , كنا تونا منتقلين لمدينه الرياض والدراسة بدت من اسبوعين تقريبا كنت في سنه رابعه ابتدائي دخلت فصلي الجديد وسوا الاستاذ تعارف بسيط بيني وبين الطلاب ,لما جا وقت الراحه طلع الجميع الا انا ,دخل ولد اسمراني شعرة حوسه واسنانه الاربع الامامية اللي متكسر واللي طايح , مشمر اكمامه ووجهة كله محوش وحالته لله الا انه رغم كل هالبلاوي فية شي يخلية مو باينه ..
قعد يحوس في شنطته ساعه وكل دقيقة يطلع خرابيط وكل شوي يرفع عينه عندي واخيرا طلع نبيطة,وقبل لا يطلع التفت علي وكان من النوع الي كنه بينطحك وهو يطالع منزل راسة شوي ومعبس طول الوقت بس كانت بريئة اكثر من انها تكون مرعبة
وقال بلدغه طفولية سببها واضح وهو اسنانه اللي حالتها صعبه :انت الحين ليش جالس لحالك؟..
كانت هاذي اول جمله سمعتها من الانسان اللي صار بعد كذا اغلى البشر على قلبي ,كان معروف عني اني انطوائي ومنعزل هاذي طبيعتي حتى اني اتوتر لما يكلمني احد ما اعرفه رديت عليه: بس كذا انا ما ابي اطلع وبعدين انا ما اعرف احد هنا .. وبنفس النظرات اللي والله اعلم انها كانت عاده عنده .. تعال معي وانا اعرفك على نص اللي فالمدرسة ..كان يجرني من يدي وانا اسحبها بخوف ..لا لا انا كذا مرتاح قلت لك ما ابي اطلع..
لكن الولد اصر لين طلعني معه بالغصب , وزي ما قال عرفني على نص المدرسهتقريبا لكن تبون الصدق حسيت اني تعلقت فيه هو .. يمكن عشان شخصيته عكسي تماما اجتماعي , خفيف دم, والكل يحبه ويحاول يتقرب منه صحيح انه كان شيطاني ومشاغب لكنه ما كان يتعدى على احد !!
حسيت اني مبهور بشخصيته ورغم انه ذكي جدا الا انه فالدراسة ما كان بالحيل بس كان يعرف يمشي عمره من يومه صغير .
وعلى كثر الاولاد اللي يعرفهم الا انه بعد تعلق فيني فوق ما تتصورون صرنا ما نتفارق ابدا ولايشوفون واحد فينا بدون الثاني اذا كانت السفره مع الاهل , اغلب الناس اللي يعرفونا يحاولو ياخذونا قدوه وكثير منهم يضربون المثل في صداقتنا , يمكن تتساءلون وش سر هالصداقه العميقه؟!! شي واحد كنا نطبقه بدون ما نحس من يوم حنا صغار , شي عجزت اغلب الناس انها تفهمه في تعاملها مع بعض , وهو ان كل واحد فينا كان متقبل الثاني بكل ما فية من العيوب ولا عمر واحد فينا حاول يغير الثاني ويمشية على طريقته برغم الاختلاف الكبير بينا .. خالد كان فيلسوف بالفطره وبسبب علاقاته الكثيره , وكنت اتعلم منه كثير , لما اساله كيف يقدر يجمع كل هالناس حوله كان يقولكلمات بسيطه لكن تركت فيني اثر كبير كان يقول : اسمع يا بندر الناس لها مشاكلها وكل واحد فهالدنيا صدقني منشغل في نفسه ولا احدتهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ما تقدر .
قصتي الاساسيه اللي ابيها توصلكم مو كيفيه صداقتنا لاني مهما شرحت ما رح اقدر اوصلكم مدى عمقها لكن الحدث اللي قلب حياتي ولا اظن ترجع زي ما كانت . يوم اربعاء جاني خالد للاستراحه اللي نتجمع فيها مع الشباب والفرحه مبينهفي عيونه وسحبني من بينهم ...تعال بندر ابيك في كلمه راس .. لما صرنا برى ..عندي لك مفاجاة .. وابتسم , انا ذاك الوقت اللي يشوف وجهي يقول خبل اناظرفيه وفاتح فمي .. كمل كلامه .. ابشرك الوالدة خطبت لي!!!! في ها اللحظة حسيت كان احد عطاني كف على وجهي ...
اييييييييييييش؟؟؟؟؟؟؟؟؟؟؟؟!!!!!!!!!!!!!!!!!
طالعني بنفس طريقته يومه صغير واللي ما تغيرت ابدا .. وراك تقولها كذا كنك مو مبسوط .. وبارتباك رديت.. لا مبسوط بس أنت فاجأتني وصدمتني صراحه !ما عمرك جبت طاري للزواج !!!!
ضحك وهو يغمز .. عارف بس الوالدة اقترحت على الموضوع وقلت لها مافي مانع , توقعت ان السالفه كلام او عالاقل بتاخذ وقت بس ما شاء الله عليها يومين الا هي جايتني تقول ترى لقينالك الظاهر انها حاطتها في بالها من زمان , وبعدين ما عاد الا خير والا شرايك؟؟؟!!....يعني للحين ما شفت البنت يا خلود ..افا عليك بس يا بندر !!!
الحين اقولك توي دريت وجيتك بسرعه , الوالده تقول انهم حددوا يوم الاثنين عشان اجيهم اشوفها .. تفاجات .. الله بها السرعه ؟؟!! ..مو اقولك شكل السالفه مطبوخه من قبل ..علي كلا الله يوفقك انشاء الله .. عقبالك _يالرمت_(خالد لما كان صغير كان يحاول يناديني بكلمه الروميت الانجليزيه لكنه كان يقولها بها الطريقة ومشت معنا كذا صارت زي اللقب بيني وبينه )اغتصبت ابتسامه .. لا وين تو الناس على المهم الحين خلنا نرجع للشباب لا يبدى التعليق .. وبتعجب ممزوج بغضب مصطنع رد خالد ..لحظة لحظة بندوره الحين اقولك خطبت وزحمه ولا تعزمني على شي بها المناسبة؟؟!! .على الأقل ودني لكوفي شوب ياخي !!! ضحكت.. لا يا عمي الحين قهوة وبعد شوي الا احنا في واحد من هالمطاعم حقتك اللي فواتيرها تكسر الظهر تراي أعرفك زين خلاص عشرة عمر .. رد.. والله انك قطيعي مستخسرفيني ؟؟ .. وقعدنا نضحك حطيت يدي على كتفة .. ولا يهمك يا خالد اذا صار شي أكيد ابشر بذيك العشوة اللي يحبها قلبك فالمطعم اللي تختاره وش تبي بعد؟؟.. كان ودي أعزمه بس النفسية عدم ..رد بغمزه ما تقصر أصيل يا بندر بس أهم شي لا تفشلنا مثل ذاك اليوم !! أفشلك ؟ .. !!! متى يا ويلك من الله ؟؟. ! عطاني نظره اللي مو مصدق .. معقولة نسيت ذاك اليوم يوم يمدح لنا خوينا سامي ذاك المطعم قلنا لازم نجربه ونشوف .. لما تذكرت الموقف بديت اضحك .. اوووووووههه الله يقطع شرك وش ذكرك بها الموقف الحين .. ابتسم خالد ويده على وجهه .. تذكر؟؟ يومها طلبنا عصير وطقيت الصدر يعني أنت اللي بتدفع ويوم جا الحساب جت معه المصيبة والله لو انك شايف وجهك يا بندر يوم شفت الفاتوره تقول صابين عليك مويه باردة انحرجت ..لا والله !!! على الأقل أحسن من اللي قعد يتفلسف ويسوي روحه أبو العريف , لا وتأشر بيدك بعد كننا في ملعب و بديت أقلد صوته ونظرته المعروفه لو سمحت الفتوره مو لنا حنا طلبنا عصير بس !!! والله لوك شايف وجهك أنت يوم رد عليك .. نعم يا سيد هاذي فاتورة العصير بس الحين من اللي طلع فشل الثاني؟!. ابتسمت .. اذكر ما بقى في جيوبنا شي ما طالعناه ويا لله كفى ولقطنا وجيهنا وطلعنا وحنا نتصدد لا احد يشوفنا ... وطوال ما كنت أعيد القصة وخالد ميت من الضحك كان يسعدنا أن حنا نعيد الذكريات اللي مثل هاذي المهم رجعنا عند الشباب .
من بدا موضوع الخطبة حسيت انه خلاص ما راح يرجع شي زي أول, تضايقت مره بس ما ادري وش اللي فكرت فيه يعني مستحيل نقعد كذا بدون زواج للأبد كان واقع لازم أرضى فيه .
لما رجعنا داخل كان مستأنس , يضحك ويلعب , وينكت صحيح هاذي عادته لكن اليوم كان بزيادة أما أنا كنت عكسه تماما حسيت أني بفقد ها الإنسان .... الشخص الوحيد اللي اعتبرته صديقي .
(2)
يوم الاثنين العصر جاني للبيت !! خفت يكون صاير شيء خير خالد عسى ما شر .. وبتوتر واضح في صوته .. ابد والله احس اني متوتر شوي .. ابتسمت له .. يابن الحلال شده وتزول زي غيرها .. ابتسم وقال .. وشرايك تجي معي ..!! قعدت اطالعه ابي اتاكد انه جاد انت صاحي!!! وين اجي معك ؟؟. طيب تعال وخلك في السياره بس .. شديت على يده وحطيت عيني في عينه وقلت : يا بن الحلال رح لحالك وانا بستناك في بيتنا طيب !!كان يطقطق اصابعه .. ادع لي يالرمت .. ما يحتاج قول الله يوفقك ويسنع دربك انشاء الله يالله عاد الحين رح وحلق وتكشخ تلقاك شهر ما دخلت الحلاق على هالوجه .. كنت احاول اضحكة لانه واضح انه متوتر .. طيب اجي عندك عشان تشوف شكلي قبل اروح لهم .. كتمت ضحكتي .. انا لله وانا اليه راجعون ؟ !!. انت وبعدين معك يا عمي اصلا البنت اول ما تشوف عيونك بتوافق لا تشيل هم وتوكل على ربك .. الله يستر ما ادري وش فيني خايف ياعمي ؟!....(كلمه ياعمي معروف اني دايم اقولها فاذا قالها خلود لي يعني خلك معي او افزع لي زي ما تقولون كانت كلمات بينا)... عادي كل العالم يتوترون في هالموقف بس انت شد حيلك ولا تتاخر على الجماعه .. طلع من عندي , وبعد العشاء كنت انا اللي ما ادري وش اسوي بعمري من التوتر وكل شوي ادق عليه لدرجه ان ريم اختي حاولت تهديني ...ما صارت يا بندر يمكن انت متوتر اكثر منه .. يا ريم هذا خالد تعرفين يعني وشو خالد هذا اقرب لي من نفسي ..والله عارفه بتعلمني فيكم بس اذكرالله وهد الوضع شوي .. ما بقى عندي صبر وطلعت للشارع استناه ,بعد حوالي الساعه شفت سيارته مقبله بسرعهجنونيه كالعاده لدرجه انه بغى يدخلني تحتها لولا اني بعدت بسرعه , نزل وشوي ويناقز من الفرحه ..وبرعب صرخت فيه ..خلووووود !!!!!!!!!! انت خبل بغيت اروح تحت سيارتك .. ناظرني نظرات جديده علي وابتسم..سالته .. ها بشر؟؟ .. لمني الرجال وعرفت انها دخلت مزاجه لدرجه انه ما عاد يدري وينه فيه ,والمشكله انه يتكلم ولا فهمت من اللي قال ولا حرف ,كنت اعرفة عاطفي بس ما توقعت انه يتعلق لها الدرجه وبها السرعه ,فرحت له لما شفت كل هالسعاده فيه لكني بديت اتخيل وشلون بيصير حالنا بعد هالتغير اللي ما طرى على بال, يمكن تستغربون ليش كنت متخوف كثير بس صدقوني لما يكون عندك انسان موجه لك كل ذره في كيانه وكل فكره معك ولفتره طويله من عمرك وفجاة يجي من يشاركك فيه,صدقوني تتلخبط حياتك ولو كانت المشاركه بسيطه وشلون لو جا الانسان اللي بيصير منافس لك؟!مو حب تملك لكنها عاده وغلا كبير ..قطع حبل افكاري خالد وهو يقول : على فكره بندر في شي ابي اقول لك اياه .. وجهه وهو يقول ها الكلام ذكرني بوجهه لما جا يعلمني انه سرق شاهي وحليب من غرفه المدير واحنا صغار , قلت بابتسامه ,, وش مسوي بعد هالمره ؟؟.. مسكني بيدي وجلسنا على رصيف بيتنا حسيت الموضوع جد قال : صراحه يا بندر انا ما قلت لهم اني ادخن ؟!!لحظه قبل لا تقول شيء اصلا هم ما سالوا الا اليوم وانحرجت وقلت لهم لا ما ادخن خبرك خفت يرفضون .. افا ليش يا خالد تبدى حياتك بكذبه تافهه؟! ومن قال لك انها كذبه ؟!اصلا انا نويت اني اوقف زقاير ..انا لما قال لي كذا ضحكت !! تذكرت السنين اللي كنت احاول فيه انه يوقف وكيف انه حاول كم يوم ولا قدر وفالاخير لما اشوفه يعاني نستسلم , لكن من عيونه واضح انه كان مصر ومصمم هالمره على هالشي والله العالم .
بندر اكيد بيجون يوم ويسالونك انت من بد الشباب عشان كذا حبيت اعطيك خبر ..مو شرط يا خالد بالعكس كثير ناس ما يفضلون يسالون الاصدقاء المقربين وطبعا واضح السبب, لكن لو جاني احد وسالني عنك ما رح اكذب عليه بقوله هالكلمتين يالرمت : خالد صديقي من سنين والف النعم فيه بس انا متفق معه لما نتزوج محد يعطي معلومات عن الثاني عشان الاحراج لان زي ما الواحد يقول الحسنات لازم يقول السيئات مافي كامل فها الدنيا هذا زواج مو لعبه وحنا ما نبي نضطر لها الشي , بس اذا تبي العلم باختصار لو طلبني اختي عطيته اياها وهذا كل اللي عندي.. لما انتهيت من كلامي ربت على كتفي وقال ريحت بالي ما خاب ظني فيك يالرمت انا اشهد اني عرفت من اخاوي , توادعنا وركب سيارته , دخلت البيت وانا احس بضيقه شديده صحيح دخلنا ال26 ذاك الوقت يعني طبيعي اللي قاعد يصير لكن ما ادري وش اللي كان صاير معي . كان يكلمني كل يوم عن المستجدات اللي صارت ويسالني اذا كان احد جاني من اهل البنت وانا اقول له للحين ما شفت احد وحتى لما نتقابل طول الوقت يتكلم فهالموضوع بيني وبينكم بديت اطفش صار كل كلامه عن زواجه لكن اللي معجبني في هالسالفه كلها اصراره على ترك التدخين صحيح حالته كاسره خاطري يعني الصداع ماتركه ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ما تتزوج بترجع لا تتعب نفسك , بس في تقدم قعد أسبوع وشوي بدون ولا زقاره , كان مصر على هالبنت وما يبي شي يوقف في طريقه وخالد صديقي واعرفه زين إذا حط شي في باله يجيبه .
(3)
يوم الخميس زي عادتنا كنا مجتمعين انا والربع فالاستراحه وخالد للحين ما جا صار دايم يتاخر لكن عمره ما تركنا , كنا جالسين بعضنا يلعب ورقه والباقين يسولفون , انا كنت العب وسمعنا صفقه الباب اللي برى وبما ان خالد اللي ناقص عرفنا انه هو, وبدى التعليق اللي يقول جانا العريس والثاني يقول الله يعينا عليه من اول ما وقف زقاير وهو نار شابه , قلت لهم : كلش الا خويي عاد لحد يغلط عليه وانا موجود .. وقعدنا نضحك , فتح باب الغرفه والتفت اسلم عليه ما حسيت الا واحد يرفعني من القلابي ويلزقني عالجدار بقوه , لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقه عنيفه, كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبوا ان السالفه هوشه قاموا يفكونه عني , في هاللحظه انا للحين ما بعد استوعبت الموقف بس اليوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لها اللحظه ما ادري وش صاير لكنهم كانوا اكثر منا وقدروا يمسكون كل واحد في جهة ,سامي كان يسال خالد بعصبيه : انت صاحي ؟!! وش جاك انهبلت ؟! وش صاير ؟!ورد خالد بصوت انسان ثاني ماعرفه وياليته ما تكلم :اسال هالجبان اللي قدامكم وش سوى لا تسالوني انا.. في هالوقت بديت استوعب الموقف ..خالد قدامي في حاله عمري ما شفته فيها , معصب والكلام يطلع مقطع منه بسبب تنفسه السريع , ونظرتهما غيرها تطل من عيونه بس الحقد حل محل البراءه ؟؟كان كل شوي يحاول يتخلص من يدينهم عشان يضربني!!
تصورو !! بعدكل هالعمر وهالعشره يضربني انا بندر صديق عمره ورفيق دربه, قلت له وانا احاول اقرب عنده اهديه :وش بلاك ياخالد انا وش سويت ياخوي ؟!رجع يحاول يتهجم علي وابعدوني عنه بسرعه ..لاتقول ياخوي انا لاني اخوك ولا اتشرف اكون اخوك وبصوت تخالطه البحه من شده الصراخ وهو يمسك راسه بين يدينه بعصبيه .. وبعدين لا تقول وش سويت ياحقير لا تنرفزني زياده .. خفت علية كان يصارخ ما يتكلم ويطلع كلامات زي السم .. لما ما تكون قد الكلام اللي تقوله لا تقعد تتفلسف علي يا اكبر كداب قال سامي خالد وش هالكلام ؟!! كبر عقلك وخلنا نفهم الفصه ..صرخ فيه .. انتم لا تتدخلون ورجع يطالعني وهو يضرب على صدره بقهر واضح .. انت ما شفتني اموت فاليوم عشرين مره وان احاول بكل ما فيني اني اوقف زقاير ليش تقولهم اني كنت ادخن ليش؟!!...كنت هاللحظه زي الغبي وعيوني بتطلع من مكانها رديت .. خالد انا قلت لك محد جاني . ولا احد سالني..,, كلامي زاد ثورته وقام يتحرك زي المجنون . هذا اللي يبي يذبحني , بندر لا تكذب لا تكذب ما ابي اسمع منك ولا كلمه صحيح انهم رفضوني بس ما يهم البنت بدالها الف وبدت نبره صوته تخف حدتها . لكن انت ليش سويت كذا يا بندر ليش؟!! الكلام اللي قلت لي ذاك اليوم كان كله كذب وتمثيل ؟!! على الاقل ليش توعدني وتخلف لو قلت انك بتعلمهم كان تفهمت الموضوع ان حطيتني في اصعب موقف, معقوله استخسرت السعاده اللي انا كنت عايشها ولا قدرت تستحمل فكره اني ابعد عنك شوي!! معقوله يا بندر انت من بد هالعالم كلهم تسوي فيني كذا هذا جزاي اني عزيتك ؟؟!.. رجعت النبره العاليه ما توقعتك كذا ابدا انت انسان اناني تعرف يعني ايش اناني ؟! حاولت اتمالك نفسي ورديت بصوت هادي قد ما اقدر .. بسلا تكمل لا تقول كلام تندم عليه بعدين يا خالد لا تظلمني وانا اخوك .. ضحك بسخريه .. اندم!! اندم لى ايش والا ايش ؟!على العشره الحلوه اللي كانت بيننا والا على 16 سنه اللي ضيعتها من حياتي على واحد مثلك والا عالانسان اللي توقعته صديقي وما طلع .............. وقبل ما يكمل كلمته هالمره انا اللي تخلصت من يدينهم وهجمت عليه ورميته عالارض, ولما ثبته تحتي رفعت يدي لكنها وقفت وكل عضله فيني ترجف رجفه فظيعه , لان اللي تحتي كان خالد , خالد الرفيق!! خالد الغالي!! يارب وش قاعد اسوي معقوله امد يدي عليه ؟! صرخت في وجهه .. اسمع يا خالد كل الكلام اللي قلته ممكن اتغاضى عنه عشان المعزه اللي لك بقلبي ولا ني متاكد انه انه فيه سوء فهم فالموضوع اما انه توصل فيك انك تقول اللي بيننا ما كان شي فهذا اللي ما راح اسمح لك تقوله فاااهم؟! .. خلص يدينه من يديني ودفعني من فوقه .. اقول ابعد عني بس .. وقف وانا للحين على الارض .. اسمع يا بتدر هي كلمه ورد غطاها ما عاد ابي اشوفك ولا عاد ابي اسمع صوتك او حتى طاريك وكل اللي بيننا اليوم انتهى , الانسان المخادع اللي ما يقدر الصداقه ماله مكان في حياتي ابد, واذا كنت سويت هالحركه خايف انك تفقد جزء مني يا طفل ابيك تدري اللحين انك فقدتني للابد.
طلع من الاستراحه بنفسالحال اللي دخل فيه واشرت لسامي وان احس بارهاق شديد : اطلع معه الله يعافيك لا يسوقالسياره وهو على هالحال بعد هو مب ناقص جنون فالسواقه .. لكنه رجع بعد دقايق يقول انه ما قدر يلحقه . انتشر الهدوء بعد طلعه خالد وكانوا كلهم يطالعوني مو عارفين وش يقولون , كانوامصدومين مثلي واكثر . وقفت ويدي على قلبي حسيت اني مخنوق وانا احاول استجمع القوة اللي باقيه فيني قلت: عذرا ياشباب متاسف على الفصل البايخ اللي صار قبل شوي , يالله انا ماشي .. سالني سامي بتردد واضح: لحظه قبل ما تمشي يا بندر صحيح الكلام اللي قالهخالد؟!! هزيت راسي باسى وانا امسك دموعي اللي عصتها شيمه الرجال وبابتسامه رديت :ليش استغرب منكم انكم تصدقون هالكلام فيني اذا كان خالد خوي الروح قدر يصدقه؟!!! مع السلامه .. وطلعت ولحقني سامي .. خلني اوصلك للبيت يا بندر تراك على طريقي ... شكله حاس بتانيب ضمير وراحمني وهذا اللي ما احبه رديت .. لا مشكور انا بخير لا تشغل بالك ,.. وركبت السياره ومشيت.فالبيت الوالده وريم كانوا فالصاله لما دخلت , واستغربوا رجوعي بدري.. بعد السلام
سالت الوالده باهتمام : بندر يمه وش فيك ؟!... ريم بعد قالت شي زاد الالم اللي في قلبي :عسى ماشر يا بندر خالد فيه شي؟؟... حاولت امثل اني معصب .. انت ما تفهمين ؟!! كم مره اقولك يا رويم لا تتفولين على العالم , يا جماعه كل اللي صار ان احنا تفرقنا بدري الليله عادي وشفيكم ؟!.. قالت الوالده ......ياولدي وجهك متغير انا امك واحس فيك قلي يا امي من اللي مضيق صدرك ؟!... قالت ريم : لا يكون متطاق مع واحد من العيال؟؟.. قالت امي.. وش دعوى ما تعودنا منك ياوليدي هالحركات ؟!!كنت عارف ان شكل ثيابي يدل على اني توي طالع من هوشه.. قلت لهم: ريحوا بالكم تهاوشت مع واحد من الشباب بس جت سليمه خلاص عاد فكوني , قالت ريم: اكيد بتجي سليمه اذا كان خلود المرعب ابو المشاكل هو اللي دايم يفزع معك المفروض محد يقرب لمك , هزت راسها كنها تذكرت شيء مو حلو .. يمه منه ذاك الولد شراني ياكثر ما صيحني وحسرني وحنا صغار , تذكرين يمه ذيك الايام ؟! .. ابتسمت امي ...اول سنتين من نقلتنا للرياض ما كنت اربط شعرك دايم تجيني تصيحين من تمعيطه لشعرك .. قالت ريم .. وتضحكين بعد يمه المشكله انولدك ذا كان يطقني معه ما كني اخته الحمد لله والشكر..قالت امي .. صحيح ان خالد كان شيطان وهو صغير بس واللهان الولد والنعم فيه شوفي وش صار الحين .. المني كلا مها زياده بس سويت الوضع عادي ووجهت كلامي لريم .. وانت وش تبين ما عندك الا خالد وخالد ؟!! بعدين تستاهلين رازه وجهك عند العيال فالشارع دايم وهو معتبرك اخته ... حسيت اني احرجتها وردت... انا والا انت اللي ما عنده الا خالد؟!!.. قطعت الحوار ورحت لغرفتي....
(4)
قعدت في فراشي استرجع اللي صار معقوله خالد يسوي معي كذا ويقول عني هالكلام وبدون حتى ما يفكر وقدام هالعالم كلهم ؟!! لا اكيد انا احلم اصلا اللي شفت اليوم انسان ما اعرفه !!!ورغم الاهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لها الدرجه ليش؟؟ لانه مو أي واحد لكنه للاسف عطاني مشغول بعدين قفل جواله.!!
جلست في بيتنا ثلاث ايام لا رحت للاستراحه كالعاده ولا استقبلت مكالمات من احد حتى اهلي مستغربين , لكن لان طبعي كتوم ما قدروا يعرفون أي شي.
كانت هاذي اول ثلاث ايام ما اشوف خالد فيها واحنا في نفس المكان مرت على كنها ثلاث سنوات , ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شيء يالمك من جد اذا فاهميني !!!, لكنه الله يسامحه ما حاول يعطيني أي فرصه عشان اتصل عليه . اتصلوا الشباب من الاستراحه وكانوا حاطينه عالسبيكر وسلموا علي وسالوا عن احوالي عاد واحد منهم اسمه ماجد قال: وينك؟ من زمان عنك يا رجال كبر راسك علينا والا عشان خويلد ما عاد يجي صرت انت بعد ما تجي ؟! سمعت كان احد ضربه وسكته المهم قلت : معليش يا شباب انا هاليومين ما اعتقد اني اجي للاستراحه مالي نفس سامحوني .. قال سامي : وشرايك نجيك للبيت اذا ما عندك مانع؟!.. استغربت بس رديت .. بالعكس حياكم الله أي وقت البيت بيتكم .. خلاص اذا شفنا يوم مناسب بندق عليك .. خير انشاء الله الله يحييكم أي وقت ....مع السلامه ..
بعد شوي دق خالد!!!!!!!!!!!!!!!!!!!!!!!!!!!!!!!
معقوله ماني مصدق عيوني وش القصه ؟! قعدت ساعه اطالع الاسم ابي اتاكد انه فعلا هو, لكن للاسف سويت شي بظل ندمان عليه طول عمري, عطيته مشغول وقفلت الجوال.ليش سويت كذا ما ادري اظن انها كانت رده فعل طبيعيه بعد اللي صار لي معه وما اعتقد احد يلومني , يمكن ابي ارد له اللي سواه اوكنت عارف لو رديت عليه انه بيكون لي فضل عليه وهذا اللي ما ابيه المهم هذا اللي صار . لكن الوضع استمر صار يدق علي وانا ما ارد كنت اعاتد قلبي قبل لا اعانده هو, صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لا نه اكتشف انه غلط بحقي ومن هالكلام اللي خلىعنادي يزيد...بعد يومين دق علي طلال اخو خالد الكبير هو بعد صديق عزيز يجلس معنا من فتره لفتره فالاستراحه وكنت اغليه من على اخوه واحترمه كثير ولاقدرت اصفطه رغم اني عارف سبب المكالمه ورديت : مرحبا طلال .. هلا وغلا وش اخبارك وعلومك يابندر؟ ابد والله تمام .. انت اخبارك واخبار الاهل ؟... تسلم كلهم تمام, بندر ياخوي !!!! ..,,سم ؟... سم الله عدوك , انا داق عليك عشان موضوع خالد انا عارف انا عارف انك ما تبي احد يتدخل بالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ما قدرت اشوف حاله اخوي كدا واصفط يديني , الصراحه من ذاك اليوم وهو مو خالد اللي نعرفه لا يروح ولا يجي ماعاد يسولف ولا يضحك حتى الاكل دايم ما يشتهي !!والوالده ضايق صدرها عليه تحسب انه زعلان على البنت وتقول لاخواني وين بندر عنه محد بيوسع صدره الاهو!! صار طول الوقت في غرفته خاصه لما عرفانه مالك يد فاللي صار وليتها جت على كذاخالد رجع يدخن بعد بس هالمره بشكل يخوف يا بندر ....قلبي انقبض بس رديت .. والله ياطلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شيء اتمناه ان خالتي يضيق صدرها وانت عارف زين اني اعتبرها امي الثانيه لكنانا ما غلطت معه ابد,هو اللي جاني ونسف كل شي حلو كان بيننا في لحظه غضب ..طيب ماتبي تعرف وش القصه وليش خالد سوى معك كذا؟.. مهما كانت القصه ماتعطيه الحق انه يسوي اللي سواه ترانا ماعدنا صغار وانا اخوك , بالله هاذي طريقه يعاملني فيها؟!!والله اني ما شفته يسوي كذا مع الناس اللي كان يتهاوش معهم وهو مراهق , خالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي .. تنهد طلال .. ياخوك اللي صار ان اهل البنت قبل لا نحدد الملكه رفضوا فجاة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون , ومن ضمن الكلام فهمنا ان اللي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟ ! وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحه ما احد من اخواني جا على باله كلنا رحنا لك على طول لما سمعنا الاسم ......
ضحكت بتعجب وانا اقول في قلبي "هذا الشيء التافه هو اللي خلاك تظلم خويك ياخالد؟!!" رديت على طلال ....والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح والله انه غالي وانا مسامحه ياطلال ولا ابي شيء منه بس صدقني ما اقدر ..وحسيت اني ما عاد اقدر اكمل .. بنبره هادئه رد طلال ..على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شيء بس هذا اخوي يا بندر ولازم احاول اسوي أي شي... اعذرني ياطلال ياليتك جيتني في شي ثاني والله رقبتي سداده ...اصيل ما تقصر يا بندر اشوفك على خير.. مع السلامه ... لما عرفت التفاصيل ضاق خلقي زياده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابه اسماء؟! شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكلام المفروض ما ينطبق علي , على الاقل مو بها لطريقه اللي صارت !! باختصار حسيت اني مثلي مثل غيري بالنسبه لخالد .. فاليوم الثاني جت الوالده تصحيني الساعه 10 الصبح ... يمه بندر اصحى خالد عند الباب ... كنت متوقع ان هالشي بيصير وحاسب حسابه .. قولي له نايم .. قلتها وانا اغطي راسي بالبطانيه .. حاولت.. تسحبها من فوقي .. يوه اقولك خالد عند الباب وش بلاك يا ولدي .. على صوتي شوي .. عارف انه خالد سمعتك من المره الاولى وانا اقولك نااااااايم ... تعجبت الوالده من تصرفي لاني اول مره اسويها لكني ما عطيتها فرصه عشان تستفسر, طلعت من غرفتي وانا نطيت من فراشي للشباك على طول , كنت اشوف سيارته لكن ماقدرت اشوفه حاولت منا ومنا مافي مجال . صار يمر على بيتنا يوميا الظهر والليل وانا اتهرب منه واصرفه ولا عمري طلعت له , ودروا اهلي ان بيني وبينه شي اصلا واضح مايبي لها ذكاء ,اماجوالي صار ما يسكت سواء مكالمات من خالد اومن الناس اللي يحاولون يصلحون بيننا ومسجات طول الوقت حتى اذا قفلته وفتحت الثاني اوسوا كان يدق عليهم على طول . ما ادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ما ينطبق عليه..
(5)
ذاك اليوم اشتقت له ورجعت بي الذكريات لايام الابتدائي وياكثر المواقف اللي حصلت لنا لان اللي يصادق واحد مثل خالد تتحول حياته لمغامره, مره في الصف السادس اذا ماخاب ظني كان الاستاذ مسوي مسابقة اللي يفوز بيصير "العريف" اللي ينظم الفصل اذا ما كان الاستاذ موجود ...!!! والله ايام وحشتني المهم انا كنت ميت عشان اصير هالعريف اجي بدري , واشارك,وصاير مؤدب "ثقيل دم على قوله خالد " كان ما يحب الاشخاص اللي مثلي يهتمون بالدراسه ويحبون المدرسين او يتمصلحو عندهم على قولته بس سبحان اللي جمعنا مع بعض كان يقول .. ليش تبي تصير عريف؟!! ترى العيال بيكرهونك.. ما اهتميت لكلامه ورديت .. ابي اصير كيفي!! بعدين يا غبي بخليك تطلع وتدخل على كيفك.. لا مو لازم انا اسوي اللي ابي حتى لو ماكنت انت العريف.. المهم قبل لا يختار الاستاذ بيومين شريت بلونات وجبتها للمدرسه, خالد كان مريض وغايب بس انا والشله رحنا ومليناها مويه واول ما انتهى الدوام رميناها من فوق وانحشنا , يمكن بتقولون وين الولد المؤدب لكن انا بعد خالد صارت تجيني طلعات , توقعت الموضوع محد بيدري عنه لكن من بكره اول ما جيت الصبح قالولي العيال ان الاستاذ يسال عن اللي جاب البالونات وسوى الحركه اللي امس , هنا انا قلت على العريف السلام,هالاستاذ ما يصدق , رحت لخالد اللي مجتمعين عليه كل العيال بما انه كان غايب امس, علمته باللي صاير وهو يدري انا وش سويت امس لاني قلت له السالفه واحنا جايين للمدرسه , قال خلاص ولا يهمك انا اتفاهم مع الاستاذ كنت اعتمد عليه كتير , لما بدت الحصه دخل الاستاذ وبنبره كانت تخلينا ننتفض.. اللي رمى البالونات امس يوقف .. محد رد فالبدايه كان ماسك مسطره وش كبرها الله يسامحه .. شوفوا لو ما تكلمتوا بعاقب الفصل كله .. ناظرت خالد وانا بموت من الرعب ابتسم وغمزلي , وبعدين وقف.. انا يا استاذ.. قالها كنه محرر القدس!!قرب الاستاذ من عنده وسحب اذنه .. والله اني عارف انه مافي غيرك ياخالد يسوي هالحركات , انت متى بتعقل ليش ما تصير مثل اخوانك او مثل صديقك بندر جننتني معاك ياولد !!..
الصراحه ما توقعت ان خالد بيتحمل اللي صار بدالي ؟؟!فعلا كنت مستغرب والدليل اني قاعد اتفرج وهو يتعاقب وانا ساكت !!طبعا الاستاذ كسر المسطره على يدينه يا حرام وانا احس ان عقلي بيطير من المنظر بعدين وداه للمدير.. في نفس الحصه اختارني الاستاذ عريف وطبعا ما تهنيت فالخبر لا ني ما ادري وش صاير مع خالد ذاك الوقت .. لما انتهت الحصه كان واقف قدام غرفه المشرف وحوله بعض الاولاد,يوم شافني ركض ولمني ..احلسس اخيرا وصلت اللي تبي مع وجهك ..انا ما كنت اقدر اتكلم اشوف يدينه حمر من الطق ويفركها على جسمه ووجهه الاسمرتخالطه حمره بسبب المرض وهو يضحك..قلت وانا متنرفز يمكن من الاحراج.. خالد ليش سويت كذا انا ماقلت لك – قاطعني .. يابن الناس يعني اول مره انطق خلاص مشها يالله لازم نحتفل اليوم ..من بعد اللي صار عمرنا ماتكلمنا عن هالسالفه شكله نساها اوما اعتبرها شي بس عمري ما نسيت صحيح اننا كنا صغار لكن فزعته هاذي لا يمكن انساها...هالذكريات شوقتني له روحت اتفرج على صورنا وعلى اشرطه الفيديو, وعجبني كيف كنا مره قريبين من بعض ولا في مكان يطلع فيه واحد الا الثاني جنبه , اغلب الاشرطه ما قد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض اكتشفت اني طول الوقت اطالعفيه هو حتى فالصور عيني عليه بس, وطوال وقت عرض الاشرطه وانا اضحك عليه كان بطبعه خفيف دم محد في هالدنيا يخليني ابتسم او اضحك اوحتى يجنني مثل مايسوي , واحد من الاشرطه كان فيه مقطع اثر فيني كثير كنا مخيمين فالصمان واحد من الشباب يصور ومعه خالد , مروا على اغلب الشباب اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقه كلامه وتعليقاته لما جا دوري كنت قاعد اشب الفحم ومعطيه ظهري قرب مني .. عاد جينا الحين لاغلى انسان ... كنت مشغول باللي معي .. هلا هلا خلود, مسوي فيها مذيع يعني ؟!! ما ودك تساعدني بدالهالخرابيط ازعجت العالم ياعمي .. كان يوجهه كلامه للكاميرا وحاط يده على ظهري وأنا مو معطيه وجه.. هالولد اللي تشوفونه عرفته من يوم أحنا صغار عزيز وغالي علي ولا أبدله بكنوز الأرض .. قاله اللي يصور : ما اقدر أنا على هالكلام !! يا بعدي هاللي أنت كاشخ فيه وتمدحه من الصبح حتى ما عطاك وجه وأنت تتكلم .. طالعني بنظرات ما انتبهت لها ذاك الوقت كانت تحمل معاني حلوة .. كمل كلامه .. والله لو ايش يصير ما يتغير شي من غلاه .. تجمعت الدموع وأنا اسمع كلامه مع إني ذاك الوقت واضح أني ما انتبهت لأي كلمه جتني مشاعر متضاربة كنت أقول في نفسي "كلام رائع لكن ما طبقته يا خالد باللي سويته فيني" سكرت الفيديو ورحت أنام أو بالأصح أحاول أنام. يوم الثلاثاء رجعت للبيت متأخر ولما وصلت عند الباب شفت سيارته , كان يستنى داخلها والله وحده اللي يدري من متى , وعلى ما يبدو لي من طريقه قعدته وتكتيفه يدينه انه نايم لان رأسه مايل على جنب بس شكله متغير مره !! أول شي لحيته بدت تطلع , شعره تركه يطول بدون ما يرتبه وهاذي مو عادته ابد, واضح أن جسمه ضعف يعني كأنه واحد توه طالع من السجن... وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه .. يمكن ما كنت أبغى انتظاره يطول , فز من نومته ونزل بسرعة , ناداني وصوته تخالطه بحه واضحة , وخالد من النوع اللي صوته يروح بسرعة أذا صارخ أو أذا صار مريض حسيت بتعبه , لكني ما التفت له سويت روحي ما اسمع ودخلت للبيت , الرجال قعد يطق الباب زي المجنون لدرجه أني خفت يصحي الجيران ويفضحنا قدام العالم وأنا واقف عنده من داخل منزل راسي واسمعه ....افتح يا بندر خليني أكلمك الله يعافيك لا تسوي فيني كذا يا بندر..كان كل مره يناديني فيها باسمي بصوته اللي مره تسمع الكلمة ومره ما تسمعها اتالم بس من جد ما ادري وش قوة القلب اللي جت لي فجأة وخلتني أتماسك ولا اطلع له كل ما مر الوقت زاد عنادي , بعد فتره سمعت صوت جسمه ينسحب على بابنا كنه يقعد فالأرض , رحت اركض بافتح الباب خفت انه صار له شيء لكن سمعت صوته يكلم نفسه لأنه توقع أني دخلت داخل خلاص .. سامحني يا بندر أنا أسف والله أسف .. وأنا اسمعه كنت كني اسمع اعتذار من طفل متأكد أن اللي قدامه ماراح يسامحه , جلست على الأرض وحطيت راسي بين يديني وسندت ظهري للباب من داخل , وأنا أفكر في نفسي "معقولة اللي قاعد يصير معنا يأرب ؟!!" والله دنيا غريبة وجلسنا ساكتين , وبعد فتره سمعته يتحرك ويركب سيارته.بعد يومين جاني واحد من ربع الثانوية اسمه نواف كانت علاقته قويه مع خالد والى الحين وهم ربع بس هو مو من شله الاستراحة ابتسمت أول ما شفته تذكرت على طول هبالة هو وخالد أيام كانوا يرقصون سامري فالصف كانوا أجرا اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم أن خالد لازال على جنونه ..
ما قال شيء عن الموضوع لكن جيته صدقوني كان لها اثر في نفسي ذكرتني بأشياء كثيرة وأظن أن هذا مقصده من الزيارة ...
(6)
جاني مسج من خالد فاليوم الي بعده وكان مقطع من اغنيه تعجبنا ودايم نرددها يقول المسج: *ما جيت ابسال جروح اوسبه غيابي ...
المشكله "اعرفك" اكثر من اسرارك....
واكثر من جروح قلبي ورقه اعتابي...
(((قلي بعد هالفرق وش اخر اخبارك)))؟؟!!!
المسج اثر فيني لان خالد مو راعي مسجات ولا يعترف فيها, رجعت بي الذكرى لايامنا الحلوة وقررت ارسل له مسج كرد من نفس هالاغنيه بعد بتعديل بسيط مني : *ماهي غريبه اذوق وانطفي بنارك
ولا هي بعيده اشوف الجرح باحبابي
حاولت انسى ولكن ضاعت اعذارك
مادام جرحك ((يالرمت)) مكتوب بكتابي!!
يوم الخميس اتصل سامي : هلا بندر .. فرحت بمكالمته ذكرتني بالجمعات فالاستراحه ...هلااااااااااااااااااااااااااااااا سامي وش الاخبار ... تسلم, وش دعوى يارجال وين الناس اشتقنالك.... تشتاق لك العافيه ياخوي ... فاضي اليوم نمرك انا والشباب بين عشوين ؟.... الساعه المباركه حياكم الله والله ودي بشوفتكم .. اجل نشوفك اليوم انشاء الله ... لا تطولون صلو في مسجدنا مع السلامه . جو الشباب على موعدهم على انهم ما صلوا عندنا ورحت افتح لهم , ماشاء الله كان الكل جاي ما ادري وش الغلا اللي جا لي فجاءة , ولما اكتملت المجموعه وانا ارحب فيهم قبل لا اسكر الباب دفعه واحد فتحته بسرعه وقبل ما اشوف مين قلت ..السموحه ما شفتك يــــا ....كان خالد!!! ما عرفت وش المفروض تكون رده فعلي , لما تلاقت عيوننا بعد كل هالغيبه حسيت كني بطير من الفرحه في داخلي وانا احاول بكل ما اقدر اني اخفيها واني ما انط عليه واحضنه , ابتسم ذيك الابتسامه الحلوة واللي وحشتني حيل وهو زي ما تقولون كنه واحد غرقان ورد النفس ... فتح يدينه عشان يلمني لكني بكل جمود مديت يدي وصافحته بدون أي كلمه !! قبل لا يصير في خاطركم شيء علي تذكروا اللي سواه فيني وش ممكن تكون رده فعل أي احد فيكم , فالاخير احنا بشر ولنا مشاعرنا وانفعالاتنا اللي مو دايم لها تفسير ولا تقدر نتحكم فيها مهما كانت مكانه الشخص بالنسبه لنا.. الشباب سبقونا للمجلس , اصلا كان واضح الفصد من هالزياره اكيد خالد هو اللي جابهم كلهم , توجهت للمجلس لكنه سحبني من ذراعي ناحيته بقوة, وبصوت هامس يحمل كل معاني الندم والرجا ... معقوله ما وحشتك ؟!!... ما رديت عليه وكمل كلامه ...لمتى يا بندر بتظل تتجاهلني , كلمني رد علي , هزئني اوحتى اضربني انا راضي واستاهل لكن لا تسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يا بندر انت بالذات تدري اني مالي غتى عنك.. كان قلبي يقول لي... ياخي خذه بحضنك وانسوا كل هالالم لكن الله يلعن ابليس , العناد والكبرياء سيطروا علي والموقف اللي صار فالاستراحة بين عيوني , قلت بكل برود وانا ابعد يدينه عني بهدوء ... جعل يدي تنقص قبل يجي اليوم اللي تنمد فيها عليك ماضربتك وحنا ضغار تبيني امدها الحين؟!!! "كانت نغزه على حركه الاستراحة ", يالله الشباب ينتظرون داخل ... نزل راسه بانكسار ودخلنا , واضح انهم كانوا يحاولون يلقطون شي من الحوار اللي دار بيننا , لكن اول ما دخلت كل واحد التفت على الثاني ويسوى روحه متعمق في سالفته . بديت اصب القهوة ومسك خالد الدله الثانيه , كانت هاذي عادتنا لما يزورني احد دايم نفزع لبعض بس هالمره ما كنت ابي أي مساعده منه , واللي زاد قهري ان خالد باللي صار خلانا فرجه لخلق الله ومحل شفقه الجميع وهذا اللي ما كنت استحمله ... قلت لماجد اول واحد بصب له بصوت واطي وانا اضغط على اسناني ..رح قله يترك الدله ومشكور مانبي منه شي... كملت صب وسمعت ماجد يقول لخالد اللي بدى يصب من الجهه الثانيه : هات الدله عنك .. لا استرح تسلم انا ابي اصب مع رفيقي ... وشدد على اخر كلمه يبيني اسمع.... لكن بمزحه بايخه وقاسيه في نفس الوقت يرد ماجد : هذا اول يالحبيب زين انه سمح لك تدخل لبيته معانا هات عنك بس... وقعد يضحك.. حسيت انه جرحه وتعمد يهينه ولولا اني حكمت عقلي ذيك اللحظه وتذكرت انه في بيتي كان صفقت وجهه بالدله اللي معي , صحيح ان ماجد كان معروف عنه انه انسان فظ وعربجي ومزحه زي وجهه ولا يثمن كلمته اوحتى يفكر فيها قبل يقولها , لكن لو في ظروف غير هاذي الله العالم وش كنت بسوي فيه ...هذا اذا ما ادبته اول ما يطلع خالد ادري انكم تقولون طيب هذا اللي انت تسويه مع خالد بس ما ادري اذا قد جاكم هالشعور انه ممكن اجرح او ازعل انسان غالي علي بس لو احد ثاني حاول يفور دمي و اعصب !!!. المهم سويت روحي ما سمعت وكمانا صب , جلسنا , اللي يسولف واللي يضحك كنه ما صار شيء الاانا وخالد كنت امر بعيوني عنده كل شوي , ولاني افهمه من عيونه وبدون أي كلمه عرفت انه ينتظر الشباب يمشون .
اذن العشاء وقاموا الجماعه الا خالد وكنت متوقع هالشي بعد, ودعتهم وشكرتهم على الزياره , عند الباب قال لي سامي بيني وبينه : والله انكم مفضوحين الغلا واضح بينكم حتى لو حاولتوا تبينون العكس والله الله في خالد وانت عارف اكثر مني انه مافي مثله انت العاقل ولا تغلط غلطته انتم بدون بعض اسمح لي ما تسوون شي, ولا تخلون شي تافه يهدم احلى صداقه شفتها في حياتي اصلا والله يابندر انه يحز في نفسي اني اوصيك عليه وانتم اللي من اول نخاف نقول شيء عن واحد منكم قدام الثاني ... شكرته وقلت .. قلبي يا سامي ما يزعل وانت تعرف خاصه على خالد بس الامور احيانا تطلع من يد الواحد والله يخليك لا تفتح معي الموضوع مره ثانيه تراه علي اصعب مما تتخيلون .. مع السلامه ...
ودعته ,ولما التفت لقيت خالد واقف عند الباب الداخلي ينتظرني, قربت عنده بدون أي كلمه وكتفت يديني, بدى بالكلام على طول .. بندر سامحني يااخوك ترى كل هاللي قاعد يصير ماله داعي, انا تهورت وقلت كلام ماكان لازم اقوله, وجيت اليوم اعتذر لك واحب راسك بعد ,"تكفى" خل عنك العناد وريح بالي ترى ما صارت المسامح كريم يالغالي....سكت فتره اول مره اسمع تكفى منه كانت طالعه قويه منه لكني حاولت اختار كلماتي قبل لا اقوله شيء .. اسف ياخالد صدقني ما اقدر انت حطمت كل الاشياء الحلوة لك في داخلي بعد ما سمعتني ذاك الكلام والا نسيت ؟!!! اذا نسيت تراي اذكر كل كلمه قلتها وتتردد في بالي كل يوم , ذاك الكلام اللي زي السم واتهمتني باطل بعد بدون ما تحسب لصداقتنا أي حساب , ياخالد انا للحين احس اني في حلم مو قادر اصدق اللي صار, انت من بدكل هالعالم تبيعني انا في لحظه؟!!!ما كان العشم والله... وبصوت مليان الم ..يعني ايش يا بندر 16 سنه صداقه معقول ما قدرت تلقى لي لحظه وحده تشفع لي عندك وتخليك تسامحني ؟؟؟!!...بعد كلامه انهمرت الذكريات من كل جهه لكني حاولت اتجاهلها بكل ما اقدر وانفجرت .. اسال نفسك قبل لما اهنتني قدام البشريه بدون ما تعطيني حتى فرصه اني ادافع عن نفسي انت يا خالد حتى ما حاولت انك تظن فيني خير وبعتني بسهوله, نسيت كل شي ياخلود , نسيت اللي اذا ضاقت بك الدنيا يصير لك الدار ويضيق خلقه لين تنفرج عليك, ونسيت اللي صانك وحفظ اسرارك طول عمره , نسيت اللي ما يرضى احد يغلط عليك وانت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيره لك , حركت يديني بعصبيه... ياخساره يا خالد انا بس ابي اعرف ذنبي , قلي ليش سويت معي كذا؟؟!عمري غلطت عليك بكلمه ؟ اوحتى ضيقت خاطرك بحركه؟ تجرحني بها لسهوله ليه؟ علمني يا خالد لا توقف ساكت تكلم يا اخوك ؟!!المشكله هنا ان الغلطه جت من غالي وهذا اللي يخليني ما اقدر امشيها... عضيت على شفتي وانا اشوف ملامحه تتغير .. تجاهلته وكملت .. تدري وفر علي كل الكلام اللي بتقوله لانه ما عاد ينفع شي الحين اللي انكسر ما يتصلح ما عاد لك بقلبي مكان ليتني ما عرفتك ياخالد .. كنت اقول هالكلام عشان ارد له اللي صار فالاستراحة وداخلي يصرخ .. يا مكبر كذبتك يا بندر انت لو احد سالك وش دنيتك ما يجي في بالك الا اهلك وخالد .. سكتنا شوي وخالد يهز راسه وعيونه تتلامع والف صوت في داخلي يقول له : تراي مثلك يالغالي عزيز وداخلي منهار , وعشان انهي هالمشهد الحزين قبل لا اضعف قدامه قلت : في بيت شعر سمعته مره وما اظن ان معناه واصل لي او يمكن المشاعر اللي وصفها الااليوم: الجرح لاجا من اغراب عادي بس الجرح موت الجرح لا جا من احباب *لا جا من احباب يا خالد وانت ياخوي ما قصرت كفيت ووفيت معي فهمتني البيت بطريقه ما اظن الا متاكد ان ما احد يقدر يوصلها مثلك . ما ودي اقول اني نادم على الماضي لاني فعلا ما ندمت لكنك خيبت ظني فيك... رفع براسه وقرب يده من اذنه من قسوة الكلام اللي سمعه ... كافي يا بندر كافي انا عارف انك دايس على قلبك وانت تقول هالكلام , فاذا كنت تبي تثبت لي شي اوحتى لنفسك صدقني تراك اثبته, واذا كنت تحس انك مخدوع فيني او مصدوم فانت الحين باصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ما تهون عندي , وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما رح استسلم وعارف انك مهما تقسى وتبعد طيبتك وحنيه قلبك بترجعك لخويك , وعارف بعد اني ما اهون عليك...همست وعيوني فالارض :وش اللي يخليك متاكد لها لدرجه؟!مثل ماهنت عليك في يوم بتهون علي اليوم !!... طالعني بنظره يائسه وحزينه ...الله يسامحك يا بندر والله ما اظن انه يفرحك انك تجرح خويك بها الطريقه ..., اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغني ولو عن لحظه من ذكريات عمري معك لاني ما اقدر انسى حياتي كلها .... رديت بسخريه واللي سويته فالاستراحة وش تعتبره؟؟ مثل ما نسيت اللي بيننا بسوء ظن انا نسيته بها لجرح , و ادري انك ما تستحمل فكره ان أي احد يزعل منك لكن انا ---.....قاطعني ... يابندر انت مو أي احد وراك تكلمني كذا؟! فتح عيونك تراي خلود .. فعلا انا مو أي احد والدليل سواتك فيني ... ابتسم بالم.. لاحول ولا قوه الا بالله ما توقعت العناد يوصل فيك لها لدرجه على كل حال الموضوع الحين صار في يدك وتقدر تحكم فيه بالطريقه اللي تبي بس اتمنى انك ما تسوي شيء تندم عليه, ولا تغالط نفسك اكثر من كذا انت تعرف من انت بالنسبه لي وهالعالم اللي حولي بدونك ما ابيهم وما اقدر اتخيل ان اللي كان بينا بيكون ذكرى في يوم من الايام انت متخيل هالشيء وانت تقول هالكلام ؟!!.. هزيت راسي .. محد يموت قبل يومه الدنيا كذا والحمد لله على نعمه النسيان .. اقامه الصلاة ..وودعنا بعض وطلع .
(7)
بعد هالموقف حسيت براحه كبيره , حسيت ان احنا متعادلين الحين اويمكن كان سبب الراحه اني تكلمت معه بعد فتره اعتبرها في نظري طويييييييييله وطلعت كل اللي في خاطري , اصلا ما عاد فيني صبر على فراقه واكيد انه حس بغلطته وهذا اللي كنت ابيه وقررت اني انسى اللي صار خلاص وارد عليه اذا دق المره الجايه , واسامحه واطلب منه يسامحني بعد , يعني حتى انا قلت كلام ما كان لازم يطلع مني وقررت ان احنا نسافر بعد عشان نعوضض كل الايام اللي بعدناها عن بعض . علمت ريم بالسالفه كلها كانت مستغربه وهي تسمعني: تصدق يا بندر هاذي والله العالم عين وصابتكم اجل معقوله خالد يسوي اللي سواه لا والاغرب انك قويت نفسك ولا سامحته , لا لا اسمح لي هالكلام ما يدخل العقل ..!!. ضحكت وانا اسمعها وقلت .. من جدك ما سامحته؟؟!!اصلا من اول ما شفت اسمه في جوالي سامحته على طول وبيني وبينك قلبي ما قوى يزعل عليه من الاصل لكن الظاهر اني كنت امثل على نفسي قبل لا امثل على احد !!! ثانيا المساله باختصار كانت رد اعتبار , لكن تعرفين حنا مو زيكم انتم يالبنات اذا زعلت وحده الثانيه تعتذر على طول غالبا والثانيه بعد تسامح بسرعه وهذا في ظني اللي يخلي صداقات البنات اجمل واطول بعد اما الشباب فالكرامه والعزه تتغلب على العواطف الثانيه دايم تحس ان احنا مو بحاجه احد والاعتذار بعد من اصعب الاشياء علينا هاذي طبيعتنا اللي حطها ربي فينا هذا وانا وخالد نعتبر طفره جينيه بالنسبه لصدقات الرجال الله يعين انشاء الله انا الحين بس استناه يدق خلاص ما عاد فيني صبر... طالعتني بتعجب .. والله انك غريب يا بندر طيب ليش ما تدق انت عليه؟!!!... اووووه انت غبيه والا تتغبييين وش قاعد اتفلسف عليك من الصبح اقول لك ما اقدر صعبه على وبعدين خلود ما يقدر يصبر بعد اكيد بيدق هو قال لي انه بينتظر علي شوي .. ...عطتني نظرات ما ادري وش تبي وقالت .. الحمد لله والشكر لحد يسمعك بس وبعدين لا تسوي روحك فاهم البنات لانك ما عندك سالفه وفي شيء ابيك تفكر فيه تتوقع لو الوضع كان العكس خالد كان بيسامح والا بيسوي مثلك ؟!!!.. وطلعت ... وقعدت افكر في كلامها واللي اجابته كانت واضحه بصراحه وهي بعد كانت تعرف الاجابه لان مواقف قديمه تبين ان خالد حتى لو كان صعبه عليه بسامح ومن النوع اللي زعله شين بس انه يسامحني انا دايم مهما صار ............لكن هالكلام مايهم الحين...
مر كم يوم وخالد للحين ما دق لكني يوم الاربعاء شفت ميه مس كول من طلال ورجعت ادق عليه قلت اكيد ان خالد يبيه يتوسط بيننا لانه يعرف معزة طلال عندي لما فقد الامل فيني, وبعدين انا خلاص وصلت عندي ابي كل هالسالفه تنتهي ودقيت وانا فرحان ... مرحبا طلال.. هـــ....هـ لا...بندر ..صوته ابدا ما عجبني واختفت الابتسامه.. طلال خير انشاء الله عسى ما شر , معليش ما كنت عند الجوال قبل شوي بغيتني في شيء؟!.... الرجال بدى يتنهد وحسيت ان في شي مو زين صاير... بندر انا لي ساعه احاول ادق عليك لكن -------...........طلال ياخوك لا تلعب باعصابي قلي وش فيكم ؟!.. انا ذاك الوقت الهواجس لعبت فيني لعب قلت ابوهم توفى لانه كان رجال كبير فالسن ومريض من زمان والا اخوهم الصغير تركي اللي كان عنده ربو حاد جاه شي مر في بالي وكنت طول الوقت افكر بس في خالد وشلون بيتقبل هالاشياء وانا اعرف غلا ابوه واخوانه عليه وعزمت اني انسى كل اللي صار واوقف معه في محنته كل هذا قبل لا ينطق طلال بحرف ...خالد يا بندر ---------!! لما سمعت الاسم حسيت ان قلبي وصل حلقي ولا عاد قدرت اتكلم اوحتى اتنفس وبصعوبه ..خ-خ—الدوش---فيه حرااام عليك تكلم ؟؟!! كنت انتفض وركبي ما عاد تشيلني .. خالد يطلبك الحل يابندر ادع له بالرح-----وخنقته العبره اما انا فكنت ساكت ولا عاد اشوف شي قدامي قعد يتكلم كلام ما فهمت منه شي اللي قدرت استوعبه انه الظهر صار له حادث والظاهر انه كان متوجه لبيني وتوفى فالمستشفى ..قفلت الجوال , كنت واقف وبحركه بطيئه قعدت على الارض وبعدين انسدحت عالارض وقعدت اناظر السقف لفتره طويله ويدي على راسي فقدت الاحساس بكل اللي حولي .لا دموع ولا كلام ولا صدر مني أي ردة فعل ..
طلعت بسيارتي امشي فالشوارع بدون هدى ما وعيت الا وانا فالمجمعه ديره خالد اللي تبعد عن الرياض حوالي الساعتين وياما زرناها سوى , وقفت السياره قدام فلتهم اللي يجونها ايام الشتاء لما جا الليل رجعت للرياض .. دخلت البيت ورحت لغرفتي وقعدت اتقلب في فراشي تصوروا كل هذا بدون أي احساس الظاهر اني ما كنت مستوعب المصيبه اللي انا فيها لما جا الصبح رحت لبيتهم على طول وقبل اوصل دق علي طلال ..الو هلا بندر اذا ودك تسلم عليه وتودعه قبل الدفن تعال للمغسله اليوم قبل صلاه العصر ...
ما رجعت للبيت رحت للمغسله وسالتهم قالوا مابعد وصل من المستسفى تبون الصراحه كان للحين عندي امل ان السالفه كذب اوفيها غلط زي حال الكل وقت المصايب ماودهم يصدقون واني بشوف خالد بعد شوي , قعدت عند الباب الى الساعه 2,30 والا اشوف سياره اسعاف جايه ووراها سيارات اخوان خالد كلهم وقف الاسعاف وفتحوا الباب الخلفي , شفت طلال وباقي اخوانه عند السياره لما شفتهم يطلعون طرف شي ابيض شهقت ورحت اركض فالشارع كنت احاول ابتعد عن المكان بقد ما اقدر مشيت لين وصلت اخر الشارع وجلست على رصيف واحد من البيوت لما هدت نفسي شوي رجعت للمغسله كان لازم اواجهه الواقع لوكان قاسي.....
(8)
دخلت وانا شماغي على كتفي وماسك عقالي في يدي وحالي دمار لقيت مو بس اخوانه حتى اعمامه واخواله وزوج اخته بعد الكل كان متواجد لما شافوني تغيرت وجيههم وحضنوني بحراره كلهم اعرفهم ويعرفوني زين عرفت اني ذكرتهم فيه لما شافوني حتى واحد من اخوانه ما رضى يتركني كنه بتعلقه فيني يحس انه مع اخوه خالد والغريبه انهم كانوا يعزوني بدال ما انا اعزيهم المهم جاني طلال وعلامات التاثر باينه في وجهه ..تبي ادخل معك ؟؟؟ احنا تونا طالعين .. قاطعته.. لالا بدخل لحالي ... كانت هاذي اول جمله انطقها من اول ما دخلت للمغسله حتى لما عزوني ما رديت عليهم ..تعوذت من ابليس وبديت اذكر الله ودخلت في الغرفه اللي دلوني عليها كانت فيها روايح غريبه الريحه اللي قدرت اعرفها هي ريحه المسك والصابون الظاهر ان الرجال اللي كان فالغرفه هو المغسل وقفت في مكاني عند الباب ماكنت عارف وش اسوي؟!! قرب جنبي وكان شخص يميل للقصر ابيض لحيته طويله وصاحب ملامح سمحه حط يده على كتفي وحس بالرعشه اللي تهزني كنت اطالعه بنظرات استغاثه .. وبصوت وقور قال... عظم الله اجرك ياولدي واحسن الله عزاك الله يلهمكم الصبر والسلون , قبل جبهته وادع له بالثبات عند السؤال, وباللي يجي في بالك .. كنت اطالعه وانا اشهق بدون دموع وطلع من الغرفه... شوي شوي قربت من عنده وشفت منظر في حياتي مامر على مثله حسيت الدم وقف في عروقي لما شفته انهارت كل حصون المقاومه والصبر اللي بنيتها ما ادري وشلون اشرح الوضع كانوا حاطينه على شي زي الطاوله ومرتفعه عن الارض بمسافه قليله مغطين جسمه بشراشف بيضاء الاوجهه وجزء من صدره كانت عينه وجزء من جبهته متحوله للون الازرق من فعل الصدمه اما خده ورقبته كانت فيها جروح بسيطه لكن واضح ان تركيز وقوة الصدمه كلها جت على صدره كان زي اللي نايم بس بدون أي اثر للحياة والظاهر اني ما صدقت الخبر لين شفته بعيوني فقدت اعصابي في ذيك اللحظات وصرخت صرخه مريعه , حضنته بين يديني وقعدت اصيح بحرقه زي الاطفال , دخلوا علي بعض اخوانه يوم سمعوا صوتي وحاولوا ياخذونه مني لكني كنت متمسك فيه بقوة .. يا بندر قل لا اله الا الله لا تسوي في نفسك كذا ترى مايجوز ... وانا اصرخ من كل قلبي احس اني فقدت عقلي للحظات ... اتركوني خالد ياخوك رد علي, كلمني ياخالد , طلال خالد ليش بارد ؟؟ ليش تاركينه كذا؟؟ليش ما غطيتوه ؟؟ حرام عليكم ..نزل راسه وانسابت الدموع من عيونه ..انا لله وانا اليه راجعون ...تعال معي يا بندر تعوذ من الشيطان وخلنا نطلع ...وانا احاول اكلمه .. ياخوك وين رحت وتركتني ؟!!! انا من لي غيرك يا خالد؟؟.. ودموعي سيول واخوانه يحاولون يفكون يدي عنه.. وبعد جهد قدروا ياخذونه من بين يديني بعد ما بين اثر ضغطي على جسمه وانا منهار وفي حال مايعلم فيها الا الله سبحانه كل لحظه انادي باسمه .. جابوا لي كرسي وقعدوني عليه وانا كني معهم ومو معهم .. واحد من اخواله شيخ كبير من الناس اللي فيه خير وصلاح والله هاديهم قعد يمسح على راسي وصدري ويقرى علي قران لين هدت نفسيتي شوي ناظرت فيه .. خالد صدق راح ياخال؟!.. شد على يدي وهز راسه ورجعت دموعي ويديني على راسي وانا اهز على الكرسي .. ما يصير يا خال والله ما يصير .. قعد يستغفر وانا على حالي كنت مفجوع الله لا يفجعكم في حيب... رحنا نصلي عليه كان المسجد مليان واللي برى اكثر من اللي داخل كان الله يرحمه رغم صغر سنه انسان محبوب من الجميع صغار وكبار وفي المقبره مع الزحمه وكل هالعالم اللي حولي الا اني حسيت بوحده رهيبه كنت بعيد عن الجماعه ما ابي احد يعرفني او حتى يشوفني رغم اني عارف ان الكل يسال عني تلثمت بشماغي ولبست نظارتي الشمسيه ووقفت بعيد عنهم , جاني تركي واللي كان له غلا كبير عند خالد بحكم انه الصغير وكان دايم يقول انه رغم صغرسنه الا انه كان حكيم ويفهم اكبر من عمره بكثير كان عمره تقريبا ذاك الوقت 12 سنه سلم علي وحضنته وانا احاول اتماسك قدامه ولكم ان تتصورون مقدار صعوبه الامر خاصه انه يشبه خالد كثير قال لي : بندر خالد كان يعزك اكثر من أي واحد في هالمكان وكلهم مجتمعين حوله الا انت !!لا تتخلى عنه في هاللحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من احزانك بهربك من هالموقف ..كانت كلمات عظيمه اثرت فيني وشفت في هالطفل اللي فقد اخوه في حادث مفجع الصبر بمعناه الحقيقي , لميته لصدري مرة ثانيه وكنا نواسي بعض بخسارتنا الكبيرة مسكت يده وتوجهنا لهم .. استعدوا للدفن وسمعت اخوانه ينادوني .. قلت لهم اني انا اللي بنزل فالقبر واحطه ونزل معي واحد من اخوانه يساعدني .. سلمونا اياه من فوق وحطيته وانا ادعي له واذكر الله طول الوقت كان ودي لو اجلس معه اوحتى اشوفه واسمع صوته لاخر مرة لكن عرفت ان شمسي غابت خالد ((الرمت))غاب من حياتي وهالحياه للابد...
(9)
بعد وفاته رجعت ذاك الطفل الكتوم المنطوي على نفسه .. انا تركت قلبي معه لما تهاوشنا ولما راح راح قلبي معه ابتعدت عن الناس والعالم فتره طويله كنت فاقده بشكل خيالي واللي يحز في خاطري اكثر لما اتذكر انه توفى واحنا بعيدين عن بعض يعني 16 سنه عمرنا ما تفارقنا وقبل اقل من شهر على وفاته نتهاوش !!!! اللهم لا اعتراض راضي بقسمتك وحكمك يارب لكن املي فيه انه كان فاهمني وعارف اني ما اقدر استحمل زعله وقلبي ما يشيل عليه واني زي ما قال مهما حاولت اكابر وانساه مصيري ارجع له . .بعد عده اسابيع على وفاته عطاني طلال دفتر وقال : هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك لما شفت الدفتر تذكرته على طول كنا يوم انا واياه في المكتبه بنشتري كتب للجامعه وشاف الدفتر وعجبه وقلت له هذا ما يصلح للمحاضرات ياعمي قال عارف بس تدري وش باستخدمه فيه ؟! بكتب فيه مذكرات لكن مو أي شي الاحداث المهمه في حياتي بس, اذكر اني ضحكت عليه من قلب وقلت له انت من جدك ؟!! والله ما تصلح لك هالحركات ونسيت الموضوع بعد كذا فتحت الدفتر وكان مكتوب بالصفحه الاولى :
بالرغم من اني اعتقدت ان اليوم الذي ستملىء به هذه الصفحات لن ياتي ابدا الا انه اتضح لي عكس ذلك . وعدت يوما اني لن اكتب به غير احداث مهمة من حياتي .. احاث تستحق الكتابه وقد جاء هذا اليوم بالفعل .. فاليوم اخطات في حق صديق عمري ورفيق طفولتي . بعد هاذي الكلمات القليله بعددها والكبيرة بمعناها في قلبي لقيت بعض ابيات الشعر :
بندر حرك ضميرك واعترف اني وفيت سيرة النكران هاذي فضها واذكر غلاي
اعترف بسك تكابر منت واصل ما بغيت ريح عنادك وخلنا انتفاهم باللي جاي
لاتحاول تمتحني ما خذيت ؟!الا خذيت قلبي الغالي بلاش وما تركت الا شقاي
صح في لعبة غيابك زاد شوقي وابتليت بس لا تظلم تراني ما صبرت الا برضاي
ما دريت ان المحبه قاسيه لكن دريت خطوه المليون جرح وافقت دربي وخطاي
كم تذكرت الليالي وانت ياخلي نسيت ومن تناسى صدق ذاته ويش اقول الله معاي
يابني ادم تلاحق خاطري لامن طريت خلك الطيب وحاول تكسب الوقت بوفاي
لا تخليها معاند ان قويت لو ما قويت القوي الله ((ياعمي)) وانت تدري عن مداي
وبعد كذا انهى كتاباته بها البيت :
خسرت ولاربحت الاقليل من الصبر وجراحه ربحت بندر وان خسرت العمر عسى تحييني اوراقي
وهذا كان اللي مكتوب بكل هالدفتر بس الفتر عنده قبل اكثر من اربع سنين وهذا اللي مكتوب فيه ولا شي اعتبره مهم في حياته الا هوشتنا ما ادري اذا كان حاس بموته من قبل والا البيت جا كذا المهم لميت الدفتر لصدري وقعدت ادعي له. كنت اقعد مع طلال بعض الايام ومره قال لي ان في اخر سفره لخالد مع اهله واللي ماراح معهم طلال فيها قال له : ماوصيك على بندر ياخوي لا تخليه يحس اني مو موجود خلك حوله دوم .. كمل كلامه وانا مدموعي اللي اتعبتني ... ادري انه مافي شيء يخليك متحس انه مو موجود مثل ما قال وما في شيء يعوضك اوحتى يعوضنا بسترانا كلنا حولك حتى ابوي يسال عنك دايم... رديت وانا اغالب الدموع وافكر في حال اهله من بعده ... ما تقصرون .. حاولت اشكي له شوي يمكن اخفف من هالالم الفظيع اللي احس به .. والله انه ما عاد لي قلب يا خالد ---- ..يوم حسيت اني غلطت بالاسم خلاص انهمرت وفضحتني دموعي ... رجعت للبيت وبعد فتره دخلت ريم علي تحاول تواسيني وتطلعني من دوامه الحزن اللي انا فيها .. بندر يا اخوي كل شوي والله اني خايفه عليك .. كانت جايبه عشاء لكني صديت عن الاكل .. طلبتك ياريم والله ما اشتهي شي.. هزت راسها .. ياخوي فضفض وطلع اللي في قلبك انا اختك وحاسه فيك ما يصير تكتم كل هالالم في قلبك .. رفعت راسي .. وشلون تبيني اتكلم ياريوم الوحيد اللي قدرت اشكي له في يوم راح وخلاني خالد راح ياريوم وتركني في هالدنيا لحالي ... استغفر ربك يا بندر هالكلام ما يطلع من واحد مثلك انت انسان مؤمن وتعرف الله وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا .. امتلت عيوني بالدموع زي كل مره اسمع فيها اسمه وانا احاول اخفيها عنها .. مسكت يدي .. لا تحاول تخفي دموعك ياخوي طلع اللي في قلبك اللي فقدته مو شوي , انا ياخوي جايه اقول لك ترانا كلنا معاك وحولك في أي وقت تحتاجنا فيه .. ياريم انا شفت الدنيا على يده لكنه ما علمني اعيشها بدونه , انا خسرت القلب الكبير , من بعده صرت اشوف كل شيء حزين , الدنيا ياريم ما عاد لها طعم بدونه , ليت الزمن يرجع و----ضغطت ريم على يدي .. لا تعذب روحك ياخوي كلمه ياليت ما تنفع وهذا قدر الله ...
ورغم مرور السنوات على وفاته الا اني عمري ما نسيته او حتى راح من بالي عايش داخلي دايم وادعي له بالرحمه والمغفره كل الاوقات , رحت للعمره ادور الراحه النفسيه بالقرب من الله تذكرت وانا اطوف لما اعتمرت انا والشباب العام الماضي قسمنا نفسنا عشان الزحمه كان خالد ماسك يدي ويمشي فيني بين الناس وانا اقرى من كتاب الادعيه وهو يامن , واما رحت اشرب من زمزم تذكرته شكله وهويصب المويه على راسه وجسمه كنه في بيته واحنا نقوله ترى وراك سعي مارح تعرف تمشي واحرامك مليان مويه ويرد"واذا صار ؟!! والله ما عندكم سالفه هاذي بركه يالله سوومثلي بلا دلع "وفي السعي لما شفت العربات تذكرته لما كنت اجره بالموت عشان ما يوقف وهو ياشر على العربات " الله يخليك خلنا نقعد شوي خلاص يابندر رجلي ما تشيلني خلنا نرتاح شوي والا شرايك نستاجر عربه وانت تدفني ؟!" وانااهاوشه على كلامه واجره بالقوة ..خالد تراك اذيتني قسم بالله البزران ما يسوون مثلك .. ولما جينا نتحلل كلنا قصرنا شعورنا الاهو حلق شعره كله كنت دايم في أي عمره اقصر شعري لكن هامره حلقت .. واخيرا لما رجعت حافي للفندق زي ما كان يسوي خالد تذكرت لما خليناه ينام على الارض فالغرفه وشكله وهو يهمز رجله بعد تعب العمره وهو يتافف : ياسلام عليكم بتنوموني على الارض هالسنه بعد؟؟ترى ما بيني وبينكم الاشهور حرام عليكم مو كل مره بندر وسامي ياخذون الاسره في هالغرفه المفروض يصير فيه تناوب !! فالغرفه الثانيه يتناوبون مو انتم يالظالمين .. بس محد عطاه وجه ولما قام الصبح كان يشتكي من ظهره وانا اضحك على طريقه مشيته .. امش زين لا تنصب والعمره الجايه انشاء الله بتنام عالارض بعد رد علي .. هين يا بنيدر ان ما خليتك انت تنام على الارض انا مب خالد .. سبحان الله دنيا دواره .. هالسنه اعتمرت لحالي ونمت عالارض وتركت الاسره فاضيه ولما قمت الصبح وحسيت ان ظهري يوجعني ابتسمت بحزن استقبلت القبله وقعدت ادعي بحراره ودموعي تنهمر .. يارب اغفر له تراي احبه فيك , ياربي ارحمه وبرد علي وامسح على قلبي واجمعني فيه .. كانت هالعمره الله يتقبلها لخالد..
(الاخير)
اقترح علي شيخ فاضل من اهلنا اني احفر له بير في وحده من الدول الافريقيه الفقيره واسميه باسمه الله يرحمه عشان ارتاح بعد وعلمني عن الاجر الكبير اللي بيجيه انشاالله وفعلا سويت هالشي كنت تعبان من جد اشوفه في كل الوجيه واسمع صوته في كل الاصوات وذكرى اخر يوم شفته فيها ما تفارقني ابد...
في عيون الناس اشوف شياء كثيره بعضهم يذكروني دايم ان خسارتي مو بسيطه وبعضهم وحشتهم شوفتنا مع بعض وهذا يتعبني زياده.. واللي يصعب الوضع على بعد اني وين ما التفت القى ذكرياته ماليه حياتي , اثاث غرفتي اللي اخترناه سوى لما انتقلنا لبيتنا , سيارتي اللي اختار لونها وساقها قبلي وعطره اللي للحين في درجها!!!ياغلاة اللي راح... لكن كل ما تذكر ان ذاك الانسان كان صديقي ورفيقي القريب في يوم من الايام افرح وابتسم واعرف ان الله يحبني اللي رزقني باخ مثله والله يعوض عليه شبابه في الجنه انشاء الله واذا كنتم تقدرون تناظرون في عيون ربعكم اليوم وتسمعون حسهم في هالدنيا احمدوا ربكم على هالنعمه وحطوهم على راسكم دوم خاصه الناس اللي يستاهلون صدق واعرفوا انكم محظوظين لان غيركم ما يملك ولا بعض اللي عندكم اما بالنسبه لي ما بعد خالد احد والله يجمعني فيه بالجنه انشاالله ..
انا عرضت قصتي على الناس عشان تاخذ منها عبره وفاته شي مقدر ومكتوب لكني ابتعدت عنه في اخر شهر له في حياته بسبب تافه جدا متخيلين قمه القهر والالم؟!! هو غلط رحمه الله عليه وانا عاندت لكن اللي صار بيننا ما كان يستاهل اللي سوينا وهذا اللي دايم يسونه الناس يخسرون احبابهم وربعهم باسباب تافهه يتركون الشيطان يلعب في عقولهم لين تكبر السالفه ويفترقون ولو سالهم احد عن السبب يلقون ان ما عندهم اجابه واضحه وهم ما يدرون ان الاشخاص اللي يحبونهم يمكن يروحون فجاه يا ناس انا استنيت لين صار صديقي ذكرى تبون تستنون مثلي ؟؟!!... فالنهايه اطلب من كل واحد يقرى قصتي يدعي لخالدبالرحمه و يدعي لي انا الله يمسح الحزن اللي عايش فيني كل هالسنين و النصيحة من قلب ذاق مرارة الفراق" الانسان اللي تحبه و تغليه رح اليوم و قله هالكلام خله يدري تستنى يمكن ما تلتقيه بعدين الامثل مالاقيت خالد,وشي ثاني مهم لاتنتظر انك تفقد انسان غالي
عشان تعرف قيمته و قدره عندك"
ختاما...
الى الفقيد الغالي,الانسان اللي علمني كيف احب الناس والحياه, الانسان اللي نسى سعادته عشان يسعد غيره, صاحب القلب الكبيرالمليان بحب الخير لكل الناس , اللي تعلمت منه الكثير وافادني في حياتي ولا زلت استفيد , استفيد الانسان اللي كان غير الناس اللي قابلتهم في حياتي واعرف انه زي ماكان اول صديق بيكون اخر صديق لان مافي مثله في هالدنيا احد.. "صديقي الوحيد" خالد العبد العزيز الله العالم بحالتي بعدك يالغالي ياليتك هنا عندي , ما راح انساك يارفيقي هو في احد يقدر ينسى مثلك؟! ليتك قبل مارحت علمتني وين القى انسان زيك !!متاكد انك تدري اني دايم شاري ما ابيع وتقبل اسفي البالغ على كل اللي صار مني .. الوداع...
قبل لاانهي القصه اذا كنت تقرى قصتي وكان بينك وبين من تحبه مشكله وكنتوا بعاد عن بعض ارسله قصتي وارفقها باعتذار بسيط دام عندك فرصه الحين ..
*واخالداه*
واخالده وصج الجرح في كبدي فسرت بالجرح ..لا انوي على احد يبكون منك _وقد ناحوا _على ولد اما انا فبكائي حرقه ((الرمت))
يطوف وجهك في روحي فاساله " بالله ! قل لي اهذي فرقة الابد؟"
واخالداه ! يغص الشعر من الم كما تذوب عيون الشوق من سهد
ويخطر الموت فوق البيد عاصفة " من الدموع... فنادوا الصبر ايا اهلي غبت في الامس ..على الامس يسعفني اذا افقت ولم ابصرك صبح غد
فلحت لي وجدار الموت منتصب حتى لاوشك شوقا ان امد يدي !! اين بسمتك الحسناء؟ هل سقطت شمس النهار على ليل من الكمد؟
واخالداه ! وعاد الناس... وانصرفوا وانت في القبر .. لم تبرح.. ولم تعد تبارك الله ! نجري كلنا زمرا نحو المنون ولا يبقى سوى الصمد.
تمت
16 Nov 2007, 11:02 PM
قصه عمر اتمنى الكل يقراها
العرض العادي
المواضيع المتشابهه
