سبع ساعات اسولف وأتكلم واستخف دمي
وهي تسمعني وتضحك ومبسوطة على الآخر

سبع ساعات اعلمها عن إحزاني وعن همي
واسولف عن حكايا طفل كان وصار هالـ شاعر

سبع ساعات تتساقط حروف الصدق من فمّي
على صحرا مسامعها سحاب العشق متناثر

سبع ساعات وتحلف لي برأس العشق وتسمي
تقول أنت الوحيد اللي ملكني حبك الساحر

سبع ساعات ونادتني باسم ما هو باسمي
تناديني فهد واسمي أنا ياللاسف جابر

تشنج كل شيٍ كان حولي ومسمعي يدمي
ركز خنجر فهد في مسمعي من صوتها الخادر

تخدّر فكري وجسمي وذاب بداخلي عظمي
وصرت اسمع صدى صوتٍ يردد غلطة الشاطر

يردد غلطة الشاطر بعشرة واقعي وحلمي
وترددها زوايا غرفتي والواقع الغادر

كثير أصوات شقت جلدي اللي يحتضن عظمي
وصراخ الباب والدولاب والشباك والساتر

وونات القلم والدفتر اللي يلتفت يمي
وخايف وش ابي اكتب بوسطه من هنا لـ باكر

وكانت ساكته وصوت النفس من خشمها و خشمي
ربع ساعه وبحة صوت قالت: خير وش صاير

وطرا في بالي عبدالله وخالد واحمد ونشمي
ولآخرهم فهد تسعه وانا مدموغه العاشر

وقلت ابداً مغير الخير ولكن امسحي رقمي
اكيد انه فهد جالس سبع ساعات وهو ناطر

وقالت لي: رجاءً او اقولك.. طير ياعمي
مسوي حضرتك في هالزمان العاشق الطاهر

وقالت لي: اقول! وقلت: انا بقول وذا علمي
عجب هالناس وش هالناس تخطي وبالخطى تكابر

انا يابنت بنثر لك حياتي واجمعي لمّي
بعضه بنثره في مسمعك هالحين ومن خاطر

ترا عمري انا تسعه وعشرين وكذا رسمي
ولكن عشت ايامي دبلها مقبل وعابر

اصيل وكل اصيلٍ مايبي مدحي ولا ذمي
وسبع انعام في هالناس اخص الحامد الشاكر

انا من نجد وربعي هم "عتيـــبه" وخالي الدحمي
"وبرقـــا" هم لحمي ودمي وانا من"روق" ومع ناصر

انا جابر ولد محمد وسلم الطيب هو سلمي
ابوي اللي مربيني على الجزلات واتفاخر

انا راعي مجاهيمٍ يشع بفخذها وسمي
وراعي خيل وراعي بير وبيتٍ مبغضه كافر

على الرمضى ابت رجلي بأرضٍ عاشقه ضمي
وشمسٍ تشرق وتوقف على راسي وانا صابر

عرق وجهي يصب وامسحه بشماغي وكمي
وألد عيوني عن ناسٍ سرقني يمها الناظر

وانا شاعر ولو اكتب عجز كل فكر في نظمي
ولاني بالغرور احكي ولكن واثق وقادر

وانا رجال هاوي للقمم ويقودني عزمي
وابي ارقى على راس الجبل وانتي مع الحادر

عرفتي ليه انا طاهر؟ لانك همي وغمي
ولان الدنيا في عيني جبل نرقاه ونغامر

يابنت الناس شفتي كيف بليّا سلاح مانرمي
ولانوقف بوجه البندق المليان ونخاطر

خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر

وقالت لي فمان الله شعلت النار في جسمي
فمان الله يالطاهر ومثلك قله ونادر


منقول للامانه



بانتظار ارائكم

صباح الخير
هديل

شكرا لك على الخاطرة الجميلة

اعجبتني سلمت يداك

الله يوفقك في الدنيا والاخرة

قولي امين
اخوك
امير النهار

يسلمووووو اخوي على المرور


امييييين يارب ويوفق الجميع

ويييييييييين الردووود؟؟؟؟؟

من جد زعلتوني منكم

عرفتي ليه انا طاهر؟ لانك همي وغمي
ولان الدنيا في عيني جبل نرقاه ونغامر

والله انشالله ماتزعلي
صرااحه روعه تسلم يدك اللي نقلتنا هاذي الروعه
الله يعطيكي العافيه
تقبلي مروري

تسلمييييييين يا عسسلـــ " هديل "
ماقصــــرتيـ

لآهــنـتِ
تقبللأِ مروريــ...

وقالت لي فمان الله شعلت النار في جسمي
فمان الله يالطاهر ومثلك قله ونادر

يجننننننننننننننننننن
هدوله اشكرك من الاعماق على نقلك الرائع

يسلمووووو حبيبتي على المرور والاروع تواجدك

معذبه سعبوله يسلمو حبيباتي على المرور

يعطيكم العافيه