أنا والله كنت اغليك حيل واعشقك باصرار
أداري خاطرك ..اخاف تزعل ..وأحسب احسابك


أنا من قبل احبك يالغضي ما اخفي عليك اسرار
أنا كنت افرح لقربك ..واقرّب لأقرب اقرابك


عطيتك قلب عطيتك نبض عطيتك حب واستقرار
أبي قلبك يحس فيني ..انا بعيش واحيابك


أنا من يوم اشوفك أنسى هفواتك لو انها اكثار
عطيتك وقت ..ابيك تحس ..ابيك اتوقّف اعتابك


عجزت افهم قبل لا قسم عطيتك فرصه لتكرار
أبيك اتحس بغيابي ..مثل ما حس بغيابك


تحملتك ودللتك وفضلتك علي امرار
تعبت اصبر ..على مثلك ..تعبت اتحمل العابك


تجي تكتب تجي تعتب تجي ترسلي الأعذار
تبيني أقبل اعذارك ..قبل لا نكشف اكذابك


تبي ترجع لأوقاتك تبيني دوم باستمرار
تبي تلعب على قلبي.. تبي توهمني باعجابك


تبي تعرف تبي تكشف تبي تعزف على الاوتار
تبيني يوم..تبيني دوم ..تبي تأسرني واشقابك


تعبت اصبر تعبت انظر تعبت اكمل المشوار
تعبت ارضى على ظلمك .. محال ارجع وارضا بك


ابد مايرجع الماضي وكل اللي مضي تذكار
خلاص اليوم يكفيني ابطوي صفحة اكتابك