قصة شايب هواوي مع بنات ..

برق الحيا · 01 Jun 2008, 09:24 PM

بدايه القصه عن شايب هواوي ( قلبه خضر )
ما يشوف بنت الا ينفتن ومشهور بانه حبيب
وفيه بنت ملكعه وصاحبة مقالب قالت في نفسها انا ليه
ما اروح للشايب وامزح معه واضحكه شوي واشوف ردة فعله كيف تكون
راحت له وردت عليه السلام كيف حالك يا شايب رد السلام والله بخير
وفجأه عطته ظهرها ومشت ولا استإذان ولا شي ....
ولع الشايب من حركتها قال فيها كم بيت يستعطفها فيها
ويقول انها ذكرته الماضي و اذا ما عطيتيني وجه لحقت باخوي
الي في قبره ويذكر التاريخ واليوم اللي قابلها فيه....

يقول الشايب :

يا بنت خوذي خاطري وارحميني,,,,,
,,,,,,,لا تجرحين العود بعيونك السـود

غضي نظرك وغطي الوجنتينـي,,,,,
,,,,,,, لعل يومٍ جدد الجرح مـا يعـود

يوم انتهى مع مرمسات السنينـي,,,,,
,,,,, جتني صواديفه على غير مقصود

باول شهر عشره نهـار الثنينـي,,,,,,
,,,,, حمدان مروا به على جنازة حمود

البنت كانت تقصد من استفزازه انها تجاريه في الشعر وترد عليه
والمسكين ما كان يدري انها شاعره وعلى باله ما خذ راحته في التغزل

ردت عليه البنت وهزأته تقول .....

يا شايب الرحمن وينـك ووينـي ,,,,,
,,,,,عزي لحالك قدمك الباب مسـدود

قلبك عطوف وجاه قلـبٍ متينـي,,,,,,
,,,,, والبنت ما تشفق على مغازل العود

حبل الرجا مقطوع بينـك وبينـي,,,,,,,
,,,,,, مثل الغليث اللي رعا قلبه الـدود

اقفى شبابـك والعـرب مقبلينـي,,,,,,
,,,,,, يا عود ما يرجع من العمر مفقود

حطمته يوم قالت له انك عود وان الشباب ما يرجع وان ما فيه
امل تعطيه وجه حس العود انه تورط وقال كم بيت يقول لها صدي عني
انه ما يبي الغزل بعد ما وصل عمره ثمانين سنه

يقول حمدان .....

يا بنت صـدي بالعيـون الظليلـه,,,,
,,,, لا صد عنـك الله نهـار القيامـه

مالي ومالك يالفـروع الطويلـه,,,,,
,,,,, لو فيك من رسم البـداوه علامـه

يابنت مـا لـي بالثمانيـن حيلـه ,,,,,,
,,,,,اهدف كما تهدف على البير قامـه

اقفى شبابي والدهر شفـت ميلـه ,,,,,
,,,,,,يالله حسـن الخاتمـه والسلامـه

اعطيك موجز والبضاعـه قليلـه ,,,,,,
,,,,,,واخذت لك من صافي الماء سنامه

راحت الايام والشايب مسكين سنه خذله معها شايب
وهي بنت وتقول له كيف اعطي شايب وجه
بعد فتره مرته مره ثانيه وردت عليه السلام واستفزته
وراحت وخلته ولع الشايب وقال ليه ما ابين لها في كم بيت
انها بتشيب مثلي واني رجال طيب وان الناس تنصاني
ومعروف بالكرم واني ما ابي منها غير التحيه والترحيب

يقول حمدان .......

يا بنت ما جاك الكبـر والخشونـه ,,,,
,,,,وعادت شباب اليوم يجفل من الشيب

ياسرع ما وبلـك تمـزع مزونـه,,,,,,
,,,,,, يالفاتنـه يـا ام الثمـان الرعابيـب

يا بنت مـا بينـي وبينـك مهونـه,,,,,,,
,,,,,, كلمة شرف نبي تحيـه وترحيـب

الله مـن عـودٍ ثقيـلـه طنـونـه,,,,,,,
,,,,, ينصاه راع المشكلـه والمواجيـب

على الكرم والديـن نفسـه حنونـه,,,,,,
,,,,,, تلقاه بالاجـواد شـرق وتغاريـب

جهز الابيات وارسلها مع عجوز ووعد العجوز بهديه اذا وصلت الرساله لها
راحت العجوز وعطت البنت الابيات شافتها البنت وقفلت على العجوز
في غرفه وقالت مثل ما جيتي بابياته ترجعني بابياتي
العجوز مسكينه قالت طلعيني ولا ابي منكم شي الله لا يعودكم انتم واوراقكم
ردت البنت ابيات اقوى من الاولى واكثر تحطيم المسكين

الشايب ما احد رحمه حتى لو حاول يستعطف ....

تقول البنت .......

العود عود وطايحـاتٍ سنونـه,,,,,
,,,, من كثر ما يرقد على جرة الذيب

عودٍ مهرقل والعرب ما يبونـه,,,,,,,
,,,,,, ياعود ما لك في طويل المراقيب

اقفى شباب العود راحت حتونه,,,,,,
,,,,,, مثل اليتيم اللي بكا ما له مجيب

جداه ينثر دمعـة ٍ مـن عيونـه ,,,,,,
,,,,,,غريق موجٍ ما لقا له مقاضيـب

وكانت هذه النهايه لقصه هذا الشايب والفتاه

تقبلوا تقديري

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صـــور من داخل ثانويه بنات بالامارات (بنات )	ابو كتوف الملقوف	منتدى الصور والكاريكاتير	1394	28 Aug 2008 08:33 AM
من صاحب هذه الصوره؟	يوسف المصرى78	منتدى الصور والكاريكاتير	1	08 Jul 2008 01:35 PM
القصه عن شايب هواوي ( قلبه خضر )	faisalali	منتدى العشاق	1	27 Feb 2008 02:34 PM
اول حرف من اسمك .. ناري ؟ هوائي ؟ ترابي ؟ ام مائي ؟	i love people	المنتدى العام	15	10 Dec 2007 10:08 PM
شايب صايع‏ !!!!	القلب الشجاع	المنتدى العام	10	04 Dec 2007 10:11 PM

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150 151