في غرفة نور
نور : انا ماني موافقه
بشاير بصدمه : نعم !!
نور وبعيون مليانه الكثير : ......
بشاير : انت من صجج تحجين !! .. مو هالشي كنتي تنطرينه من زمان .. ثلاث سنين من العذاب يانور ماذقيتي فيهم طعم السعاده ويوم وصلت الين عندج تقولين ماني موافقه !! ليش ؟
نور بألم : مابيه
بشاير : نور كلميني بجد شوي
نور : انا ماامزح بهالامور يابشاير .. عبدالله هو سبب التعاسه اللي عشتها طول عمري .. هو سبب كل اللي صارلي
كثر ماكنت احبه .. كثر ماااكرهه الحين
بشاير : لا يانور .. عبدالله مب اهوا السبب هذا النصيب وانتي تدرين انه ابوه هو السبب وبعدين لو اهوا مايبيج جان ماتقدملج بعد هالسنين .. نور عبدالله يحبج مثل ماانتي للحين تحبينه .. كفايه ريحي روحج وريحيه معاج
نور وهي تصيح : مااحبه .. اكرهه مابيه بشاير مابيه
بشاير : جذابه .. انتي بس للحينج معصبه منه وزعلانه عليه ولا انتي للحين تحبينه
نور بكبرياء : لا
بشاير : شوفي انا ماني قايله لهشام انج مو موافقه .. بقوله انج بتفكرين ..
نور باصرار : ...... مراح افكر هذا قراري
بشاير : لاتتاخذين قرار تندمين عليه طول عمرج .. يانور ادري اللي صارلج مو شويه ويمكن لو وحده مكانج ماكانت راح تسامح عبدالله .. بس انتي بعد قدري ظروفه .. حسي فيه خلي كلشي يرد مثل ماكان
نور : ......
بشاير وهي تقرب من نور وتمسك جتوفها : نور .. عبدالله يحبج .. ريحيه !
نور غمضت عيونها وعقب قالت : مابيه
وطلعت من الغرفه وهي تصييح من الخاطر .. ماتدري ليش تبجي ولا تدري ليش ارفضت .. شي داخلها يحن له يقولها هذا حبج يانور .. عبدالله اللي ذقتي المر عشانه ترفضينه !!
بس تحس بالقهر بالغضب .. اكرهك ياعبدالله اكرهك واكره اليوم اللي قلبي حبك فيه .. انت سبب تعاستي كلها

ثلاث ايام وبشاير تحاول في نور بس ماكو فايده .. هالسنين اللي عاشتهم نور كانوا كفيلين بأنهم يخلونها تكره اسمه بس ماتدري ليش فيه شي باعماقها يبيه
بشاير : نور .. اخر كلام عندج ؟
نور : ايه
بشاير : خلص انا بروح ابلغ هشام واهوا يقول لعمي بوراشد .. بس هذا انا اقولها لج انتي اللي بتندمين

صوت من الصاله تحت : نـــــــــــــــــــــــور .. نــــــــــــور !!
بشاير : هذا مو هشام ؟
نور : بلى .. ليش يصارخ ؟
بشاير : ماادري قومي نور ..
ونزلوا تحت لوين ماكان هشام واقف
بشاير ونور بخوف : شفيك ..!!
هشام : ابوي بالمستشفى .. بشور روحي يبي فرح من المدرسه الحين تطلع .. ونور لبسي يله لان امي بروحها بالمستشفى
نور بخوف : ابووي !! شفيه ؟
هشام بضيقه وكلمات بالغصب تطلع : ابوي خسر بالاسهم مليونين دينار وو وتعب شوي ونقلوه المستشفى
نور بصياح : ياويل قلبي على ابوي .. دقايق البس عباتي وايي
هشام والدنيا صاكه فيه : انا انطرج بالسيارة

في المستشفى
نور وهشام وراشد وام راشد
هشام : ها راشد طمنا .. عسى مافي خطورة ؟
راشد بقلب متألم وحروف مغصوصه : .. أأابوي صارت له جلطه بالقلب وهالشي سببله شلل
نور قعدت تصيح وهي حاضنه امها اللي كانت شبهه منهارة
هشام : لا حول ولا قوة الا بالله .. يايما تعوذي من ابليس .. ماينفع البجي اهوا محتاج دعائكم . .راشد خذ امي وردها البيت
ام راشد ودموعها غرقتها : وين تبون تاخذوني .. ابي اشوف ابوراشد .. دخيلك هشام .. راشد .. دخيلكم خلوني اشوفه .. هذا الغالي .. هذا ابوي وامي ودنيتي كلها . .
راشد وقلبه متقطع على امه : يماا الزيارة ممنوعه الحين .. انتي روحي البيت وصليلج ركعتين وادعي ربج يفج هالكربه ويقومه بالسلامه .. الصياح ماينفع
ام راشد تصيح ..
راشد يلتفت لنور : نور الله يهداج انا خابرة قويه .ز نبيج تساعدين امي تقومين انتي تبجين !!
نور تبجي وعقب تقول : هذا ابوي ياراشد .. والله مااقدر .
راشد يقرب منها : نور دخيلج هدي امي .. اخذيها وردوا البيت وانا ببلغكم بكل شي ان شالله
نور وهي تمسح دموعها : ان شالله
خذا هشام نور وام راشد ووصلهم البيت عقب رجع المستشفى عند راشد
ام راشد كانت في حاله انهيار وبجي .. بوراشد كان يعني لها كلشي وبيوم وليله يطيح من طوله كانت لها صدمه اما نور فكانت تخفف على امها وهي اللي فيها يكفيها وزياده ..

المستشفى
راشد كان يكلم الدكتور وهشام جنبه
راشد : طيب معناه ان الشلل اللي صارله بالعضلات بس .. !!
الدكتور : نعم دكتور راشد .. ولا تخافون الموضوع يبيله خمس او ست اشهر بالعلاج الطبيعي والتدليك بيمشي
راشد : وفيه أي أثر على عضلات الظهر او العمود الفقري
الدكتور : من حسن الحظ ان الجلطه ماكانت قويه .. وهالشي سببله شلل موضعي في اعضاء الحركه
راشد : طيب وبالنسبه للعلاج متى الوقت اللازم عشان تبتدون فيه ؟
الدكتور : والله يادكتور راشد انت تدري ان العلاج الطبيعي يحتاج اختصاصيين جيدين واذا تبي نصيحه دكتور .. انا انصحك بدكتور الماني شاطر .. تقدر تكلمه
راشد : ومتى لازم نبدى العلاج ؟
الدكتور : بعد اسبوع ان شالله
راشد : خلص بهاالاسبوع خلنا ندق على الدكتور ونشوفه اذا موجود بالمانيا عشان احجز على اول طيارة
الدكتور : مثل ماتريد دكتور راشد .. والحين تقدر تروح لان الوالد تحت العنايه وبس يقوم بنعطيك خبر
راشد : ان شالله .. مااوصيك دكتور رائد ..
الدكتور : افاا عليك .. الوالد في ايدي امينه لاتحاتي

طلع راشد وكان شبهه مشتت .. ابوه في يوم وليله طاح من طوله .. ابوه اللي طول عمره بهيبته يشوفه الحين طريح الفراش لا يقدر يتحرك لا يتكلم .. والله دنيا !! الحمدلله على كل حال
في السيارة
هشام : راشد .. شنو قالك الدكتور ؟
راشد وهي يتنهد : مثل ماسمعت ؟
هشام : يعني ماكو فايده ؟
راشد : احمد ربك ياهشام .. صحيح اللي ابوي صارله مب شوي .. لكن الحمدلله انه الشلل اصاب العضلات والجلطه ماكانت قويه .. ولا ماكان فيه امل تشوف ابوي يوقف على ريوله
هشام :الحمدلله على كل حال .. تعتقد ابوي بيمشي مرة ثانيه !!
راشد : ان شالله .. بس نحتاج شويه صبر ووقت .. والباجي على رب العالمين
هشام : خلص يعني بنسافر المانيا ؟
راشد : انا اللي بسافر معاه .. انتا بتم هني البيت ميصير من غير ريال ..
هشام : وامي ؟
راشد : امي بحاول نقنعها انها ماتيي
هشام : وانتاصاج .. امي بروحها تعبانه وريولها ماتتحمل وبعدين انتا تدري شكثر فرح متعلقه فيها ماتقدر تهدها ولا تروح معاها وهي عندها مدارس
راشد : صح .. عشان جذي انا قلت امي تقعد .. بس ان شالله توافق
هشام : وبتروح بروحك ؟
راشد : ايه
هشام : طيب خذ معك نور ؟
راشد : نور عندها دوام .. وليش اخذها ؟
هشام : راشد انتا ماتقدر بروحك ..وابوي محتاج عنايه .. خلها تاخذ اجازة ولو من غير راتب
راشد : صح كلامك ..
هشام : والله مليونين مو شوي .. هذي صدمه كبيرة
يرن تلفون راشد ..

المتصل ابوخالد
راشد : هذا عمي .. اكيد درى بالسالفه
راشد : هلا عمي
ابوخالد : شسالفه ياراشد .. شفيه ابوك !! عسى ماشر ؟
راشد : ماشر ياعمي لاتخاف .. بس !
ابوخالد : شسالفه تكلم ياراشد .. تراك خوفتني
راشد مو عارف شلون يقول لعمه الموضوع مب بهالسهوله
ابوخالد : طيب هو باي مستشفى .. انا يايكم مع خالد الحين
راشد : لا لا ياعمي مافي داعي احنا تونا طالعين من المستشفى .. ومافيه الا العافيه
ابوخالد : يعني اهوا طلع من المستشفى ؟
راشد : هاا .. لا بيتم جم يوم عشان الفحوصات ..
ابوخالد : زين ومتى وقت الزيارة ؟
راشد : باجر ان شالله انا بمرك وبتشوفه ياعمي
بوخالد اللي كان متخوف على اخوه وحاس انه فيه شي : طيب ياراشد .. طمني شنو يصير ها !!
راشد : طيب ان شالله .. مع السلامه
بوخالد : فمان الله

هشام : ليش ماقلته رشود .. الحين بيحاتي حرام ؟
راشد : والله بغيت اقوله .. بس مااعرفت شلون هشوم .. الموضوع مو سهل والله
يرن تلفون هشام . .المتصل خالد
هشام : شفت هذا خالد دق اكيد حاسين انه في شي
هشام : الو .. هلا خالد
خالد : ها هشوم .. شسالفه شفيه عمي ؟
هشام : والله ماادري شقولك ..
خالد : قول عسى ماشر ؟
هشام بضيقه : جلطه ياخالد
خالد بصدمه : لا حول ولا قوة الا بالله .. شنهو السبب عاد ؟
هشام : خسرنا بصفقه الاسهم مليونين دينار وهالشي سببله جلطه في القلب بس ربك ستر
خالد : والحين وضعه شلون ؟
هشام : هالاسبوع يبين راح نحجز على اول طيارة لالمانيا وبيروح راشد معاه وان شالله خير
خالد : مايشوف شر عمي .. مايستاهل بس هذا شي مكتوب وربي يقومه بالسلامه
هشام بنبره تعور القلب : ان شالله يارب
خالد : لاتضيق خلقك هشوم .. ازمه وتعدي ان شالله .. كله اجر عند الله
هشام بضيق : هذا ابوي ياخالد .. تخيل ابوك تشوفه طايح لا يتحجى ولا يتحرك .. شنو يصير فيك ؟.
خالد : والله داري .. ترى مثل ماهو ابوك .. هو ابوي انا بعد .. بس مالازم نيأس من رحمه الله .. ادعوله وربي بيفرجها ان شالله
هشام : ان شالله .. خلود دخيلك انت قول لعمي مو عارفين شلون نقوله
خالد : خلص انا ببلغه لا تحاتون .. طمنونا اول بأول .. بعد الصلاه بييك الديوانيه
هشام : ناطرك .. يله مع السلامه
خالد : الله وياك

راشد يلتفت لهشام : هشوم .. ماني خابرتك ضعيف جذي !!
هشام : ماادري اول مرة احس اني احب ابوي
راشد يبتسم : هذا ابونا ياهشام .. شفيك !!
هشام بنبرة ضيق : ودي اسوي أي شي عشان يرد يمشي ..
راشد وهو يناظر الفراغ : الله يسمع منك

في بيت بوراشد
الوضع متأزم .. والكل قاعد على اعصابه .. راشد حاط التلفون يمه ينطر أي اتصال من الدكتور رائد اما ام راشد قعدت تصلي وتدعي ربها ونور وهشام وبشاير بالصاله وفرح اللي ماخبروها بشي قاعده تكتب واجبات المدرسه
فرح : نور تعالي شوفي هالمسأله .. والله ابلتنا ماشرحتها زين !!
نور وبالها وفكرها مو معاها : زين عطيني أي وحده ؟
فرح : السؤال الثاني ..مال المثلثات
نور تحاول تركز بس موقادرة : يي يافرح ماادري .. خلص خليها اشرحها لج بعدين
فرح : انتو شفيكم !! بسم الله مو عادتكم ساكتين
هشام : فروحه سكتي واللي عافيج
فرح بزعل : زين لا تزف
شالت كتبها وراحت غرفتها تكمل باجي شغلها
تلفون راشد يرن
راشد : هلا دكتور وائل
الدكتور : بغيت اخبرك اني دقيت على مستشفى ميونخ وسألت عن الدكتور هايزن وخبروني انه الحين في مستشفى السعودي واخذت منهم رقمه ...
راشد : طيب
الدكتور : انا كلمته وخبرته عن حاله الوالد وقالي انه بيكون في السعوديه لمده سنه عنده دورة هناك .. وتقدرون تدزون الوالد الحين واهوا بشرف على الحاله بنفسه
راشد : طيب عطني اسم المستشفى
وعطاه الدكتور اسم المستشفى
راشد : والله ماادري شلون اشكرك تعبتك معاي دكتور رائد
الدكتور : هذا واجبنا .. واذا مو عشان الصداقه ترى هالشي واجب مهني ولا نسيت
راشد : تسلم . . وانت سويت الواجب واكثر والله .. نقدر نزوره الحين ؟
الدكتور : انا افضل تيون باجر لانه الحين اهوا تعبان حيل
راشد باسف : خلص مثل ماتشوف
الدكتور : طيب دكتور ..لاتحاتون الله كريم ان شالله
راشد : ان شالله .. شاكرلك مرة ثانيه .. مع السلامه
سكر راشد من هشام وخبره باللي قاله الدكتور
هشام : زين ليش ماتسأل عبدالله اهوا للحين بالكويت .. اعتقد باجر بيسافر !
راشد : أي والله .. ماادري وين هالمستشفى .. !!
هشام : لحظة ادق عليه
ويدق هشام على عبدالله

عبدالله .. هذا هشام يارب داق عشان موافقه نور : هلا وغلا
هشام : هلا حبيبي شلونك !
عبدالله : بخير .. عسى ماشر وش فيه صوتك !!
هشام : والله .. ابوي تعب علينا ووديناه المستشفى
عبدالله : لا تقول .. مايشوف شر ان شالله .. لا حول ولا قوة الا بالله .. والحين هو كيفه !!
هشام : ماادري شقولك .. الله كريم هذا راشد يبي يكلمك .. بيسألك عن مستشفى عندكم بالسعوديه قايلين فيه دكتور شاطر
عبدالله : طيب
ويكلمه راشد
راشد : يعني تعرف المستشفى ؟
عبدالله : ايه اهو في المنطقه الشرقيه .. عندنا وصحيح هالمستشفى تخصصي والدكاترة اللي فيه جيدين
راشد : زين عيل طمنتني
عبدالله : طيب ومتى بتسافرون ؟
راشد : الدكتور قالنا يبتدي العلاج بعد اسبوع يعني اذا نروح بعد ثلاث ايام جذي زين
عبدالله : اجل خلص .. لاتحاتي شي ياراشد
راشد : لا افاا عليك .. خيرك سابج
عبدالله : لا تقولي ولا اقولك .. شوف التذاكر اليوم تكون عندك والسكن بيتكم الثاني موجود بالدمام طيب !!
راشد : من صجك عبدالله ..!! لا جذي وايد حنا اخوان واهل صحيح بس هذا وايد
عبدالله : لا واجد ولا شي .. لاتخليني ازعل منك ..
راشد : لا عبدالله متقصر حبيبي بس لان اختي بتكون معانا فنحتاج سكن ولا فندق
عبدالله من سمع هالخبر اعتفس : ها .. طيب خلص على راحتك والله حبينا تنورن البيت بجيتكم
راشد : تسلم حبيبي هذا من اصلك الطيب .. حنا بس نبيك تدلينا المستشفى
عبدالله : خلص انا مسافر بعد كم يوم .. اخلي حجزي معاكم واوصلكم الين المستشفى ان شالله
راشد : والله ماادري شقولك عبدالله .. خجلتني
عبدالله : ازعل منك راشد . حنا اهل لا تقول كذا
راشد: هذا العشم فيك .. انا اخبرك بحجزنا اليوم ان شالله
عبدالله: على خير حبيبي .. ومايشوف شر بوراشد
راشد : الشر ماييك ان شالله .. فمان الله
عبدالله : فمان الله

سكر عبدالله من راشد وهو مب عارف وش بيسوي .. تضايق عشان بوراشد وتضايق بعد لانه ماعرف للحين راي نور .. كلشي بيتوقف الين مابوراشد يقوم بالسلامه
بس معليه بكون انا معاك يانور .. بمكان واحد .. يالله هالشي يكفيني وبيصبرني ..

بعد يومين
بيت بوراشد
راشد : يما انتي ماتقدرين تيين معانا .. شوفي شلون تتعبين كل يومين وبعدين نسيتي فرح !! منو بتم عنده
ام راشد وهي معصبه : مستحيل .. تبيني اخلي بوراشد بهالحاله واتم انا بالكويت !! شنو تقول ياراشد
راشد : يما .. فهميني انتي ماتقدرين .. وصدقيني بس تتحسن حاله ابوي راح نكمل علاجه بالكويت
ام راشد وهي تصيح : حرام عليكم .. هذا بوراشد .. شلون تبوني اخليه وهو محتاجلي
راشد بشويش : يماا . واحنا وين رحنا انا ونور بنكون معاه
ام راشد سكتت .. كلام راشد كله صح اهي ريولها ماتساعدها على التعب والسفر وفرح ماتقدر تخليها !!
ام راشد : زين بس اول يومين تدزولي اييكم
راشد يوافقها عشان تقتنع : ان شالله

موعد السفر
في الطيارة
راشد ونور ابو راشد طبعها مع ستاف طبي
عبدالله وموضي الصغيرة في درجه رجال الاعمال
راشد : هلا عبدالله شلونك .. ها متى وصلتو ؟
عبدالله : تونا دخلنا .. تأخرنا تدري سارة تبي تدز اغراض لابوي وفراس يوو ابلشتنا
راشد يبتسم : يحليلها ..
عبدالله : خبرني شلون الوالد .. اخباره ؟
راشد : الحمدلله احسن .. الحين يعرفنا انا ونور ويتحجى بس بشويش يبيله فتره
عبدالله وعيونه تدور نور .. لقى بنت قاعده جنب سرير ابوراشد لابسه عباه وشيله .. ووجه كان واحشه ثلاث سنين بحالها .. ياه يانور .. ماتغير فيك شي .. الا حلويتي زياده .. نفس الوجه الطفولي الجذاب اللي احبه موت .. نفس العيون اللي عذبتني طول هالسنين .. بس من غير ابتسامه .. ياليت اقدر انزع هاله الحزن عن هالوجه القمر يانور القمر
راشد : ها وين قاعد انت ؟
عبدالله : حنا بالاين اللي قدامكم ..
وحط عيونه بعيون نور اللي كانت تخبي اشيا جهلها وماعرف أي تفسير لها .. ومسرع ماشاحت بعيونها عنه ولهت باي شي حوالينها
موضي وهي جنب ابوها : بابا ابغى اروح عند خاله نور !!
راشد بابتسامه : يحليلها لاتقولي هذي بنتك ؟
عبدالله : ههه ايه
راشد : هههه تعرف نور !!
عبدالله بقلبه .. وتحبها زي مايحبها ابوها واكثر : ايه خذتهم مرة المركز العلمي وابلشتني من ذاك اليوم
راشد بشويش : ترى موضوعك تأجل .. تدري اللي صار لابوي .. يعني الوضع مايسمح حاليا
عبدالله : لا تقول كذا ياراشد.. الله يقوم الوالد بالسلامه .. وان شالله مايصير الا اللي يبيه ربك
راشد بقلبه .. والله انك خوش ريال ياعبدالله : ان شالله
موضي وهي تهز دشداشه عبدالله : بابا .. معليه اروح !!
عبدالله يحط عينه بعين نور مرة ثانيه : مدري والله .. خلي خاله نور ابوها تعبان
موضي باصرار وهي مب فاهمه : بابا !!
راشد : خلها تروح .. تعالي حبيبي
وتركض موضي لنور اللي من شافتها وهي تبوس فيها وتلاعبها وتمت طول الوقت معاها
عبدالله يشوف هالثنتين ويقول بقلبه .. لو ادري ان موضي بتخليني اشوف هالابتسامه اللي وحشتني .. كان من زمان جبتها لك ... متى بس اشوف هالابتسامه عندي بالبيت .. ولي انا !!
دخيلك يانور لاتخيبين ظني .. انتي السعاده اللي ابيها .. دخليلك خليني اعيش بسعاده ولو لحظات من عمري

قعد على الكرسي وسند راسه وهو تعبان منهد حيله .. يحس بنغزه بصدره وتوجعه بقوه
تذكر نور .. تذكر وجهها وضحكتها .. تذكر ان موضي بعد شوي بتجي وبتحمل شي من عطرها وبقاياه بيدينها
وتمت صورتها في باله مافارقته ولا دقيقه

وترحل تحسبني لارحلت اقدر على النسيان !
وانا اللي لاطرا طاري رحيلك ضعت بشتاتي

دخيلك ،،بسألك لارحت منهو فيننا الخسران
أنا والاّ انت ؟،،جاوب قبل ماتكتب بي آهاتي

أنا اللي من عرفتك والسما قوس ، وغلاك الوان
وأرضي تعزف اهزوجة فرح لاجتْك خطواتي

وصوتك غيمة ٍ أحيت جفافي ، والوصل هتّان
وحزن عمري يموت بضحكتك ياكل بسماتي

تعرف انك غلاي وراحتي ، وان التعب لابان
يموت ان جيتلك ياللي هواك اجمل حكاياتي

وتعرف اني على بساط انتظاري أجمع الأحزان
واكبّلها اذا وصلك اخذني من متاهاتي

انا من قبل اعرفك مالقيت لهالعمر عنوان
سوى : حزن وأمل ضايع ،ويأسي هو مداراتي

أنا من قبل اعرفك كنت اقول ان الغلا حقران
واقول ان الهوى كذبه ،،قناعاتي كما الآتي :

قليل اللي صدق ،،واللي يخون بهالزمن كسبان
كثير اللي يمرون ،،وقِناعاتي قناعاتي

وجيت انت وعرفت اني بحكمي كنت انا الغلطان
وصرت انت القناعات ،،وحنيني إتجاهاتي

دخيلك ،،مابقى فيني شعور ٍ يحتمل خذلان
دخيلك لاتخليني أسير ليأس راياتي

أنا مدري عن اللي لي تشيل بداخل الوجدان
شعور بحب ،أو رغبة تشمّت بانكساراتي

وكل اللي ابي تعرف: انا مااقدر على النسيان
لأني جيت لك كلي ،،وصعب آعيش بشتاتي