الحق نفسك قبل ما تكون واحد منهم !!

من أجل صحة أفضل · 18 Aug 2008, 10:12 PM

طبعا أكيد بتسأل مين دول اللى ممكن تكون منهم ... صح ؟
- صح

اقول لك ..... دول بقى يا سيدي 10 مليون مصاب بالالتهاب الكبدى الوبائى تسمع عنه ؟
-آه أسمع بس بصراحة معرفش عنه كتير ايه هو بقى ؟

بص يا سيدي
-بصيت

التهاب الكبد ده مرض بيصيب كبد الإنسان نتيجة الإصابة بالفيروس وانت عارف الكبد ده مهم بالنسبة لنا قد ايه

- آه طيب أنا سمعت انهم كذا فيروس
فعلا هم 7 فيروسات A,b,c,d,e,f,g
- بس أن مسمعتش غير عن A,b,c
- ما هى الانواع دى هى اللى منتشرة

- طيب وده خطر يعنى ؟
- طبعا ده ممكن يأدى لتليف الكبد وبالتالى الكبد مش هيقوم بوظايفه ربنا يعافيك ويعافينا

- طيب وهى وظايف الكبد دى مهمة ؟

- طبعا مهمة جدا الكبد ده أكبر مصنع فى جسم الإنسان له حوالى 300 وظيفة ومن غير الكبد حياة الإنسان بتنتهى
شوف انت بقى لما جسمك يفقد 300 وظيفة كان عضو واحد بيأديهم

-طيب انا فى ايدي ايه يعنى ؟
- يا عم سهلة كل الموضوع انك تعمل احتياطك وتتوكل على الله

- طيب اعمل ايه يعنى؟

- جينا للمهم
بكل بساطة تغسل ايدك كويس قبل الاكل وتشرب مية نقية وطبعا بلاش الاكل غير المضمون وكدة انت فى المضمون وفيروس A عمره ما هيجي لك

- طيب وباقى الفيروسات ؟

- بص B و C بيتنقلوا عن طريق الدم لكن برده سهلة
فيروس B تاخد التطعيم بتاعه وتتجنب تلامس اى دم وكمان طبعا مينفعش تستخدم الأدوات الشخصية لغيرك وأى حاجة ممكن توصل لدمك لازم تتأكد من سلامتها

- زي ايه يعنى ؟
-زي امواس الحلاقة وفرش الاسنان والحقن والدبابيس

-طيب هو مفيش تطعيم لفيروس C ؟

- للأسف مفيش فلازم تاخد بالك وتحافظ على نفسك
ومفيش قدامك اختيار لان دى سلامة جسمك
وجسمك أمانه هتتحاسب عليها

ahmad_k2005 · 18 Aug 2008, 10:56 PM

شـكــ وبارك الله فيك ـــرا لك ... لك مني أجمل تحية .

اسرار القلوب1 · 19 Aug 2008, 03:02 AM

اللهم كافينا وعافينا اللهم ياارحم الراحمين ارحمنا وارحم الجميع يارب
شكرا لك يعطيك الف عافيه

الأسد حيدرة · 19 Aug 2008, 03:03 AM

سلمت يداك صديقي
دمت بخير

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري