بسم الله الرحمن الرحيم
هذه القصة للكاتبة ( ( وردة بلادي ) )
منقولة بواسطة( ( حور البحر ) )

حان الوقت لنعلن .. بداية الرحلة الجديدة

في سفينة ضخمة .. جديدة ..

ربانها الكاتبة " وردة بلادي "

اساسها الانسانية .. وقوامها شخصيات كثيرة .. حملت في طياتها معنى المفهوم الجميل ..

الانسانية .. مصطلح واسع .. عميق .. غزير

احتوته قصتي الجديدة ..

التحم الفكر والقلم ..

ليأتي مرة اخرى ..

ويضيف الى ملفي ..

قصة جديدة

بعنوان

(*•.¸(`•.¸ وسمانا أظلمت بعد التماعي¸.•)¸.•*)
ملاحظة :: بداية الاجزاء يمكن تكون قصيرة .. ويمكن تتخربطون بين شخصيات القصة .. لان في وايد شخصيات .. ويمكن ما تحسون بحلاوة القصة
الا من الجزء الثالث وساير ... لان اول جزئين مواقف تعرف بكل شخصية وصفاتها ::
يا صحبة الخير شدونا النشيد .. شوقا لامجاد الوجيل الرشيد
نبني صروحا للعلا ونشيد .. بهمة عالية ورأي سديد
عشان كذا راح انزل لكم الاجزاء الثلاثة مرة وحدة
وماراح انزل بعدها أي جزاء الا بعد مااشوف انطباعكم على القصة
وردودكم وتفاعلكم معاها ومعاي راح يحدد اذا راح اكمل معاكم او انسحب بكرامتي
اتمنى لي ولكم التوفيق

البداية

(*•.¸(`•.¸ الجزء الاول¸.•)¸.•*)
الباب مفتوح في أي وقت .. مفتوح لكل الناس ..

تدخل المكان تحس باحساس غريب .. تحس بالراحه ..

المكان كله نور .. والاشخاص اللي فالمكان الابتسامه ما تفارق ويوهم .. واذا فارقت الابتسامه ويوهم تدمع عيونهم .. لأجل واحد أحد ..

.............. السلام عليكم ورحمة الله ... السلام عليكم ورحمة الله ...

نش غانم .. وسار خذ له مصحف ... ومشى صوب اخوه حمد .. يلس حذاله و دزه من جتفه ..

حمد: بسم الله
غانم: راقد ؟؟!!
حمد: غانم والله فيه رقاد
غانم: ههههههه فضحتنا .. كل يوم تيي ترقد
حمد: لا عاد وين كل يوم ايي وارقد !!! الا بس يوم اكون سهران نص الليل
غانم: وجيه تسهر ؟؟
حمد: شسوي ما اييني رقاد
غانم: والحين ؟؟
حمد:الله يخليك نسير البيت
غانم: اممم بفكر
حمد: قم نسير ما اقدر افتح عيوني
غانم: بقرا لي كم آيه وعقب نسير
حمد: لين ما تقرا انا جد رقدت ييب لي اللحاف والمخده هني
غانم: انزين سر بروحك وانا عقب بلحقك
حمد: تبا ابويه يرقدني اليوم عالرصيف برع
غانم (شكله عصب) : انا ما فيه شي .. وادل طريج البيت .. وبرد روحي
حمد: خلاص خلاص .. اقرا وسو اللي تباه .. انا يالس هني لين ما تخلص
غانم: قم قم .. نرد البيت
حمد: لا والله .. عادي .. في سبيل الله
غانم: نش خلاص نرد البيت
حمد: زعلت ؟؟!!
غانم( ابتسم): ازعل من شوه ؟؟ والا من منوه ؟؟ قم نرد البيت ..
حمد ( مد ايده): شلني
غانم ( سحبه): يالدب هههههه

الساعه تقريبا 6 الصبح .. يالله فاتحه عينها بالزّووووور ويالسه .. والثانيه عادي عندها .. تعودت عالسهر .. ايام الاجازات ..

مريم ( تثاوب): مهاري خلاص .. ما اقدر اواصل
مهره: محد قالج تسهرين
مريم: بسير ارقد
مهره: تصبحين على خير هههههه
مريم: بتمين روحج ؟
مهره: عقب شوي بسير ارقد بتريا البيت الثاني متى يبندون ليتاتهم
مريم: متفيجه ..
مهره: الريم ما اتصلت ؟؟
مريم: للحين لا .. ما اتصلت ..
مهره: الله يعينها عاشه
مريم: جيه اول مره .. يايبه ما شاء الله ثلاثه وهالرابع .. الله يسهل عليها
مهره: آمين .. عيل انا بتريا لين الريم تتصل
مريم: واذا ما اتصلت
مهره :هاهاها بتصل فيها
مريم: مع السلامه

نشت مهره وسارت صوب الباب تعرف ان غانم وحمد واصلين .. ويمكن يدرون عن امهم .. فقالت بتسألهم .. شافت غانم يالس فالحديقه روحه ..
لبست شيلة الصلاة وظهرت برع ..

مهره : واااااااااااي بررررررد
غانم: اهلا وسهلا
مهره: ومرحبا
غانم: واعيه للحين شوه تسوييييييين؟؟
مهره: ما فيه رقاد
غانم: قصدج ما راقده من امس ؟؟ مواصله ؟؟
مهره: هيه
غانم: حلفي
مهره: والله
غانم: ما شاء الله عليج
مهره: متعوده .. انزين الا اقول
غانم: هلا
مهره: وين حمد
غانم: هذا سؤال تسألينه ؟؟ يعني وين ؟؟ راقد
مهره: ما صدق رد من المسيد ورقد
غانم: اكيد سهرانين امس كلكم
مهره: هيه .. بس هم ساروا رقدوا اما انا وحمد ومريوم وريسه واصلنا .. والحين كلهم نقعوا خيانه فيه وساروا رقدوا هدوني بروحي اهئ اهئ (
وبرطمت)
غانم: حرام عليج .. ههههههه فيهم رقاد ..
مهره: انزين شحال امك ؟
غانم: والله امايه يابت اخو ثاني حقي
مهره: احلف
غانم: ههه والله
مهره: مبرووووووووك مبرووووووووك زين زين الحمدلله على سلامتها
غانم: الله يبارج في حياتج .. الله يسلمج
مهره: مدام اطمنا على عاشت ابوك
غانم: نعم نعم ؟؟ لحظه شوه قصدج .. لوسمحتي يعني
مهره: ما قصدنا شي .. بسم الله ..
غانم: لا قلتي عاشت ابوك .. يعني حاطه على ابويه وامايه
مهره: لا اله الا الله منكم يا عيال مبارك .. حشى ما نقدر نرمس جدامكم عن مبارك والعاش

نزل من السياره ... وساعده السايق الخاص به .. يلس عالكرسي .. وتحرك متجه صوب الباب ..

دخل المستشفى بكل هيبته .. ورافع راسه ... نظرات الناس له صارت شي متوقع وطبيعي .. اللي يشوفه .. واللي يأشر عليه .. واللي يرمس
ربيعه والنظرات موجهه له ..

كبس زر المصعد .. واتريا لين يوصل ..

وصل المصعد وكبس على زر موجود فالكرسي اللي هو يالس عليه .. ودخل المصعد ..

بنت صغيره .. تطالعه باستغراب .. ويوم انتبه عليها رد عليها بابتسامه ..

وقف المصعد عالطابق اللي هو قاصدنه .. وتحرك ساير صوب الحجره اللي يبغيها ..
الحجره من برع كلها بالونات زرق .. وشرايط زرقه .. وبطاقه عوده عالباب مكتوب عليها
a Boy” “It’s

سلطان: وصل ..
الريم: فديته والله ..
سلطان: سيري قولي لهم

دخلت الريم الحجره .. وسلطان كان واقف برع ..

مبارك: السلام عليك ..
سلطان: مرحبا .. وعليك السلام والرحمه .. شحالك ؟
مبارك: الحمدلله ..
سلطان: مبروك عليك الياهل .. ويتربى فعزك ..
مبارك: الله يبارك في حياتك .. منوه داخل ؟؟
سلطان: ما في حد غير امايه وعمتك .. وخواتك .. تفضل ادخل ..

دخل مبارك .. والكل وقف .... وتم يطالع الحجره والابتسامه على ويهه .. كلها بالونات زرق اكثر من البالونات اللي برع .. وورود .. وبطايق
عاليدار ..

مبارك: السلام عليكم ..
ام مبارك: هلا بالغالي .. مرحبا حبيبي اقرب فديتك ..
مبارك: الحمدلله عالسلامه يالعاش .. ومبروك عليج
عاشه: الله يسلمك .. وعليك ..
ام عاشه: مبروك ما ياك فديتك
مبارك: الله يبارك فيج عمتيه ..
ريسه: مبارك
مبارك: هلا
ريسه: شوه بتسميه ؟؟
مبارك: انتي شوه تبغين ؟؟
ريسه: لا انا ما يخصني انتوا سموه بكيفكم .. انته ابوه وهاي امه ..
مبارك: هاي ما لها اسم
ريسه: بلى .. يعني لازم الحين اقول عاااااااشه .. مب لازم
مبارك: بسميه محمد
ريسه: حلو .. حمد ومحمد وساره .. كشخه
مبارك: وغانم

من طرا مبارك اسم غانم .. وعاشه ظهر على ويها الحزن .. ظهر مبارك من الحجره ..

سلطان: وين ساير ؟؟
مبارك: بسير البيت اخلص شغلي ..
سلطان: الله يهديك لاحق عالشغل ..
مبارك: ما عليه عقب ان شاء الله برد ..
سلطان: انزين ما تبغي تشوفه ؟؟
مبارك: وانا طالع بسير صوبه ..
سلطان: خلاص عيل الله وياك
مبارك: اذا يبغن شي الحريم اتصلوا بي .. وانا بطرش السايق يخلص مشاويرهن
سلطان: افا عليك انا هني يالس .. وبسوي لهن اي شي يبغن .. ولو بغيت اسير .. بخلي السايق الثاني ايي .. مب لازم سايقك ..
مبارك: مع السلامه ..
سلطان: الله يحفظك ..

في منطقه حلوه .. وفريج يكون العصر هادي نوعاً ما .. بس حشرة الصغاريه هي اللي تقول لنا انه الحين بدا وقت اللعب يعني وقت اليهال .. وعقب
المغرب تبتدأ الحياة فيه من جهة الكبار لان الكل تقريبا يكون خلاص رجع من دوامه .. والناس اللي ساكنين فيه كلهم من نفس الطبقه .. و كلهم يزاورون
ويعرفون بعض .. واكثر بيت يلفت الانتباه .. او بالاحرى بيتين في نفس الحوش .. والفاصل بينهم حديقه مزينه بالورود والعشب الاخضر .. وفيها
كراسي وطاوله فزاويه .. وألعاب في زاويه ثانيه..

مهره: ساره لا تلعبين بالماي
ساره: لالالا ما نبا
مهره: شوه لالا ما نبا ع كيفج هو ؟؟ بخبر عليج امج بس خل ترد بالسلامه
ساره: جيه ما وديتوني صوبها .. بلعب بالماي
مهره: ط هاي اونها تهدد .. تعالي هني
ساره: بسير عند عمي عبدالله
مهره: عبود فالفله ؟؟
ساره: هيه .. بسير صوبه واقوله يوديني عند امايه
مهره: لا تجذبين هالكثر وانا بعد وياها .. عبدالله فالجامعه .. سيري الحين حاطين رسوم حلو في سبيس تون
ساره: ما ابا تقصين عليه .. وعموه الريم سارت بعد .. وعموه ريسوه
مهره: عيب .. لا تقولين ريسوه ..
ساره: جيه كله تحرج علينا ...
مهره: هن سايرات عند امج
ساره: انزين ليش ما ودوني
مهره: امج بترد عقب يومين ان شاء الله .. هي والبيبي
ساره: هيه .. وبعد ما خلوني اشوف البيبي
مهره: انزين سيري .. هذو ابوج رد ..


ركظت ساره صوب ابوها .. اللي توه واصل .. وهي اللي فتحت له الباب ..

مبارك: هلا والله
ساره: وين سرت
مبارك: عند ماما
ساره: والله بصيح .. ليش ما وديتني
مبارك: اممممم آسف .. هي بترد البيت ان شاء الله وبتشوفينها هي والياهل
ساره: ما ابا .. كلكم سرتوا المستشفى وانا هني بروحي
مبارك: وين روحج ؟؟ كلهم هني فالبيت
ساره: عمي سلطان .. وعموه الريم .. وعموه ريسوه
مبارك: ساره انا شوه قايل لج
ساره: آسفه آسفه .. ريسه ريسه .. انزين كلكم محد
مبارك: وبيت يدج محمد كلهم بعد محد ؟؟
ساره: هيه حتى بيت يدي محمد .. بس عموه مهره ومريم .. والباقين ظهروا
مبارك: خلاص وعد اذا عقب سرت من وقت بوديج .. وين حمد ؟؟
ساره: ظهر برع ..
مبارك: استأذن من منوه ؟؟
ساره: من عموه مريم
مبارك: انزين قومي الحين عسب انزل

نزل مبارك وساعده السايق .. ودخل الفله وسار صوب مكتبه ويلس يجلب فالملفات اللي عالطاوله والاوراق ..

مبارك .. اكبر اخوانه .. محامي .. متزوج من عاشه .. عنده 3 عيال واليوم استووا 4 .. اكبرهم غانم .. وعقبه حمد .. ساره ..
ومحمد .. غانم عمره 16 سنه .. حمد عمره 14 سنه و ساره عمرها 10 سنوات ومحمد يوم واحد .. عقب ما ياب غانم تعرض لحادث .. وهالحادث
سبب له شلل .. منعه من انه يمشي على ريله مره ثانيه .. وهالاعاقه خلت افكاره تتلخبط ... ونفسيته تتعب .. وودر شغله لفتره .. وصار انطوائي
ما يحب الناس يشوفونه بنظرة اشفاق .. ولين وصل للحل اللي اعتقده مناسب .. وقال انه بيطلق حرمته لانها صغيره .. وبيخليها تعيش حياتها .. بس
طبعا عاشه ما وافقت .. ووقفت وياه في مواقف كثيره .. وهو ما قدر يتقبل فكرة انه يودرها ويتخلى عنها بكل سهوله .. عقبها قدرت تقنعه ان هو مب اول
واحد ولا آخر واحد فالدنيا ييلس على كرسي متحرك .. وفي ناس مكملين حياتهم بهالطريقه .. وشغله اللي كان يحبه لازم يستمر فيه .. فــ رد لشغله مره
ثانيه .. وكمل حياته.. فالبدايه نظرات الناس له كانت تخليه يستحي وينزل راسه .. اما الحين عادي ..


عقب صلاة المغرب ..

البنات كانن يالسات فالحديقه .. ويسولفن ..

مريم: يشبه منوه ؟؟
ريسه: يشبهج
مريم: والله يا بخته جانه يشبهني
الريم: يشبه امه
مهره: الا حمد وين ؟؟
ريسه: هيه صدق حمد وين ؟؟
الريم: داخل الفله
مريم: ذاكرتوا ويا عيال اخوكن انتن الهنتين ؟؟
ريسه: وانتي شوه خانتج ؟؟
مريم: والله ما احيد مبارك اخويه .. اخوج .. وما احيد محمد اخويه عرس وياب عيال
ريسه: نحن والله كنا مشغولين ويا حرمت اخويه
مريم: لا والله ؟؟ مشكلتج هاي هههههههه
ريسه: اظني عيال اخويه ذاكروا وخلصوا والحين يتعشون وبيرقدون بعد
مهره: اقص ايدي جانهم رقدوا الحين
الريم: لا بيرقدون لان ابوهم هني ..
مريم: وانتن ليش ما تسيرن تتعشن وترقدن ؟؟ بسكن سهر
ريسه: اقولج انتي .. سيري كملي رقادج احسن
الريم: وين مطره؟
مريم: خليها هالزلمه افففف تقهر .. قبل ما كان عندها غير الكتب والحين اللاب توب وما ادري شوه .. متفيجه وايد
مهره: البنيه تطور عمرها فالانجليزي انتي شدخلج
ريسه: وابوي انا .. اللي يسمع يقول هي ابد ما تعرف انجليزي ..
مريم: انا ادري ههههههه زلمه والله زلمه .. شاكه انها عقب هالتعب كله بتكتشف الذره
ريسه: حبيبتي الذره اكتشفوها وخلصوا خلق الله
مريم: بتكتشف شي ثاني
ريسه: والله انج اليوم ماكله شي عالصبح والا ماكله شي قبل ما تيين تيلسين ويانا .. ما ادري

أليس: Reem come baba mubark want u
الريم: وي وي .. ظهر اسمي
مهره: مسجله اسكان زايد الاخت هههه
الريم: اقول بسير وبرد عقب شوي ..

سارت الريم صوب الفله .. دخلتها وسارت الصاله ..

الريم: نعم مبارك .. زقرتني ؟؟
مبارك: هيه ..
الريم: نعم ؟؟ خير؟
مبارك: ساره رقدت ؟؟
الريم: لا يالسه تتعشى
مبارك: وحمد؟؟
الريم: وياها ..
مبارك: انزين انا بسير المستشفى الحين
الريم: الحيييييييييين؟؟؟!!!
مبارك: هيه ليش؟؟ فيها شي ؟
الريم: لا على راحتك
مبارك: عالعموم انا بسير عند غانم وعقب بمر على العاش شوي وبرجع .. فشوفي ساره وحمد يوم يخلصون عشاهم خلهم يرقدون
الريم: فالك طيب .. ان شاء الله ..
مبارك: وساره خاصة لانها عنيده .. خليها ترقد وما تترياني لا انا ولا امها
الريم: هاي صعبه عاد .. تعرف بها سارونه .. ما ترقد الا يوم تشوفك وتشوف امها جدامها
مبارك: تعالي الحين ويايه نسير صوبهم واخبرهم جدامج ..
الريم: يالله ..

سارت الريم ويا مبارك .. صوب ساره وحمد .. وهم يتعشون ..

حمد: سرتي عند امايه؟؟
ساره: لا ما ودوني
مبارك: حمد
حمد: نعم
مبارك: تخلص عشاك وتسير ترقد ..
حمد: توها الساعه 7
مبارك: ما عليه
حمد: ابويه ما ابغي ارقد الحين .. ما بييني رقاد
مبارك: انا قلت تسير ترقد
حمد: ان شاء الله خلاص
مبارك: سارونه
ساره: انا ما برقد .. ما برقد
مبارك: ساره .. تسمعين رمسة عمتج الريم .. ومتى ما قالت لج سيري رقدي بتسيرين
ساره: هي يوم حمد بيسير يرقد .. بتقولي سيري رقدي انا ما ابغي
مبارك: مب بكيفج .. سمعي الرمسه ..
ساره: والله شوه هذا .. ما وديتوني عند امايه والحين بعد يبغوني ارقد غصب

ونشت ساره من عالسفره ..

مبارك: ساره وقفي
ساره: نعم
مبارك: ردي كملي عشاج بالزين .. ويوم بتخلصين تسيرين ترقدين .. وما ابغي حد يتصل بي ويقول ساره ما كلت .. والا مب طايعه ترقد ..
تسمعين .. ردي مكانج بسرعه وتعشي ..

ريسه: سيري زقري اختج
مريم:مب متفيجه
ريسه: مهره سيري
مهره: انا مالي خلق
ريسه: والله حاله .. انا بسير ازقرها
مريم: خليها يوم بتخلص بتنزل
ريسه: لا بسير ... تعرفين ابغي اخرب عليها ..
مهره: ههههههه صدق انج متفيجه
ريسه: في حد فبيتكم ؟؟
مريم: اللي يقول مب ساكنه ويانا من ميت سنه .. تسأل حد فالبيت .. يعني ما حفظتي جدول كل واحد فيهم ؟؟
ريسه: بلى بس استهبل
مريم: هاهاهاها سخيفه
ريسه: قومي عني بسير
مهره:سلمي عليها
ريسه:افا عليج .. بيرها هني وبسلم عليها جدامج ..

سارت ريسه صوب الفله .. ودخلت .. ضغطت ع زر اللفت وانفتح الباب .. دخلت ودقت الطابق الثاني .. ظهرت منه ومشت .. قاصده الحجره
اللي بتيي على ايدها اليمين ..

دخلت مره وحده ..

ريسه: بووووووووووو
مطره: سخيفه طيحتي قلبي
ريسه: والله وينه ما اشوفه
مطره: حد يدخل عالاوادم جذه
ريسه: هيه
مطره: هيه اللي شراتج ..
ريسه: بلاج انتي يالزلمه تعالي تحت ..
مطره: عليه امتحان باجر
ريسه: اي امتحان اي خرابيط الله يخليج
مطره: تعرفين به جون بعد
ريسه: خليه عنج انزين .. هذا زين منه يسبح وايي الجامعه .. ما ظنتي يسبح بعد .. طول الاسبوع لبس واحد بس عفانا الله
مطره: ههههههههه حليله .. طيب بس وايد ضاغط علينا
ريسه: جنه اهبل
مطره: عالأقل احسن عن مستكم
ريسه: خليها هاي بعد .. الله ياخذها ان شاء الله
مطره: ايه بس بس ..
ريسه: انزين تعالي تحت
مطره: بنزل عقب شوي
ريسه: ماشي الحين تنزلين ويايه
مطره: والله نزلي ولاحقتنج
ريسه: مطاريييييييي يالله عاد
مطره: انزين .. الا اقول .. شخبار حرمت اخوج
ريسه: تو الناس .. حرمت اخويه ربت ويابت
مطره (قاطعتها): ادري ادري .. يابت ولد وسميتوه محمد
ريسه: اوه ما شاء الله تعرفين اول مره فالتاريخ .. بوزع بارد فالفريج
مطره: جب يالسخيفه شوه تتحسبيني ..
ريسه: احيدج حابسه روحج في هالحجره وين تعرفين اخبار خلق الله
مطره: بعد ربج ..
ريسه: انزين نزلي يالله
مطره: يايه .. ما تخلين الواحد يذاكر
ريسه: فريه هاللاب توب العله هناك ونزليييييييييي

في العاصمه .. بوظبي ..

في حجرة فهد ..
فهد: العنود يالله سيري حجرتج
العنود: تو الناااااااااس
فهد: لا والله .. وايي ابويه ويهزبني انا .. يقول جيه تخليها للحين واعيه
العنود: اووووونه .. اونه .. يالعود
فهد: احم احم
العنود: انزين
فهد: قومي بسرعه .. سيري رقدي قوميييييي
العنود: هذي امايه وصلت .. بنزل تحت عندها
فهد: سيري رقدي اقولج .. ابويه الحين بييييي ..
العنود: ما اريد ..

وظهرت العنود بسرعه من حجرة فهد وونزلت تحت وفهد وراها ..

فهد: اقولج سيري رقديييييييييييي
العنود: ما اريد الحييييين ..


وانفتح الباب .. بس لسوء حظ العنود .. ما كانت امها .. كان ابوها

العنود: ستووووووب ويييييييت ..
فهد (وقف مكانه): قلت لج ..
العنود: بسير ارقد

وركظت سارت حجرتها ..

سهيل: هاي للحين مب راقده ؟؟
فهد: قلت لها ما طاعت .. تقول انها بتتريا اامايه .. وحاشرتني من الصبح .. ما تخليني اذاكر
سهيل: وامك وين؟
فهد: ما ادري .. ظهرت وبترد عقب شويه ان شاء الله
سهيل: وانته شوه تسوي ؟
فهد: قلت لك اذاكر
سهيل: عندك امتحان ؟
فهد: هيه
سهيل: اللي يقول ثانويه عامه
فهد:هههههههه تدري به فهودي يوم عنده امتحان ما يرقد الا وهو صام الكتاب
سهيل: لا تقول فهودي تذكرني بعمتك آل مهره
فهد:هههههه
سهيل: مهره .. تزقرك فهودي .. افففف
فهد: هههههه انحب والله انحب
سهيل (وهو ساير فوق ): وانا قلت ما تنحب؟؟ ولد سهييييييييييل اكيد كل البنات بتحبه هههه
فهد:هههه وينج يا امااااايه تيين تسمعين بو فهد
سهيل: امك خل ترد الحين .. ما ادري وين سارت .. ولا اتصلت فيه
فهد: لا لا .. لا تظلمها .. اتصلت بك جدامي بعد .. اكيد انته ما رديت
سهيل: يمكن اتصلت على تيلفون السياره ..
فهد: وعالمبايل بعد
سهيل (رفع مبايله يطالع الشاشه): هيه والله عندي مس كول واحد منها ..
فهد: شفت
سهيل: هيييييه شفت .. فهد قول حق الخدامه تزهب لي العشا ..
فهد: افا علييييييك .. بس انته اصعد فوق وتغسل وبدل ثيابك .. وانزل وبتلقى العشا زاهب ..
سهيل: مشكوووور
فهد: كم سهيل عندنا ؟؟ الا هو واحد

قربت الساعه 12 تقريبا ..

ريسه: وصلوا وصلوا ..
مطره: شوه هالازعاج
مهره: هيه والله حتى انا اصمخت منه
ريسه: والله تقدرين ترمسين .. قولي حق سلطان
مريم: هذا سلطان ودي ازخه واظربه ..
ريسه: ههههههههههه جانج حرمه سويها
مريم: ما ابغي اوصخ ايدي ..

3 دراجات دخلت الحوي ..

مهره: الله كشخه .. والله خاطريه اركب
ريسه: قلتها قبلج .. بس ما تعرفين انهم قحط ما يعطونا نركب..
مطره: والله انتن .. اولاد مب بنات ..
مريم: وين اختج وين سارت .. كل هذا ترقد سارونه بس
ريسه: شدراني فيها ..

وصلوا الشباب الثلاثه ..

سلطان: وعععععع الناس يردون البيت عسب يرتاحون ويشوفون ويوه حلوه .. ونحن نرد نشوف ............. ما ابغي اكمل
مريم: لا كمل الله يخليك
مهره: بدينا
ريسه: سلطان
سلطان: شوه
ريسه: خلني اركب دراجتك شويه
سلطان: اقولج قومي من عالكرسي قومي بسرعه دخلي داخل ..
ريسه: لا خلاص بسكت
سلطان: قومي اقولج .. ( وتجدم ساير صوبها )

نشت ريسه بسرعه ركظت بتسير صوب الفله تشرد عن سلطان ..

سلطان: ههههههه سوّالها .. شكرا عالكرسي .. ( ويلس)
مريم: مشكله اليهال
سلطان: شوه قلتي ؟؟
مريم: ما قلت شي
سلطان: اقول انتي بعد جلبي ويهج
مريم: والله انته اجلبه .. نحن يالسات هني قبلك
سلطان: بيت ابوج هو
مريم: هيه والله بيت ابويه .. وعلى فكره الحديقه نصها حقكم والنص الثاني حقنا لا تنسى
عبدالله: يا بويه ذليتينا على هالنص .. خذي الحديقه كلها ما نبغيها
مطره: انته مب كنت فالجامعه ؟
سلطان: رمست الرقاد .. يا بابا . .اليوم الاربعا .. رد العصر
مريم: وع طول ما صدق ظهر من البيت
مهره: ههههههههههههههههه
سلطان: ظحكت الساحره ..
مهره: والله انتوا تظحكون
سلطان: في وحده ناقصه في هاليلسه ..
محمد: الريم ..
مريم: ما شاء الله على اخويه .. الله اكبر
سلطان: ما ادري .. اكتشف الذره اخوج ..
مريم: تغاااااااااااااار
سلطان: من منوه ؟؟ من هذا اخوج .. لا ما اغار .. من زينه الحين
محمد: ههههههه عالأقل اتريا يوم بسير ..
سلطان: ههههههه لا نحن نعطي كاش
عبدالله: عيل انا ابغي شيييييييك
مهره: هههههههههه بس سكتوا والله ميانين
سلطان: تعالي انتي معاقبينج هناك واقفه
ريسه: اخاف ايي وانته تستلمني
سلطان: لا ما بسوي شي
ريسه: جذاب
سلطان: فعييييييينج جذاب .. سيري سيري داخل .. ما كنت بسوي بج شي .. اما الحين لو ييتي شوفي شوه بسوي بج
محمد:حرام عليك .. خلها
سلطان: ليش تقولي جذاب
عبدالله: انا بسير ارقد ..
ريسه: سر سر احسن والله
عبدالله: ما بترياج .. ساره وحمد وينهم ؟؟
ريسه: راد الساعه 12 يسأل عن ساره وحمد .. اقولك سر ارقد قلنا لك
عبدالله: والله مدوخ ..يالله باااااااااااااي
مطره: يقولون مع السلامه
سلطان: اوووووه نسينا ان المطوعه يالسه هني ويانا
مطره:شو تقصد
محمد: عاد كله ولا مطاري ..
سلطان: هذا موكلينه محامي الدفاع عنكن انتن الهنتين (وهو يقصد مهره ومطره)
مهره:شفت عاد .. شوه نسوي يوم الناس تحبنا بسرعه
سلطان: لا تسوين شي يالساحره انتي ..

سلطان .. الريم .. عبدالله .. ريسه .. اخوان .. فارق السن بينهم مب وايد كبير .. سلطان حبوب وفرفوش يحب السوالف والظحك .. الريم
هاديه وطيبه زياده عن اللزوم وبما انها الاخت العوده فكل شي على راسها يوم امها ما تكون موجوده فالبيت .. عبدالله بحكم انه اصغر ولد فأي شي يبغيه يحصله
وهو يدرس في جامعة العين .. ريسه لسانها طويل وما تحب حد يفرض رايه عليها ..

محمد .. موزة .. مريم .. مهره .. مطره .. اخوان .. محمد دارس برع ، وهو الولد الوحيد بين 4 بنات يحب خواته مهره ومطره بدرجة فظيعه
وهن شراته بس مهره تحبه بزياده شويه وتبين في طريقتها وياه واسلوبها ورمستها .. مريم شرات ريسه بس بعد بزياده لانها اكبر .. واكثر واحد يظارب وياها
سلطان يحب ينكد عليها وهي ما تقصر وتموت عالطلعه .. مهره دلوعه بس دلعها حلو ، تحب اذا اخوها قال هيه هيه اذا لا لا وامها وابوها نفس الشي بعد ..
وفيها عزة نفس وشي من الغرور .. مطره واااااااايد هاديه وتحب لو تيلس فــ مكان تسكت بس وتسمع .. و اكثر وحده متمسكه صدق بعاداتهم فالبيت وبرع
البيت .. وفالفتره الاخيره التحقت بمركز تحفيظ قرآن .. ويرت ريسه وياها .. اما موزه اكبر خواتها واكبر من محمد بعد .. متزوجة وساكنه في بوظبي
.. وعندها ولد اسمه فهد .. وهو في مثل عمر حمد يعني 14 سنة .. والعنود كبر ساره 10 سنوات .. وعندها الحشرة مزنه ومزون اللي توهن داخلات
الروضه


في بيت سالم

غيث وسيف يدخلون البيت بهدوء من غير ما حد يحس .. وكل واحد منهم يتسحب شرا الحرامي .. وسيف شوي ويتخرطف بالطاوله اللي مغيرين مكانها وهو
ما منتبه لها..

غيث(بصوت واطي) : سيفوووه شوف جدامك عدل عن اتطيح وتفضحنا
سيف: ما شفت هالطاوله اكيد روضووه الدبه هي اللي مغيره مكانها اونها عاد
غيث : انزين بس قصر حسك عن حد يسمعنا

ويفتح باب الصاله في هالوقت اخوهم خليفه شافهم وهم داخلين البيت بس هو كان في سيارته المخفيه بمخفي شامل.. فهم ما انتبهوا له .. دخل خليفه وراهم
وشوي شوي يفتح باب الصاله وهم مب منتبهين له

ويقرب منهم شوي ويقول بصوت عالي: من وين يايين حضرتكم ؟؟!!

ينقزون غيث وسيف من صوت خليفه وكل واحد يدز الثاني عسب يرمس

سيف : هااا ؟؟ ولا مكان كنا عند الباب وتونا داخلين صح غيث
غيث : هي صح
خليفه: ما شاء الله عليكم .. اونكم عاد كل واحد يقص عالثاني ..
غيث : خليفه والله لا تخبر حد تونا رادين من السينما ..
خليفه: وليش رادين الحين البيت .. مب انتوا باجر عندكم دوام ليش ظاهرين من البيت اساسا يا عيال سنه اولى جامعه ؟؟
سيف : خلوووف ..تراكم ذليتونا والله ما يسوى علينا
غيث (وهو يقرص سيف): لا ما يقصد خليفه .. خله هذا اهبل
خليفه: هيه قص عليه انته بعد ..تغطي عليه (ويبتسم .. يعرف مهما يكون غيث ما يتنازل ولا يخلي اي واحد منهم يعصب على اخوه وتوأم روحه سيف صح
ان لسانه متبري منه بس بعد هو ما يقصد)
سيف: ثرنا ما بنحضر عرسك اذا خبرت ابوي
خليفه (وهو يمثل يسوي عمره يصيح): لا ارجوك اخوي تعال عرسي ثرك اذا ما حضرت ما بعرس
غيث (يظحك): خلاص خلاص لا تصيح سيف حرام بنحظر عرسه كسر بخاطريه
سيف: بفكر فالموضوع
خليفه: اقول اجلبوا ويوهكم.. ولا تحظرون عرسي احسن عسب ما تفشلونا
غيث: والله تتمنى نحظر اصلا اذا ما حظرنا العرس ما بيكون فيه شي مميز
خليفه : شي مميز!! مثل شو مثلا؟؟
سيف(وهو ساير يوقف عدال غيث وكل واحد منهم يأشر بصبعه عالثاني ويقولون): شراتنااا !!

خليفه فهم قصدهم ان هم توم وبيكونون مميزين فالعرس

خليفه: وايد عليكم كل واحد اخسف عن الثاني
سيف: هااااااااااا .. لا تجذب اصلا نتشابه وما شي فرق بينا بعد كيف كل واحد اخسف عن الثاني
خليفه: لا شي فرق طالع انته شامتك عاليسار وهو عاليمين
غيث: وهذا اكثر شي مميز فينا لو مب هالشامه جان ما فرقتوا بينا ..
خليفه: انزين بسكم صدعتوني سيروا ارقدوا باجر عندكم دوام
غيث وسيف: انزين (ويصعدون الدري سايرين حجرتهم )

يصعد خليفه وراهم بعد ما سكر الليتات .. ويسير حجرته يرقد..

خليفه .. ولد خالة محمد وخواته .. واقرب واحد له من هم صغار ويا بعض .. بس افترقوا عقب ما سافر محمد للدراسه .. خاطب بنت عمته حمده
عمرها 22 سنه .. وعرسه قريب.. وهو يشتغل في شركة ابوه ..

غيث وسيف .. توأم .. عمرهم 20 سنه.. غيث اكبر من سيف بـ ربع ساعه .. تفكيرهم اكبر من سنهم .. وبما انهم توم فكل واحد يحس بالثاني يعني
اذا الاول زعل الثاني يزعل اكثر منه .. واذا كان فرحان .. الثاني يفرح اكثر منه.. يتشابهون ومحد يقدر يفرق بينهم الا اخوانهم من الشامه الموجوده على
خد كل واحد ..غيث عنده عاليمين .. وسيف عاليسار..يعني يوم يوقفون جدام بعض ..كل واحد فيهم يكون صورة مرآه للثاني.. والفرق الثاني ان غيث
اهدا بشوي عن سيف وسيف هو صاحب الخطط والمقالب


(*•.¸(`•.¸ الجزء الثاني¸.•)¸.•*)

في المستشفى .. في غرفه موقعها عالزاوية ..

دخلت السستر ..

.......: Good morning

ولد صغير فالسن .. كان يالس عالسرير .. رفع راسه .. وابتسم لها ..

غانم: Good morning
.......: how are you today?
غانم: would you open the curtain please ? .. good
......: sure ,OH
غانم: thanX

ظهرت السستر .. ودخل واحد طول وعرض .. وسيم .. الابتسامه على ويهه ..

مايد: لا لا .. ولد اخوي اليوم حالته تمام
غانم: هلا عمييي
مايد: شحالك اليوم ؟
غانم: بخير الحمدلله .. شحال ابويه ؟؟ وشحال امايه ؟؟
مايد: كلهم بخير
غانم: امس على صلاة العشا .. ابويه كان ه
ني
مايد: والله ؟؟ ما زقرتوني عيل
غانم: جيه نزقرك ؟؟ جنك ما تشوفه فالبيت
مايد:ههههه لا يعني نتخقق شوي .. اخونا العود ياي اونه اونه يزورنا فالمستشفى
غانم: ههههه حلوه هاي .. عمي منصور ما وصل ؟؟

وفي نفس الوقت دخل منصور .. اللي من غانم يشوفه ينشرح صدره .. ومن منصور يشوفه يحس ان كل الدنيا ملكه ..

مايد: الطيب عند ذكره
غانم: والله توني اطريك
منصور: شحالك اليوم ؟؟
غانم: الحمدلله .. احسن
مايد: اقول لهم اييبون لكم الريوق الحين ؟؟
منصور: قايل لكم يوم انا اتاخر دقيقه وحده بس .. ييبوا له الريوق ولا تتريوني
مايد :هو ما ياكل من دونك
غانم: يالله عاد عمي .. الا هي دقيقه اترياك والا 5 دقاق .. حتى لو ساعه او 10 ساعات بترياك
مايد: شفت .. انته لا تتأخر عليه عسب ما يترياك
منصور: ييبوا الريوق بسرعه
مايد: 5 دقايق ويكون الريوق هني ..

غانم .. ولد مبارك العود ... مريض بالثلاسيميا .. وبين فتره وفتره يرقد فالمستشفى .. واذا تعب عليهم فالبيت على طول اييبونه المستشفى ..
يحب عمه منصور واااايد .. بس يحس مرات بالاحراج .. لان الكل تعبان وياه .. وخصوصا ابوه .. دوم يسير ويرد عليه .. ويحس انه مثقل عليهم
كلهم .. ولان ابوه ميلس عالكرسي .. فيشفق عليه ..

منصور.. يطلع من البيت وااااايد .. بس وين يسير ؟؟ ايي هني المستشفى .. عند غانم .. واذا كان فالبيت .. كله فحجرته .. يحب ييلس بروحه
.. اقرب واحد له مايد .. واذا كان يبغي يستشير حد عود يستشير اخوه العود مبارك .. اللي يحس ان له خبره اكثر من ابوه فالحياة .. لانه شاب و فارق
السن بينهم قليل .. يمكن اللي حافظ ملامحه بس اخوانه .. حتى عيال عمه اللي وياه في نفس الفريج ونفس الحوش .. بس باختلاف البيوت .. ما
يشوفونه الا ايام المناسبات او بالصدفه .. وهو من النوع الهادي وما يخصه في حد ولا يحب يدخل في اي شي.. يعني يطبق المثل اللي يقول (رزة الفيس من
طبايع ......... ) وهو ما يحب يكون ............ ومسوي لهم فيلم رعب فالبيت لان الكل يحترمه ويخاف منه ..

مايد ... الدكتور مايد .. محترم .. وطيب .. ويحب الخير للكل .. يحترم اخوه منصور مع انه اصغر منه بس يحس ان في هالانسان حب
كبيييييييير لو يوزعه على كل الناس كفاهم وزاد .. بس ما يدري ليش اخوه للحين مب مستوعب اللي استوى !!!!!!
ليش ما يبغي ينسى الماضي .. ويعيش حياته .. وحكم على نفسه بالسجن المؤبد ..
من يتلاقى ويا اخوه سلطان يجلبون المكان ظحك .. بقصد والا من دون قصد هالاثنين حلوين ويا بعض .. والكل يشهد لهم ..


كانت نازله من فوق بسرعه مستعيله ..

ريسه: صباح الخير امايه
ام مبارك: اي صباح الخير ؟؟ انتي توج واعيه ؟؟
ريسه: هيه .. دوامي اليوم الساعه 10
ام مبارك: كلهن راحن الجامعه
ريسه: ادري انزين .. انا ومطروه دوامنا اليوم الساعه 10
ام مبارك: عيل سيري اطاعي بنت عمج جانها زاهبه تسيرن
ريسه: ان شاااااااء الله .. السايق موجود ؟
ام مبارك: سايقنا نحن لا ..
ريسه: خلاص عيل .. بقول حق سايق بيت عمي يودينا
ام مبارك: باجي نص ساعه وين بتوصلن الحين ؟؟
ريسه: امايه جيه شوه .. الا هني الجامعه .. جريييييييبه ..
ام مبارك: انزين بسج هذربان وسيري بسرعه


ظهرت ريسه من عند امها .. بتسير بيت عمها .. شافت اخوها مبارك فالحوش ..

ريسه: مبارك

مبارك لف صوبها ..

ريسه: صباح الخير
مبارك: صباح النور
ريسه: شحالك ؟؟
مبارك: الحمدلله .. انتي للحين ما سرتي الجامعه ؟
ريسه: دوامي 10
مبارك: اها
ريسه: وانته اليوم مب مداوم؟؟
مبارك: لا ما سرت المكتب .. بمر على العاش اليوم بيظهرونها
ريسه: والله؟؟
مبارك: هيه وبمر على غانم بعد اليوم بيرد البيت
ريسه: حلاااااااااته .. بس للأسف .. بيخلص دوامي 4
مبارك: هههههه شفتي الحظ .. فرحانه بتداومين متأخر .. بس بتردين آخر وحده
ريسه: لااااااااا ..لا تردهم البيت الا يوم انا اوصل
مبارك: يا سلام واخلي حرمتيه في صوب وولديه فصوب .. ويوم يسألوني ليش اقولهم عشان خاطر ريسه
ريسه: هيه شوه فيها .. عمتهم اناااااا
مبارك: آسف .. جانج عمت غانم نوافق .. وما نقدر نقول لا لانها حقيقه .. اما عمت العاش لا .. هي شيختج عاد
ريسه: وييييييه قفطوني
مبارك: ههههه سيري سيري .. بيبدأ كلاسج
ريسه: بسير صوب مطره اشوفها
مبارك: صح السايق ظهر
ريسه: بنسير ويا سايقهم .. يالله فمان الله
مبارك: مع السلامه ..

محمد كان ظاهر من الصبح ويا ربيعه .. وحبيب قلبه وولد خالته خليفه ..

خليفه: اليوم ماخذ اجازه عشان خاطرك
محمد: غصبا عنك تاخذ اجازه
خليفه: والله مب مكلف انا .. يايبنك وناسنك
محمد:ههههه الحين لا اتم تتحرطم على راسي
خليفه: بعدكم على هالطلعات ما تبتوا .. كبرتوا بسكم
محمد:آآآآآآآه فديييييييتها
خليفه: منوه؟؟
محمد: وحده ماخذه قلبي وعقلي
خليفه: اوووووه زين زين عيل .. اييك شور سر اخطب ويكون عرسي وعرسك في نفس اليوم
محمد:انا خطبتها وتزوجت وخلاااااااص
خليفه: حمووووووود من صدقك ..
محمد:ههههههه اقصد دراجتيه
خليفه: سخيف .. والله شاك انك يوم تعرس وتييب عيال بعد ... بتم على ما انته على نفس الحال .. تعابل هالدراجه
محمد:شسوي .. احب احب هالشي .. تعرف يعني يوم تحب الشي تضحي بكل شي عسبه
خليفه: انته شوه قلت الحين .. بس سمعت شي شي شي
محمد:احسن شي
خليفه: ههههه اسكت اسكت ... يالله خلصنا
محمد: اصبر خلني اختار شي يليق بمقامها
خليفه: كشخه لو تخترب
محمد: خلييييييفه لا تقووووول .. والله بموت
خليفه: خيبه مب دراجه هاي
محمد: حرام عليك والله ما اشوفها الا كل اربع شهور
خليفه: الحين بتم تجابلها طول عمرك .. خلصت دراستك
محمد: ورايه دوام بعد
خليفه: صدق متى بتبدأ تداوم
محمد: ما اعرف .. ما اتصلوا بي .. احسن .. خل نرتاح شويه
خليفه: ارتااااااح ارتاااااااح .. بس خلصناااااااا
محمد: ههههههه انزييييين


في بيت سالم..

غيث وسيف خليفه اخوهم معاقبنهم وما مخلنهم يطلعون من البيت رغم انه يوم الاربعا ..تأديبا لهم .. مع انهم كبار .. بس كلام خليفه هو اللي يمشي عليهم
.. عسب مره ثانية اذا بغوا يظهرون من البيت لازم يستأذنون..

سيف : والله جنا يهال يعاقبونا ويلسونا في البيت
غيث(وهو مب مهتم وياكل مكسرات):اصلا كله منك .. يا صاحب الافكار التعبانه شراتك
سيف : انا افكاري تعبانه .. انزين غيوووث مره ثانيه لو قلت لك شي لا تسويه اوكيه
غيث : احسن بعد .. عالاقل بعفي نفسي من هالعقاب البايخ

وتموا كل واحد يحط اللوم عالثاني ليش انه هو السبب في اصدار خليفه لمثل هذا القرار .. ويرن التلفون.. كل واحد تم يطالع الثاني ويتلفت يمين ويسار ..
غيث يبا سيف يرد .. والعكس.. لان ولا واحد فيهم يحب يرد على تلفون البيت .. آخر شي قرروا اثنينتهم انهم ما يردون .. واللي متصل شكله مل
وسكر الخط

سيف : احسن بعد
غيث : فكه يوم يعرفون ان الشيوخ بس يالسين المفروض ما يتصلون

ويظحكون اثنينتهم .. ويقطع عليهم صوت التلفون مره ثانيه .. كل واحد تم يعطي الثاني النظرات نفسها..

غيث : سيف رد على التلفون يمكن حد متصل ضروري
سيف(ويهز راسه كأنه يقول لا):ما يخصني ..قلبك على اللي متصل انته رد
غيث : حرام عليك رد ما بيستوي فيك شي
سيف: اخاف قنبله تنفجر لو رديت
غيث : عن السخافه سوااااف
ويسكتون..تم التلفون يرن ويرن .. لين ما قام غيث بيرد عالتلفون وسيف كان له نفس التفكير ..قاموا الاثنين بيردون .. سيف يبا يسبق غيث عسب يرد
عاللي متصل.. فركض وركض غيث وراه الاثنين وصلوا له في نفس الوقت سيف رفع السماعه وغيث ماسكنها معاه بعد..

سيف : اقولك ودرها انا وصلت قبلك خلاص
غيث : ما ابا من الصبح اترجاك شوي وابوس ريلك ...لكنك ما طعت
سيف: انزين الحين طعت وقمت.. يالله خووز
غيث: آسف جدا ما ابا
سيف: انزين خذ السماعه بس قوم عني ذبحتني
غيث(وهو يظحك كأنه غلب سيف العنيد):ييبها
مريم: الو السلام عليكم
غيث: وعليكم السلام..(قفط ويهه يوم سمع صوت بنت وهو وسيف يتظاربون عسب يردون عليها)
مريم: اقول هذا بيت سالم
غيث: هيه نعم امنو بغيتي
مريم: انت امنو؟؟
غيث(وهو مستغرب): انتي متصله .. انتي امنو؟؟
مريم: مب لازم تعرف .. وين فطيم؟؟
غيث.. (يقول فخاطره هاي الهبله امنو .. تسأل انا امنو وعقب تقول وين فطيم .. على كيفها)
غيث: اقولها امنو
مريم: اربيعتها
غيث: ان شاء الله (ويحيس ثمه )
غيث: فطيم فطيييييم تعالي بسرعه تلفون
سيف: امنو ؟؟
غيث: شدراني
سيف: من الصبح ترمس .. والحين شدراني
غيث: وحده هبله متصله في اختك .. ثرك ما سمعت المثل اللي يقول (الاهبل ما يرابع الا الاهبل اللي شراته)
سيف: يا سلاااااام مثل وايد حلووو منو قايلنه
غيث: تطنز حضرتك
سيف: لا اتطنز .. مثلك خله حق عمرك
فطيم تنزل من فوق وتيي صوب التلفون ترفع السماعه
مريم: السلام عليكم
فطيم: مرحبا.. وعليكم السلام .. هلا والله بمريووومه
مريم: اقول فطيم امنو اللي رد علي
فطيم: ما ادري (وتلتفت حوليها ما تلقى غير غيث وسيف) واحد من هالثنائي اللي عندنا
مريم: منو ثنائي بعد
فطيم: غيث وسيف لان محد يالس غيرهم
مريم: قولي حق اللي رد اهبل محد غيرك .. ويوم بتعرف ترمس عدل عقب رد عالتلفون
فطيم: ههههه ..ليش؟؟
مريم: سأليهم يقولون عني هبله
فطيم: ما عليج منهم .. هذيل كل خبال الدنيا فيهم


وتمت مريم ترمس فطيم عن الجامعة وعن البنات .. وعن تخصص كل وحده منهن .. لين ما تذكرت مريم عرس ولد خالتها..خليفه..



مريم: هيه صح تذكرت.. متى عرس خليفه
فطيم: والله قريب ان شاء الله .. امممم قولي عقب شهر
مريم: يعني ما في وقت انفصل للأسف
فطيم: هيه ما اعتقد.. والله نحن قايلين لكن من فتره.. انتن تأخرتن
مريم: والله ما شي وقت .. تعرفين الدراسه وبلاويها
فطيم: هيه طلعي حجج وقولي ما بيي العرس بعد
مريم: هيييه يستوي ما احظر
فطيم:هيه تصدقين لا تيين ..بذبحج مريوم لو ما ييتي
مريم (وهي تظحك) : هههههههه فديتج والله ان شاء الله بنيي لا تخافين
فطيم:هيه اتحريت بعد
مريم: انزين عيل اسمحي لي الغاليه بسكر عنج الحين.. ما ابا اطول عليج
فطيم:لا مسموحه الغاليه .. افا عليج خذي راحتج
مريم: مع السلامه
فطيم:مع السلامه
سكرت فطيم عن مريم وسارت فطيم تيلس مع اخوانها غيث وسيف شوي.. وتسمع سوالفهم اللي ما تخلص وكيف علقوا على هذا وكيف سوو مقلب في هذا

مهره توها راده من الجامعه ومنهد حيلها.. وصعدت على طول حجرتها وانسدحت عالشبريه من دون ما تبدل ثيابها .. مريم دخلت عليها

مريم: مهاري قومي بدلي
مهره: مب متفيجه
مريم: قومي بسرعه
مهره: مطره وصلت ؟؟
مريم: لا بعدها .. قومييييييييييي
مهره: على شوه مستعيله انتي؟؟
مريم: قومي بنسير فلة عمي
مهره: ليش؟
مريم: عاشه ويا ولدها وصلوا قبل شويه
مهره :حلفييييييييي
مريم: والله
مهره: انزين ببدل وبيي
مريم: ما بتتغدين ؟؟
مهره: بسير بيتهم اتغدى
مريم: احسن بعد يالله ..


في فلة بو مبارك ..

مبارك: حمد يوز عن اخوك ..
حمد: شوه هالبيييييييييت .. خلونا نستانس
غانم: خله ابويه شكله مب مصدق
ساره: ايده صغيره
حمد: عيل تبغينها كبر ايدج
ساره: والله ايدي حلوه بعد
حمد: انزين بس هو احلى
ساره: عادي يشبهني

نش غانم بيظهر ..

مبارك: وين ساير؟؟
غانم: بسير اشرب ماي وبرجع
ساره: وين امايه
مبارك: برع
ساره: بسير اشوفها
مبارك: توج تذكرتيها ..
ساره: هيه شسوي ؟؟ من شفت حمودي تخبلت .. حلوووووووو

وركظت ساره برع ..

غانم كان يتمشى فالحوي .. عقب الكبت اللي كان فالمستشفى .. اللي يكرها .. ويكره سيرتها .. يحس انها اخس من السجون اللي يرمسون عنها الناس
.. اتعس ايامه يقضيها في هالمستشفى بين ريحة الادويا والأطبا والسسترات ويحس انه ضعيف يوم يشوف ان في بعض الاوقات يكون محتاج فيه للي حوله ..

مهره: احم احم
مريم: هلا والله
غانم (ابتسم): اهلين .. شحالكن ؟؟
مهره: تمام .. انته شحالك؟؟ عساك بخير
غانم:الحمدلله ..
مريم: ويييييييينك ؟؟ الحمدلله عالسلامه
غانم: الله يسلمج
مريم: هديتك وصلت فالمستشفى مب تقول ما طرشتها لي مريوم
غانم:ههههههه وصلت وعمي مايد كلها
مريم: احلف
غانم:والله .. شل السله كلها بيوزعها عالاطبا عسب امايه ربت .. بس تعالي انتي جيه مطرشه اصلا ؟؟ متعبه عمرج .. الا هي كم ساعه رقدت فيها ..
من الصبح وتوني العصر ظهرت
مريم: كيفيييييييييييي .. بس والله حلوه هاي انا اخسر بيزاتي واشتري لك هديه لانك طالبنها مني .. وهالمايد يشلها عالجاااااااااهز
غانم:بسم الله .. هههههه .. حلال عليه
مريم: لا مب حلال منوه قال
غانم:ههههههههههه انزين هي هديتي خلاص انا حللتها
مريم: انا اللي شارتنها .. خل يرد والله اخليه يسير يشتري لك سله باتشي وايييبها
مهره: زين يوم سلطان ما شلها والا كانت بتلقى عقاب اكبر ويفشل اكثر
غانم : منوه قالج ؟؟ عمي سلطان بعد شل منها .. بس حقه مب حق ربعه
مريم: انا برويهم .. خل بس يوصلون
غانم: ههههه عندج اياهم استلميهم
مهره: لا تقويها انته بعد .. والله فضيحه مريوم خلاص غانم حلله عليهم
مريم: ما يخصني .. وعاد خاصة هذا سلطان بطلعه من جبده .. لانه امس تم يحط عليه ..
غانم: افاااااااااا يعني فاتتني اليلسه
مهره: يوم واحد بس دخلت المستشفى .. تفوتك يلسه ولا ااحلى ..
غانم: ما عليه اليوم بيكون احلى

مشت مهره ووياها مريم .. دخلن الصاله ..

مريم (بصوت عالي ): السلااااااااااااام عليكم
الكل: وعليكم السلام
سلطان: مول ما صدعتينا بصوتج
مهره: اوه انته هني ههههههههه ..
سلطان: لا هناك؟؟ ليش ؟؟
مريم: انته يالدب .. جيه تاكل من الباتشي اللي طرشته حق غانم؟؟
سلطان: اي باتشي؟؟
مريم: شوه اي باتشي بعد ؟؟ انكر انكر .. متعودين على جذبك
سلطان: والله ما اذكر
مهره: ليكون مريومه انتي ما مطرشه
مريم: والله اني طرشت والله
مهره: عيل سلطان انته تذكر
سلطان: هيييييييييييه اليوم الصبح تقصدين ..
مريم: هيييييييييه زين يوم تذكرت
سلطان: والله مال ولد اخويه كيفي
مريم: فعينك .. انا شارتنه له
سلطان: روحج قلتيها .. شارتنه حق غانم .. يعني استوى ماله .. وهو عطاني كم حبه بعد .. يالزطيه

وتوها عاشه نازله من فوق ..

مريم: هلا .. هلا والله هلا بأم غانم هلا
عاشه: اوه شوه في اليوم ؟؟ الترحيب قوي
سلطان: اونها تغايظ .. مالت
مريم: عليييييييييك
مهره: شحالج عاشه
عاشه: بخير الحمدلله .. انتن شحالكن
مهره: تمام .. مبروك عليج محمد الصغيروني
عاشه: الله يبارج في حياتج ..
مريم: وينه ؟؟
عاشه: فالحجره ..
مريم: سيري ييبيه
سلطان: لااااااااااااااا عن يحسدونه بعض الناس
عاشه: منوه بيحسده
سلطان: في ناس عيونهم حاااااااره
مهره: هاي نغزه .. يا حقي او حق مريوم
سلطان: الثانيه صح
مريم: اقول بسير بيتنا .. يوم الضيوف اللي عندكم بيسيرون زقروني
سلطان:هههههههههههه حلوه .. ان شاء الله هالضيوف بيلسون هني على طول ولا بيظهرون ... عنادا فيييييييج

وظهرت مريم وعاشه تزقرها .. ويلست مهره ..

عاشه: سلطان حرام عليك
مهره: خليها عادي مب شي يديد
غانم:هههههه كسرت خاطريه
مهره: مب انته كنت تبغي تشوف من هالمواقف
غانم: هيه بس مب انها تطلع من هني
مهره: الحين بترد .. عقب 5 دقايق بتشوف .. يالله وين حمود؟؟
عاشه: دقيقه بسير اييبه .. لو خلوني حمد وساره الحين
سلطان: شليه غصب .. هالاثنين بيذبحونه اليوم

فطيم: اقولج ظهري برع
روضه :انزين بس ابغي اشوف هذا
فطيم: رويض ظهري برع .. الحييييييين وبسرعه
روضه: اوهووووووو
فطيم: والله بزقر لج خليفه
روضه: زقريه
فطيم: خلييييييييييييييفه
روضه: الله ياخذ عدوج .. ايه كنت اتغشمر
فطيم: انزين انا برويج .. خليييييييييييييييييييفه

ووصل خليفه ..

خليفه: شبلاكن ؟؟
روضه: ما شي
فطيم: قول لها تظهر برع .. لعوزتني
خليفه: روضه شوه تسوين انتي هني ؟؟ ما وراج مذاكره ؟؟
روضه: توها بداية السنه ..
خليفه: انزين واجبات ..
روضه: مال اول واجبات .. نحن الحين ثانويه عامه
خليفه: انزين روحج قلتيها ثانويه عامه .. نشي بسرعه ظهري ..
روضه: خلاص بسير تحت عند امايه
خليفه: امايه قبل شوي ظاهره ..
روضه: وانته كاشخ وين بتسير؟؟
خليفه: ما يخصج
روضه: انزين ما يستوي جذه .. اتم روحي يالسه
خليفه: نزلي تحت .. غيث وسيف يالسين اسولفي وياهم
روضه: اوه .. ما طالعين من البيت ؟؟ غريييييييييبه.. ليش؟
خليفه: سيري سأليهم ..
روضه: اكيد بسير .. جاو

ظهرت روضه من الحجره ووصلت لين الدري ووقفت فوق .. وقامت تصارخ ..

روضه: غييييييييييييييييييييث
غيث: نعم
روضه: انتوا هني
سيف: والله سؤال سخيف .. لا ترد عليها
غيث:هههههههههه هييييييييه
روضه: اوكي

ونزلت تحت ..

سيف: ليش ييتي
روضه: كيفي
سيف: سيري فوق
روضه: I don’t want
سيف: الحين بنظهر
روضه: why you are here still now??
سيف: ما لج خص
روضه: I didn’t ask you
سيف: غيث معطني تصريح
غيث: شوه تبين الحين ؟؟
روضه: ليش مب ظاهرين ؟؟
غيث: خليفه ما مخلنا
روضه: حلفواا هههههههههههههه مساكين
غيث: لين الساعه 6 بس .. وعقب بنظهر .. بتخلص مدة العقاب
روضه: يعني عندي فرصة لين 6 ايلس وياكم
سيف: لا ما عندج .. ما نبغيج تيلسين معانا
روضه: مب بكيفك .. بيلس ويا غيث مب وياك
سيف: اوه اخويه كيفي
روضه: واخويه بعد
سيف: توأمي .. يالله رمسي قولي شي .. ما ترومين .. خلاص جب
روضه: don’t talk to me
سيف: الحين يوم ما عرفت شوه تقول .. قالت لا ترمسني ..
غيث: خلاص اسكتوا انتوا الاثنين
سيف: اختك تقهر
روضه: انته اكثر ..
غيث: وينها فطيم عنج ؟
روضه: فوق طردتني من الحجره .. وزقرت خليفه بعد
سيف: ههاااااااي زين سوت فيج
روضه: عالاقل من الحجره طردتني .. مب حابسيني فالبييييييييت
سيف: رويض ان ما سكتي عني بقوم لج
روضه: OH no I afraid
غيث: رديتوا بعد
سيف: جيه متى خلصنا عسب نرد ؟؟ هاي اذا ما نشت من هني ما بنخلص
روضه: اووووووه قلت لكم ملانه ابغي ايلس ويا حد ابغي ارمس اسولف .. شوه هالحاله
غيث: انزين رمسي رمسي
سيف: من زين رمستج والا سوالفج عاد



سلطان: ايه بس خلاص سيري بيتكم
مهره: ههههههه انته شلك ؟؟ بيت عمي
سلطان: ذبحتي ولد اخونا
مهره: هاهاها ما يظحك .. تغار ساكت فديته عندي
سلطان: الحين مايد بيي .. سيري ازقري اختج ..
مهره: هههههه الضيوف بعدهم ما ساروا .. تستحي تيي
سلطان: عداااااااااال
مهره: وبعدين مايد بيي .. انزين وخير ؟؟ ليش ازقر مريوم ؟
سلطان: جيه بس انا كلت من الباتشي اللي يايبتنه اختج الزطيه ؟؟ مايد شل السله كلها ..
مهره: ويعنيييييييييي ؟؟ تبغيني ازقر مريومه عسب تبهدل مايد فضيحه
سلطان : وانا ليش خليتيها تبهدلني
مهره: انته عادي
سلطان: هيه طوفه عبيطه انا
مهره:ههههههههههههه محد قال عنك شي .. روحك ترمس عن عمرك
سلطان: ييبي ولد اخويه
مهره: تعال شله بسير بيتنا انا الحين
عاشه: وين سايره ؟؟ تمي
مهره: لا شوه ؟؟ الحين كلهم بيوون ..
عاشه: منوه كلهم ؟؟ مايد ومنصور بس ..
مهره: منصوركم كفايه .. بسير بيتنا مع السلامه
سلطان: ايه اخويه ما ياكل
مهره: ما استبعد هالشي ..
غانم: احم احم
سلطان (ورفع راسه فوق يستعبط): اوه نسينا محامي الدفاع يالس هني
غانم: بلاه عمي منصور؟؟
مهره: ما بلاه شي .. خليناه حقك .. سلم عليه انزين
غانم: افااااااا علييييييييييييييييج يبلغ ..
مهره: ويه صدق .. لا تسلم عليه ولا شي ..
غانم:ليش؟؟
مهره: على مايد سلم من اليوم لين باجر اما منصور .. لا شكرا لخدماتك لا توصل له السلام
غانم:حرام عليكم .. والله طيب
مهره: طيب وياك مب ويانا
سلطان: ابغي اعرف شوه مسولج ؟؟
مهره: ما مسوي لي شي .. ولا ابغيه يسوي .. ولا يقدر يسوي اصلا
سلطان: دامج تعرفين انه ما يقدر بس يقول شي حق آل مهره و تزعل .. جيه تخافين منه
مهره: تبغي الصراحه .. اخوك هذا فلم رعب متنقل .. يالله سلام

وتم سلطان يظحك من الخاطر على رمسة مهره .. وغانم مبتسم ..

جريب المغرب ..

العنود: ملل متى ايي يوم الاربعااااا
موزه: باجر
العنود: امايه شرايج باجر ما اداوم
موزه: وليش ان شاء الله ؟؟
العنود: بس .. تعبت من الدرااااااااسه
موزه: والله ؟؟ سيري قولي حق ابوج هالرمسه
العنود: لا لا خلاص بندااااااوم
موزه ( ابتسمت): زين عيل
العنود: وين مزنه ومزون ؟
موزه: راقدات
العنود: افففف كله يرقدن
موزه: شوه تبغين بهن ؟
العنود: اريد العب وياهن والعوزهن
موزه: لا الله يخليج يا عنّوده خليهن رقوووووود ما فيه عالحشره
العنود: بس شويه
موزه: ما توعينهن
العنود: شوييييييه انزييييين ملانه
موزه: اذا وعيتيهن بزقر لج ابوج من تحت
العنود: امااااااااااايه .. شوه تزقرين ابويه
موزه: عيل هديهن
العنود: ملاااااااانه ملاااااااااااااانه
موزه: سيري عند فهد
العنود: فهد يذاكر
موزه: سيري عيل عند ابوج
العنود: ابويه تعرفينه .. لو شافني للحين مب متسبحه ولا لابسه بجامتيه .. بيهزبني
موزه: زين يوم ذكرتيني .. نشي بسرعه عيل سيري تسبحي .. يالله بيأذن العشا تعشي وعقب عالفراش
العنود : انزييييييييين

تحت فالصاله ..
سهيل: سيرة دبي الغوها باجر انزين
فهد: لا .. كله ولا سيرة دبي .. تريدون ودونا يوم ثاني والا هب ياي وياكم بسير دبي انا
سهيل: خييييييبه شوه مسوين بك هل دبي .. ساحرينك ؟
فهد: من متى ما شايفينهم
سهيل: لا في هاي معاك حق .. من اسبوعين ما وديتكم صوب دبي .. خلاص الطلعه تتأجل عيل بس مواعد العنود
فهد: عادي لا تقول لها انك كنت ناوي باجر تودينا
سهيل: امك وين ؟
فهد: اكيد ترقد مزنه ومزون
سهيل: آه ويا مزنه ومزون .. هالهنتين .. ظهروا لي قرون
فهد: الا العنود غريبه ما نزلت للحين ..

وتوها العنود نازله من فوق ..

العنود: انا هني .. سمعت اسمي ..
فهد: وصلت الحشره
سهيل: شوه تسوين فوق ؟؟
العنود: كنت يالسه ويا امايه .. ملانه شسوي
سهيل: وامج وين الحين ؟؟
العنود: ترتب وتسوي اللي خربوه بناااتك
فهد: وينهن ؟؟
العنود: رقوووووود
سهيل: الله يعينا على حشرة الليله عيل
العنود: احسن عسب تحسون يوم ان نحن نسهر حليلنا ما نسوي هالحشره .. اما المخربات الهنتين .. يدمرن الدنيا ولا تقولون لهن شي
سهيل: اريد اعرف .. من وين متعلمه طولت اللسان هاي ؟؟
العنود: بسيطه من خالوه مريوم
سهيل: عييييب يا بنت عييييييييب ترمسين جذه عن خالتج
فهد: هههههه لو تسمعج خالو مريم جان بهدلتج
العنود: انزين باجر بسير وخل تبهدلني

(*•.¸(`•.¸ الجزء الثالث¸.•)¸.•*)


فدبي ..
مطره .. بندت اللاب توب .. وفصخت نظارتها الطبيه .. وانسدحت عالشبريه ..

مهره (دخلت عليها) : مطرووووووه
مطره :بسم الله .. انتن ايه شوه هالحشره
مهره ( صدت يمين ويسار): منوه تقصدين بأنتن ؟؟
مطره: انتي وبنت عمج .. ريسه
مهره: بلانا؟؟
مطره: ما تعرفن تدخلن الحجره بهدوء ؟؟
مهره: اوووه الحين تعالي
مطره: وين
مهره: تحت
مطره: ليش؟؟
مهره: اخويه الحبيب .. وولد عمج الكريم .. عازمينا عالعشا
مطره: يعني بتظهرون .. مب يايه
مهره :ياريييييييييت لو بنظهر .. مينونه انتي .. تبغين محمد وسلطان يظهرونا ..
مطره: هيه انا استغربت .. عيل كيف بيعشونكم
مهره :شوه بعد كيف ؟؟ هذا سؤال تسألينه .. بيسيرون يشترون عشا من برع وبيردون
مطره: انزين وانا ليش انزل ؟؟
مهره: تعالي اختاري من وين تبغين ؟؟ لان انا وريسه ناوين نخسرهم صدق
مطره: اختاروا من اي مكان .. بس يكون حلو
مهره: نزلي انزييييييين سلطان معاند السخيف .. اونه خل مطره تنزل وتختار وياكن ما يستوي ما تختار .. اوووووونه الحبيب يخاف عن يظلمج ويكون هو
الظالم
مطره: ههههههه والله انه سوالف
مهره: الا قولي سخيف .. يالله لا تذليني بتنزلين والا ؟؟
مطره :يايه سبقيني تحت
مهره: اوكيييييك

سلطان: يالله يالله شمعنى يعني تشيليز ؟؟
مريم: يا تطلب لنا من مكان عدل او ما تطلب
سلطان: احسن ..
ريسه: نحن نبغي
الريم: طلبوا من مطعم الدار وخلاص
ريسه: مطعم الدار .. حلو تاكلين هناك مب فالبيت ..
سلطان: وتشيليز حلو تاكلينه هني ؟؟
ريسه: هيه
محمد: بسرعه طلبن وخلصونا
سلطان: يوم اقولك محد يعطيهن ويه .. بس انته لا حرام ونحن كل يوم نظهر وخل نطلب لهن هالمره .. شفت كيف
محمد: هههههه والله انا قلت حليلهن كاسرات خاطريه .. مهره امس قالت لي
سلطان: هيه انا قلت .. مب من الله بعد محمد بيخسر عمره وبيخسرني .. هذي وصلت آل مهره
مهره: بلاك انته محتشر علينا
سلطان: ولا شي .. بس شوه تبغن ؟ من وين ؟
ريسه: مهاري .. يقولج اخترنا تشيليز
مطره: لا ما احبه تشيليييييز
سلطان: خلااااااااص مطره قالت ما تبغي تشيليز ..
مهره :مب بكيفكم .. تشيليز اوكي .. طلبوا لنا من تشيليز ومطره من مطعم ثاني
سلطان: شوه تتمصخرين انتي ؟؟ على حسابكن نحن
مطره: ما يعيبني انزين
محمد:عيل من وين تبغين ؟؟
مطره: اي مكان
الريم: والله انا قلت لكم مطعم الدار
ريسه: انتي اييييييه .. ذليتينا على مطعم الدار مالج
مريم: هههههه شوه الاخت حلمانه في اكل الدار؟؟
الريم: لاااا .. بس احسن .. حلو ويعيب الكل
مريم: طلبوا من اي مكان .. ما تفرق عندي بس المهم ناكل

وتوها عاشه حرمت مبارك وصلت وهي شاله ولدها ..

الريم: حراااام عليج .. جيه يبتيه
عاشه: شسوي هذيلاك رقدوا ملل .. وانتوا متيمعين هني شوه عندكم ؟؟
ريسه: عبود فالبيت ؟؟
عاشه: هيه ويوم شافني بظهر بيي هني .. قالي اقول حق سلطان ومحمد بسرعه ..شوه السالفه ؟؟
مريم: اخو ريلج وولد عمه عازمينا عالعشا
عاشه: يالخونه .. جيه ما عزمتوني عيل
سلطان: افا علييييييييييييج كله ولا عاشه كم حرمت اخو عندنا الا وحده
مطره: ههههههههههه حلوه هاي
عاشه: لااااااا .. الحين عاد تذكرت
سلطان: هالحشره نسّوني والله
محمد: يالله عاشه بتختار من وين تبغين ؟؟
عاشه: ليش من وين اخترتن ؟؟
سلطان: انتي من وين تبغين ؟؟
عاشه: عادي اي مكان .. المهم آكل
الريم: هاي ظهرت شرات مريوم
مريم: قلت لكم اهم شي البطن ينترس .. مب مهم بشوه المهم ينترس
سلطان: سيري سوي لج سندويج جبن عيل
مريم: لا عاد مب جذه .. وبعدين انا ما طلبت منك انته تدفع اخويه بيدفع
محمد: بسسسسسس خلاص .. .سلطان نش
مهره :من وين بتطلبون لنا ؟؟
محمد: من تشيليز .. وحق مطروه والريم من الدار ..
سلطان: متفيج والله
محمد: نش .. عن يقولن بعد طلبنا وما ادري شوه وذلونا عالأكل .. وما طلبوا اللي نبغيه
مطره: افا انا اقول جذه
الريم: والا انا ؟؟
محمد: انتن ما تقولن .. بس اللي وياكن يقولن .. يالله سرينا ..


محمد وسلطان وهم ظاهرين .. شافوا مبارك ومايد ..

مبارك: على وين العزم؟؟
محمد: بنسير نشتري عشا حق البنات
مايد : اكيد على حسابهن .. هههههه ما احيدك لا انته ولا اللي وياك كرما
محمد: افاااااااااااااااا .. انا مب كريم
مبارك: لا محمد كريم تطلع منه .. اما سلطان ما اظن
سلطان: اوهوووو يعني شوه شايفيني ؟؟
مايد: ما ادري اسأل روحك
سلطان:محمد نسير نسير .. والا بغير رايي
محمد: عصب اونه .. ههههه يالله نسير
مبارك: لحظه .. العاش عندكم
محمد: هيه داخل
مبارك: مشتركه في هالمؤامره وياهن والا
سلطان: عيل عاشه ما بتشترك في مؤامره فيها خساره و أكل
مبارك: انته يالزطي ... عن توقف اللقمه هني حقها .. ما تبغي انزيييييين روحي بسير اشتري لها
محمد: ليييييييش ؟؟ ليييييييش؟؟
مبارك: ما تشترون لها ..
سلطان: ط هذاااااااا
مبارك: هيه عيل
محمد: عن هالحركات .. بشتري لها
مبارك: اصبروا بعطيكم ثمن اكلها
محمد: لا تسخف .. والله ما عطيت .. جيه شوووووه
مبارك: لا عقب تعايروني انكم اشتريتوا لها
سلطان: بقولك .. هي طلبت مني مب منك .. يوم بتطلب منك سر اشتر لها .. يالله يالله محمد نسير ..
مايد:ههههههههه انزين اشتروا لي انا بعد .. على حسابك سلطان
سلطان ( اطالعه بنظره): ان شاء الله
محمد: هههه انا بدفع .. الحساب كله عليه .. مبارك مب تسير فلتكم .. اتريانا تعشى ويانا
مبارك: اذا على حسابك انته اوكي .. اما على حساب هذا لا
محمد: على حسابي على حسابييييييييي
سلطان: فضحونا والله
مايد: ههه روحك فضحت عمرك
سلطان: بسير ازقر عبود وبيي
محمد:اترياك فالسياره ..
مبارك: اتصل له رنه
مايد: يخاف عالرصيد
سلطان: مب متفيج لكم .. بسير الحين .. يوم برد بتشوفون كيف بقطعكم ..
مبارك: سر سر انزين .. عن المطاعم كلها تبند

مايد : بتسير بيت عمي والا بيتنا ؟
مبارك: لحظه قبل ما توديني هني والا هناك
مايد: شوه ؟
مبارك: غانم
مايد: قلت لك ما عليه شر ان شاء الله
مبارك: انته شفت ملفه ؟؟
مايد: هيه اكيد
مبارك: بس هالمره طيحته كانت قويه
مايد: مبارك الله يهدااك .. اي قويه مثل كل مره .. بس انته تحس انه تعب زياده .. لانك لاهي كنت ويا حرمتك هي من صوب وغانم من صوب
مبارك: لا ما اعتقد
مايد: بلى .. ولو كان في شي .. انا كنت بقولك .. ما بدسه عنك ..
مبارك: متأكد
مايد ( ابتسم): متأكد .. المهم سويتوا فحص لآخر العنقود ؟؟
مبارك: هيه اكيد .. الحمدلله ما فيه شي
مايد: الحمدلله .. يالله اي فله تبغي ؟؟
مبارك: نختار بعد عكيفنا
مايد: تبغي تيلس هني .. والا هناك والا ففلة عمي كيفك هههههههه
مبارك: ودنا صوب البنات .. خل نشوفهن ونسألهن عن اخبارهن
مايد: يالله عيل ..

في فلة بو مبارك .. تحديدا في حجرة غانم ..
غانم كان يالس ويسولف ويا عمه منصور ..

منصور: وين تبغي تظهر باجر ؟؟
غانم: ما ابغي اظهر
منصور: ليش؟؟
غانم: باجر بيرتبشون لان اللي عقبه اجازه .. فبيلس وياهم احلى
منصور: انزين باجر الصبح عندك موعد فالمستشفى
غانم : ما بسير
منصور ( عقد حياته): عكيفك هو
غانم:هيه ما بسير
منصور: غانم انته مب ياهل تعاند
غانم: باجر انا مواعد ابويه بظهر وياه الصبح
منصور ( ابتسم): هيه مدام بتظهر ويا ابوك خلاص ..
غانم: ليش ابتسمت ؟
منصور: ما شي
غانم: والله تقول
منصور: لان ابوك ما بيوديك مكتبه من دون ما يوديك المستشفى
غانم: اكييييييد انته قلت له
منصور: انا ما قلت له شي . يعني ولده وعنده موعد .. ما بيذكره .
غانم :اففففففففف
منصور: هههههههه تضايج بس هذا كله عسب مصلحتك
غانم: انزين انزين
منصور: بلاك جلبت عليه
غانم: ما فيني شي .. بس ابغي ارقد
منصور: يعني طرده
غانم: لا .. مب طرده .. بترقد هني ارقد .. ما عندي اي مشكله
منصور: خلاص برقد هني
غانم: حياك



في بيت بو خليفه ..
روضه كانت يالسه ويا امها فالصاله وتجلب في هالقنوات .. وسيف من صوب منسدح وغيث يالس حذاله ويلعبون بمبايلاتهم ورنات وما ادري شوه .. وخالد
يالس يطالعهم ..

غيث: سمعت الرنه اللي كانت عند حمّود
سيف: هيه خذتها منه
غيث: حلوه طرشها لي
سيف: اصبر ..
خالد: بسكم من هالمبايلات
روضه: ما يشبعوووووووون
ام خليفه: رويض قومي سيري رقدي
روضه: اماااايه توها 10
ام خليفه: انزين وباجر وراج مدرسه
خالد: ثانويه عااااااامه يقولون
سيف: هالياهل بعد وصلت ثانويه عامه
روضه: محد رمسك انته
خالد: سيري رقدي انزين
غيث: طرش الرنه
سيف: انزييييييييييين ما فيك صبر
غيث: انته طرشها وعقب سولف
ام خليفه: ونتوا بعد سيروا رقدوا
سيف: من الحييين؟؟
ام خليفه: هيه تيلسون شوه تسوون ؟؟
سيف: نتريا خليفه
خالد: ليش؟
غيث: فطيم وين ؟؟
روضه: In her room
خالد: بسير اشوفها لاني اليوم ما شفتها .. وعقب بسير ارقد
ام خليفه: وانا بعد بسير حجرتيه
سيف: شلي بنتج وياج
روضه: يا ربييييييي .. انا مب يالسه عجبدك
سيف: قلتيها روحج .. الا يالسه على جبديييييييييي
غيث: سيييييييييف
سيف: هااااااااااا هههههههه انزين بطرشها الحين والله خلاص
غيث: ما ترمس اذا رمست يا ويلك طرشها قبل
سيف: انزين خلاص بسكت .. ( وحط ايده على ثمه )

مهره وريسه يسولفون عن الجامعه وبلاويها .. اما مريم ويا الريم يالسات ويحشن في هاي وهذيج .. ومطره شاله محمد الصغير وتلعبه وعاشه ومبارك ومايد
يسولفون حذالها ..

مريم: وععععععععع هاي عاد موووول ما ادانيها
الريم: طيبه
مريم: طيبه اونه .. وايد شايفه عمرها
الريم: انتي ما جربتي تيلسين وياها
مريم: ولا بجرب
الريم: انتي الخسرانه
مريم: شووووووه بخسر .. مالت عليها
مهره: وينهم تأخروا
ريسه: واااااااايد
مايد: هالهنتين .. لو يوم واحد ما كلن .. ظنكم شوه بيستوي بهن ؟
مطره: لا تقووووووول .. بيجلبون البيت فوق تحت
مريم: الا بياكلونا نحن
مايد: ما استبعد
مهره :انزين يواعه
ريسه: خليهم هذيل كل شي عندهم حرام .. تيوعين حرام تعطشين حرام .. كل شي حرام في حرام
مبارك: تتريون العشا اللي بالذل سايرين اييبونه لكن
مهره: لا والله ..اخويه من قلبه اما اخوكم بالذل
مبارك: ههههههه في هاي صدقتي .. سلطان بيذلكن عالعشا من باجر بيبدأ المعاير
مريم: بشتري له بيبسي من الدكان وخلاص
مايد: ههههه وايد كريمه بنت عمي
مريم: بعد شوه يبغي
مهره: انا بقولج ..ما بيوقف المعاير الا يوم تسوين له غوزي
مريم :آسفه .. انا مب مال مطابخ
مايد: هيييييييهأ يا بنات اليوم .. كاس ماي ما تعرفن تحطنه فالصينيه وتقدمنه بعد غوزي
ريسه: لو سمحت
مهره: مب جنه غلط وايد
مريم: جنه
مبارك: تآمرن علييييييك
مايد: اقول فيه رقاد .. خلاص ما ابغي العشا
مطره: هههههه حليلك يالدكتور
مهره :هيه صح على طاري الدكتور .. مايد كيف انته استويت دكتور
مايد ( تم يطالعها بنص عين): نعم ؟؟
مريم: لا لا انا عندي سؤال .. يعني ما تلوع جبدك يوم اييبون واحد توه مسوي حادث وكله دم وما ادري شوه
مايد :لا ما تلوع جبدي .. كم يسوى يوم انج تساعدين شخص وتنقذينه من الموت .. وتفرح عايله بكبرها ..
مهره: هيه صح
مريم: بس لوعة جبد بعد
مايد: شوه لوعة جبده ؟؟ بالعكس حلو
مريم: حلو اييك واحد مصارينه طالعه وواحد ما ادري شوه ويييييييي وعععععع
ريسه: ههههههه يبالج يوم واحد تحضرين عملية من عمليات مايد ..
الريم: هيه مايد شلها ودها وياك يوم واحد .. دخلها غرفة العمليات
مريم: وععععععع لو الموووووووت ..
مايد: هههههه عاد اللي يقول بوديج انا .. يغمى عليج .. اجابل اللي يايبينه والا اجابلج ؟
مهره: حلوه مهنة الطب .. حليلنااااااااا نحن .. بغينا نكمل ما خلونا
مايد: هيه سمعت انج كنتي تبغين تدرسين طب .. ويييييين تبيييييييييييين؟؟
مهره: نعم نعم ؟؟ شوه وين ابا ؟؟ يعني حلال عليكم وحرام علينا ؟؟
مبارك: انا اشجع ان الحرمه تدرس طب
مهره: قول والله ؟؟ عيل ليش ما رمست يوم بغيت ادرس
مبارك: ما كنت اعرف
مايد: وانته بعد وياها ؟؟ ليش ان شاء الله تشجع ان البنات يدرسن طب
مبارك: ترضى اذا حرمتك والا اختك مسويه حادث والا فيها مرض .. ودكتور يسوي لها العمليه ؟؟ شفت .. ما يستوي ..
مريم: والله في نصهن ما يسون العمليات لان ريال
مايد: بس بعد .. مب حلوه تدرس طب .. الطب يا يكون هني فالبلاد او برع احسن الدراسه .. ومستحيل طبعا البنت تدرس برع .. وعقب يوم تيي
تشتغل خلط
مبارك: كل وحده محترمه محد بيي صوبها
مهره: عاااااش ولد عميييييي عاش بو غانم .. والله لو كنت اعرف جان ييتك توقف وياي يا ربييييييي لا تخليني اندم ( وبرطمت)
مايد: هههه زين يوم ما عرفتي عيل .. هاللي ناقص .. يالله يالله ما عندنا بنات يدرسن طب
مهره: والله جان ابغي لا تخليني اسويها .. واطلع من الجامعه واسير ادرس طب
مايد: والله حلفي ؟؟
ريسه: هيييييه انته .. الله يخليك اسكت تسويها هاي
مريم: لا تخربها علينا ..
مطره: لا تتحداها ..
الريم: خلها للحين عقلها فراسها ..
مايد: خييييييييييييييييييييييبه .. كل هذا .. يعني تسوينها ؟؟
مهره :اسويها وانا بنت محمد واخت محمد ..
مبارك: بل علييييييج ..
مريم: مايد بليز بليز لو سمحت
مايد :خلاص ابويه لا نتحدى ولا شي ..
مريم: الا على طاري بو غانم .. غانم وينه ؟؟
عاشه: صدق غانم وينه ؟؟
مايد: كان منصور يالس وياه يوم نحن يايين
الريم: اسير ازقره
مريم: هيه .. زقريه خل ايي ويانا سوالف
مهره: لا الله يخليج لا تزقرينه .. اخافه فلم الرعب المتنقل ايي وياه
مايد: منوه فلم رعب متنقل ؟؟
ريسه: منصوووووور
مايد: ايييييي انتييييييي تغلطين على اخويه بعد عيني عينك اثنين خوانه هني وهنتين خواته
مهره: والله بتزقرونه بسير حجرتيه ..
عاشه: ههههههه والله تظحكين .. حليله منصور ..


الصبح .. الساعه 11.30 .. فالمستشفى ..

مبارك: خلصت ؟
غانم: هيه
مبارك: شوه قالك ؟؟
غانم: ولا شي .. مثل كل مره
مبارك: انزين بدخل عند الدكتور وبرد لك
غانم: ابويه .. الدكتور ما قال شي يديد .. مب لازم تدخل
مبارك: ابغي اطمن ( وحرك كرسيه وسار صوب حجرة الدكتور)

ووصل مايد ..

مايد: ها .. شوه الاخبار ؟؟
غانم: مثل كل مره
مايد :وبلاك تقولها وانته مبوز
غانم: ماشي
مايد: وابوك وينه ؟
غانم: عند الدكتور
مايد: شفييييييييك
غانم: قلت لك ما فيني شي

ووصل حمد ..
حمد ربيع مايد .. وهو يداوم ويا مايد في نفس المستشفى .. سوالف وظحك .. صح ان شغلته متعبه .. بس هو يحبها ..

حمد: اهلييييييييييييين
مايد: هالاهلين لي والا لغانم ؟؟
حمد: طبعا حق غانم .. عيل انته شبا بك .. بس شبعنا من ويهك فالمستشفى 24 ساعه مجابلنا بعد تبغينا نقولك اهلين
غانم: ههههههه عاد اللي يقول انا مب 24 ساعه مداوم عندكم
حمد: انته غير .. شحالك اليوم ؟؟
غانم: الحمدلله ما نشكي باس
حمد: عند اي دكتور دخلت ؟؟
مايد: تستعبط ... يعني عند منوه ؟؟
حمد: لا تقول هشام
مايد: هيه
حمد:هالهشام وايد يتفلسف كيف مستحملنه ما ادري
مايد: اسكت عن حد يسمعك
حمد: خل يسمعون
مايد: انته وين رايح ؟؟
حمد: اوه ذكرتوني .. شرايكم تييون ويايه ؟؟
مايد: وين ؟
حمد: يايبين هالصغاريه يدربون عندنا ..
مايد: وطبعا زقروك انته تعرفهم بالاقسام وكل واحد وين وما ادري شوه
حمد:شفت عاد .. قاصين عليه
مايد: تستاهل .. لان يوم يقولون لك في حاله خطيره والا شي عقيتها عليه
حمد: تعرفون ما احب الدم .. ولا احب اشوفه ..
مايد: والللللللله ؟؟ احلف.. عيل كيف تسوي عملياتك انته
حمد: مضطر .. شسوي ..
مايد: محد قالك تدخل الطب
حمد: احب هالمهنه بس ما احب الدم
مايد: ما ادري كييييييييف صبرت هالسنوات كلها لين تخرجت
غانم:ههههههههه انا بعد اسأل نفس السؤال
حمد:يالله قوموا نسير لهم .. انته شوه عندك
مايد: الحين بريكي
حمد:عيل تعال
مايد: غانم بتيي
حمد ( قبل ما يرمس غانم): عيل ما بييي .. مب بكيفه انزين ( ويره من ايده )

في قاعة الاجتماعات في المستشفى .. مجموعة شباب وبنات .. تقريبا 4 شباب و بنتين ..

محمد: ياخي شوه هذا قاصين علينا يايبينا وللحين محد شرف
علي: اصبر الحين بييون
محمد ع : ابويه نحن مال تدريب وايد ما يعبرونا يخلصون شغلهم عقب يفضون لنا ..
علي: ابغي اعرف على شوه مستعيلين .. شوه وراكم
سالم: وراهم سناتر هههههه
محمد: هيه والله اليوم انا ناوي اتغدى فالستي وادخل السينما عقب
علي: صدق متفيج ..
محمد ع : اقول سكتوا سكتوا وصلوا الدكاتره ..

حمد:السلام عليكم ..
وعليكم السلام ..
حمد: شحالكم
بخير الحمدلله .. تمام .. زينين
حمد: اسمحوا لي تاخرت عليكم .. انا اسمي الدكتور حمد
محمد: عاشت الاسامي
حمد ( اطالعه ): عاشت ايامك
محمد ع: اقول دكتور لو سمحت .. عطشانين
حمد: هههههه الحين قلت لهم اييبون لكم بااااااارد آسفين ما ضيفناكم للحين
علي: لا ما عليه ..
حمد: انزين .. انا اسمي الدكتور حمد .. والمسؤول عنكم .. بقولكم شوه بنسوي اول شي بنبدأ نعرفكم بالاقسام .. وكل قسم منوه المسؤول عنه ..
وعقب بعرفكم باهم الاشخاص يعني اذا ما لقيتوا هالدكتور وين تسيرون ؟؟ ومن وين تظهرون المعلومات اللي يطلبونها منكم وكل هذا .. وعقب بخليكم تحضرون
الجلسات .. بداية من الحالات البسيطه كسور و ضيق تنفس وجذه .. لين نوصل للحالات الخطيره .. حوادث و عمليات .. و وفاة لا سمح الله ..
محمد ع : احلى شي الحوادث
مايد ( ابتسم): تتحسب الحوادث شي حلو .. يوم بتعيش فالجو .. بتعرف شوه الحلو ..
محمد ع : لااااااااااا دكتور اقصد ان حلو يوم تساعد واحد يايبينه ومسوي حادث ..
مايد: هيه اذا جذه .. حلو
محمد : ما تعرفنا عالدكتور الثاني
حمد: هذا الدكتور مايد .. الحين ممكن اتعرف على اسم كل واحد فيكم ..

محمد: انا اسمي محمد ..
علي: علي
محمد: انا محمد عبدالله ..
سالم: اسمي سالم ..
حمد: كملوا
محمد: خلصنا
حمد: باجي اثنين .. اقصد هنتين ..

........: انا حصه ..
حمد: اللي عقبها ..
.........: وجدان
حمد: نعم؟؟
وجدان : اسمي وجدان .. وجدان عبدالرحمن
حمد: مرحبا بكن .. وحياكن الله ..


روضه توها راده من المدرسه .. وخالد وياها راد من الدوام ..

روضه: وينهم اليوم ؟؟
خالد: سيري انتي تغسلي وبدلي ثيابج عقب سألي وينهم
روضه: البيت مهجور .. وينها فطيم ؟
خالد: ما ادري
روضه: ملل
خالد : شوووووووه؟؟ انتي فيج عقل والا ؟؟ سيري بدلي وريحي عقب قولي ملل .. صدق متفيجه ..
روضه: وين امايه
خالد :اقول انا بسير حجرتيه لاني لو تميت وياج هني بتخبل ..

وتمت روضه روحها يالسه فالحجره .. وفطيم نزلت من فوق

فطيم: رويض شوه تسوين هني ؟
روضه: مب متفيجه اسير ابدل
فطيم :قومي .. الحين امايه بترد وبنتغدا
روضه: اتصل المصمم
فطيم: هيه وقال ان اليوم البروفا الاخيره
روضه: اففففف ما بغينا
فطيم: انزين قومي سيري بدلي ..
روضه: انزييييييييييييييييييييين

خليفه: السلام عليكم
فطيم: وعليكم لاسلام
روضه: اقول خليفه
خليفه :شوه ؟
روضه: عيسى ولد عموه بيدخل العرس
خليفه: والله ما سألته للأسف الشديد يوم بشوفه مره ثانيه بسأله
روضه: لاااااااااا يدخل
خليفه: وليش ما تبغينه يدخل ؟
روضه: ما ابغي البس عباتيه وشيلتيه .. عرس اخويه اوه
خليفه: وهو العروس اخته
روضه: هو ولد
خليفه: وانتي بنيه
روضه: اوهووووووووووو
خليفه: انتي وايد تتحرطمين .. وانا توني راد من الدوام .. ما فيه على حشرتج
روضه: خلاص انزين
خليفه: وانتي ليش يالسه بعباتج وشيلتج هني
فطيم: حضرتها مب متفيجه تسير تبدل
خليفه: نشي لان سيف وغيث بييون الحين .. وبتحشرون الدنيا انتي وسيف .. فـ شلّي بعمرج من الحين وسيري حجرتج ريحي وردي عقب انزلي واظاربي
روضه: صدقك والله .. عاد هالسيف I don’t know what to do with him
فطيم: نشي انزين
روضه: OK .. I will go now but when mame will come tell me
فطيم: ان شاء الله ..

وسارت روضه

خليفه: بنت انجليز ..
فطيم: ههههههه الله يخلي المدارس الخاصه
خليفه: والله قولي حق ابوج
فطيم: انا اقوله ليش ؟؟ انته ولده العود وعقبه ايي خالد وعققققب انا
خليفه: وانتي بنته العوده
فطيم: والله يعني انا من كبرييييييي
خليفه ( رن مبايله): افففففف اتصل الحشره حمّود .. هلا

محمد: خليييييييييفه
خليفه: خير ؟؟ حد قالك ان اسمي مب خليفه
محمد: وين دارك ؟
خليفه: فالبيت
محمد: تعال تغدا عندنا
خليفه: انته بقولك ما شي شغل .. متى ما بغيتني اييك ومتى لا ما اييك
محمد: هههههه بلاك عصبت يا خلوووووف
خليفه: خلوف فعينك بعرس الحين
محمد:ذليتنا على هالعرس
خليفه: هيه عيل تغاروووووون
محمد: من شووووووه ؟؟ انزين لا تغير السالفه تعال
خليفه: لا ما بيي الحين تعبان روحي .. بسير ابدل واتغدا هني ويا الاهل وبرقد وعقب المغرب جان تبغي بنتلاقى
محمد: خيييييييييبه الحين الساعه 2 الظهر اتريا لين الساعه 6 ما ادري 7
خليفه: والله كيفك .. انته بطالي لا شغله ولا مشغله
محمد: ويا ويهك .. من كثر ما تقولون لي اتصلوا .. قالوا من باجر اداوم
خليفه: مبرووووك
محمد: على شوه .. بتبدأ لوعة الجبد باجر
خليفه: والله حاله .. يوم انكم ما تبغون تشتغلون .. جيه سرتوا وخسرتوا عماركم ودرستوا برع
محمد: والله عسب يقولون ولد فلان دارس برع .. وعسب نتخقق شويه بالشهاده
خليفه: شكلكم جذه والله
محمد:ههههه جيه شوه .. لا يعني درسنا خلصنا .. خل يريحونا شوي وعقب سنه نداوم
خليفه: يا سلام على كيفكم بعد
محمد: هيه عيل ..

دخل عبدالله الصاله .. ريسه من صوب منسدحه .. و حمد ولد مبارك وياها .. وساره اخته يالسه عصوب وحاطه ايدها على خدها .. والريم سرحانه
..

عبدالله: الحمدلله والشكر ..
ريسه: الناس يسلمون يوم يدخلون
عبدالله: انتوا قلتوا حق حد يصوركم ؟؟
ريسه: ليش شوه شايفنا ؟؟
عبدالله: الله يخليكم بصوركم بالمبايل وشوفوا اشكالكم لا تغيرون الوضع ها اصبروا (وظهر مبايله)
الريم: عبود لا تصور .. تدري ان الصور ما تنحذف
عبدالله: يا بويه كنت اتغشمر
ساره: عميييييييي عبدالله
عبدالله: شوه تبيييييييين ؟؟
ساره: متى بطلعنا ؟؟
عبدالله: جيه شوه قالوا لج حبيبتيه ساره ؟؟ انا ابوج والا امج
ساره: انته عمي
عبدالله: زين يوم دريتي
ساره: والله ملل
عبدالله: اليوم الاربعا .. موزه وبناتها الحشره بييون
ساره :هيييييييه والله نسيييييييت .. يعني عنوده بتييييي آآآه واخيرا
عبدالله: شي جميل
حمد: يوعان
ريسه: توك متغدي
حمد: الغدا ما كان حلو
ريسه :والله انتوا .. ياكلون ويترسون بطونهم عقب يقولون الغدا ما كان حلو ..
عبدالله: شي جميل

منصور ( دخل الصاله ويلس) : وين غانم
حمد: في حجرته
منصور: سر ازقره
حمد: ساروه سيري ازقريه
ساره: ما ابي .. قالوا لك انته
حمد: سيري انزين ما بيستوي بج شي
ساره: ما ابي ما ابي آه
حمد: انزين اصبري انتي
منصور: حمد سر ازقر اخوك
حمد : ان شاء الله ( ونش من مكانه وسار)
الريم: منصور تبغي نحط لك الغدا ؟
منصور: لا متغدي ويا الربع فالدوام
ريسه: شوه تغديت
منصور: ليش؟؟
ريسه: انتوا دوم تتغدون من برع
منصور: جيه ما تتغدين فالجامعه
ريسه: وعععععع مب حلو اكلهم ..
منصور: خلاص عيل

حمد: غانم مب طايع ينزل
منصور (عقد حياته): ليش؟
حمد: ما ادري
ريسه: اصلا هو ما تغدا ويانا بعد
الريم: اول ما رد من المستشفى على طول دخل حجرته ولا نزل

نش منصور بسرعه .. وسار صوب حجرة غانم .. وشافه يالس يذاكر

منصور: متى الاستاذ بييك ؟
غانم: عقب شويه
منصور: ليش ما تغديت
غانم: مب مشتهي .. انته تغديت ؟
منصور: فالدوام
غانم: زين
منصور: قم تغدا
غانم: مابا مب يوعان لو يوعان كنت بنزل اتغدا
منصور: اقولهم اييبون لك الغدا هني
غانم:لا لا .. امايه ما قصرت يابته وكل شي .. ومثل ما هو نزلوه
منصور: الله يهديك
غانم ( ابتسم): يهدي الجميع
منصور: شوه قصدك
غانم: ههههه ولا شي ..
منصور: يوم بتكون في مكاني بتحس ..
غانم: حسيت .. من دون ما اكون مكانك
منصور: زين عيل

وظهر منصور من حجرة غانم وهو مضايج .. وغانم اضايج اكثر يوم شافه مضايج جذه ..


عقب ما خلصت .. وغسلت الصحون .. ردت حجرتها الصغيره .. اللي على قدها .. سمعت صوت الحشره اللي برع قالت بتسير تشوف شوه السالفه
؟؟ اكيد عيال اخوها يظاربون ..

وجدان: ايه انته وياه
علي: عموه شوفيه
وجدان: شوه فيكم
فيصل: دوري الحييييييييين
علي: لا دوري انا
وجدان: ابوكم ما سوى خير يوم انه اشترى هالبلاي ستيشن
فيصل: دورييييييييييييييي
وجدان: فيصل وعلي لو ما يزتوا الحين .. والله لأسير اخبر ابوكم .. واقوله يشله عنكم
علي: لا لا الله يخليج لا تقولين له
وجدان: حشرتوا الدنيا
فيصل: خلاص بنسكت
وجدان: انزين بنشوف ..

ويلست وجدان ع صوب .. رن التيلفون ..

وجدان: الو مرحبا ..
هند: مرحبتيييييييين.. ويييينج انتي يالدبه
وجدان: هههههه انا فالبيت يعني وين بكون
هند:اقصد ويينج ما تنشافين
وجدان: شسوي بدينا الشغل فالمستشفى
هند: قلت لج لا تدرسين تمريض .. شوفي كيف الشغل ماخذ كل وقتج
وجدان: والله لو بايدي جان درست طب مب تمريض .. لكن انتي ادرى بالظروف
هند: هيه يختي .. انزين اقولج اليوم بتسيرين مكان ؟؟
وجدان: اليوم لازم اكون فالمستشفى الساعه 5
هند: لين متى ؟؟
وجدان: الله اعلم
هند:عيل مشكلتج بيفوتج
وجدان :شوه ؟
هند: اليوم بنات الجامعه بييونا .. قلت تيييييين تشوفينهن .. يبغن يتعرفن على الممرضه اقصد سوري على الدكتوره وجدان
وجدان: تطنزيييييييين حضرتج
هند:لا اطنز
وجدان: آسفه ما اعتقد بقدر ايي ..
هند:وجدااااااان حاولي
وجدان: لو خلصت تقريبا الساعه 10.30 .. وبرد هلكااااانه .. ايي عندكم بعد .. وبعدين تدريبه جاسم ما بيخليني
هند: افففففففف اخوج ما ينطاق .. كيف حرمته مستحملتنه
وجدان: ههههههه عرس الريال وعنده عيال .. والله للأسف ما يا خذج عسب تعرفين كيف حرمته تستحمله
هند:لا الله يخليج .. خلي اخوج حقج
وجدان: هههههههه انزين
هند: حاولي انتي ..
وجدان:ان شاء الله
هند: يالله باي
وجدان: فمان الله ..

وجدان .. بنيه حلوه وهاديه .. ساكنه في بيت اخوها الوحيد جاسم .. عقب ما توفت امها وتوفى ابوها .. وهو المسؤول عنها .. اخوها متزوج وعنده
ولدين .. فيصل وعلي .. اقرب وحده لها بنت خالتها هند .. وما عندها حد ثاني غيرها .. وحرمة اخوها حامل وجريب بتربي