|
|
|||||||
| منتدى القصص والروايات يختص بالقصص بشتى أنواعها : قصص غرامية، قصص واقعية , قصص من نسج الخيال وكذلك الروايات ومغامرات الأبطال |
 |
|
|
LinkBack | أدوات الموضوع | انواع عرض الموضوع |
05 Feb 2008, 11:59 AM
|
#1 |
|
عضو جديد
تاريخ التسجيل: Jan 2008
المشاركات: 9
|
حبات السمسم <--- الروايه التي قال فيها شكسبير (ليتني انا من كتبها)
في ليلةٍ ذات نجوم لامعه ..! وحينما كان الهوى أفقي 11982 عربسات ..! ولو يبي يتكلم الجو لقال (هيا نقلبها فلّه) ..! خطرت في بالي فكرة .. وهي أن أملي أوقات فراغي بالسرقه والنشل .. تطبيقاً للمثل اللي يقول الحاجه أم الأختراع <---- اجل صارت السرقه اختراع يابن اللذينا مثلكم عارف الحال مِزري .. والجيب فاضي .. فلو ادخلت اخي القارئ يدك في جيبي لن تجد سوى حبات رمالٍ صغيره مع قشور فصفص اعاذكم الله ..! ثم ابعدت الفكره كما يبعد الرجل وهو على راحلته الذباب ..! نعم الذباب ..! وقلت يارجال ريّح ملائكتك واترك عنك هالفكره المش كويسه ..! فحاولت نسيانها ..! وأخذت ألتهم حبات السمسم المتساقطه على زوليتنا التي يحلفون أن النابغه الذبياني متعشي عليها ليلة دخول أبرهه الحبشي مكه بالفيله ولكن سرعان ماعاد إلي ملعون المترس (د. إبليس / دكتوراه إغواء وخبث وملعنه ..!) ليغويني إلى السرقه .. فتعوذت من ابليس مره ثانيه ودخلت الحمام كي اغتسل وادق النجر فلما اغتسلت سرعان ما خرجت ..! وسرعان ما رجع لي الحيوان اللي فوق وقام يغويني ويحترشني (مدري وش معناها والله بس احس لها صلاح بالسالفه ) فأخذت أعد العده لغزو الناس في اليوم التالي فانجطلت تلك الليله وبالي مشغول نطلتها يمين نطلتها يسار .. بس ماش مافي نوم .. ماني بالاولاني انت متغير علي رهيب والله رهيب أحرقني القيد ياسيدي<---- تكتب قصه والا اغاني عبدالمجيد عبدالله انت ؟ وفجأه ..! نمت ..! صحيت اليوم التالي والغمص مالي عيوني .. بدل ماهي عين صارت غين فأخذت ألتهم منها كوجبة افطار الله يجيرنا ويجيركم وخرجت مكفهرّ الوجه .. مرمّد الوجنتين .. مشحوطر الحاجبان .. مجردّب الأنف ..! وجلست أعاين يمين ويسار .. أبحث عن فريسةٍ لانتشالها .. ولم أجد سوى الخيبه اشوي الا احصّل ناس تدخل غرفه مربّعه وتطلع ومعاها دراهم ..! وكل واحد يدخل مكشّر ويطلع مبسوط .. قلت ياولد العلم وشو ..؟ لايكون فيه توزيع صدقات وانا جالس ابابي لحالي ..! دخلت هالغرفه واحصّل جهاز طوله حوالي 12 قدم والناس تدخّل حاجه مربعه وتطلع هالحاجه المربعه ومعها دراهم وورقه صغيره <--- هنا يقصد الثور (الايصال) ..! وانا مغير اعاين في الداخل والطالع ولا باليد حيله اصلاً مدري وش هالشي المربع اللي يدخلونه ويطلعونه يوم جات الساعه 3 الظهر .. وبالتحديد يوم بدأ سعد الشبل يقدم نشرة الأخبار .. خفّوا الناس على هالمربع اللي انا للحين مدري وشو ..! جيت انا وجلست اجمّع الاوراق اللي طايحه جنب الصرافه (الايصالات) <--- سبحان مغيّر الاحوال .. قبل اشوي يجمّع حبات السمسم اللي على زوليتهم وياكلها والحين صار يجمّع أوراق الإيصال المهم وطبّقتها زين وخليتها كبر المربع اللي قبل اشوي يدخلونه في الجهاز (البطاقه) وحاولت ادخّل الاوراق بس ماش .. الجهاز معيي لا يقبلها وللأسف جلست آكل في هالاوراق من حر مونس ---> (من الحراره التي احس بها) اشوي خطرت في بالي فكره .. حسيت وقتها اني عبقري .. بل وحسيت ان الصين واليابان مايشفّطون شي معي ..! قلت ليش ياوجه العنز ما تفتح هالجهاز وتاخذ الفلوس اللي فيه ..؟ حطيت يدي في جيبي واطلّع مفك (14-16) وحاولت افكفك في هالماخوذ من الخلف .. بس ماش مالقيت محل احط الخابور فيه وافتحها اقصد مالقيت مسامير عشان احط المفك وافتحها قمت لا شعوريا اهبّد في هالجهاز رب انه ينفك وآخذ القريشات مادريت الا والجهاز قام يصيح ويعطي الوان احمر وابيض وازرق .. كأنه إسعاف مع حاله طارئه وعلى رأسه الطير وانا أطلق سيقاني للريح متوجهاً إلى مدري وين .. بس ابي الفكه من هالمصيبه اللي طحت فيها حسيت وقتها إني حمار .. وأن أغبي بنقالي اصرف مني بسته وستين مره رحت البيت وانا اندب حالي .. ورجعت لإلتهام ما تبقى من السمسم المتساقط على زوليتنا ..! وعند النوم .. تذكرت شكل الفلوس وهي تطلع من الصرافه .. احس مو جايني نوم .. يعني هالناس احسن مني اللي تدخل وجيبها فاضي وتطلع وجيبها مليان ؟ قلت لازم بكره اروح للصرافه وانهب (اي: أسرق) لي من هالقريشات ويوم جاء بكره رحت يم الصرافه .. وفي الطريق جاتني فكره غريبه على جحش مثلي ..! وقالت لي نفسي: الحين اكيد الصرافه اللي امس صورتك بالكاميرا .. واكيد اليوم بتكون مراقبه .. ورا ما تدور لك صرافه غيرها ..؟ وقتها حسيت اني ذكي .. ورجع لي الاحساس اللي قبل اشوي وهو ان الصين واليابان ما يشفطون معي شي ..! واروح ادور لي غرفه ثانيه تدخل فيها الناس وتطلع ومعها قريشات وبعد مشوار حافل بتقليب براميل القمامه والتهام ما تبقى من بقايا الناس لقيت لي غرفه مثل الغرفه اللي لقيتها امس .. تدخلها الناس وتطلع وهي مبسوطه والجيب مليان بس المشكله اني يوم قربت من الجهاز وشفت الناس تحط هالبطاقه وتطلع لها الفلوس ماكان يطلع مع الفلوس ورقه (الايصال) فحسيت وقتها ان الجهاز مو مزبوط ويمكن مايكون فيه فلوس <--- مو قلت لكم اني ذكي ..؟ ياناس شكل هالايصال عاجبني .. ينعن ام التطور اللي عندهم .. اجل جهاز مايتكلم ولا ياكل سمسم .. يقطّع الاوراق من نفسه ..؟ بدون مسطره ولا مقص ..؟ ماعلينا نجي للاهم .. رحت دورت على غرفه ثانيه .. لين طحت لي على غرفه لها بابين وفيها جهازين .. قلت مالي الا اني اسرق واحد من هالناس اللي تصرف من الصرافه المشكله ان كل واحد يجي يصرف عيونه مترين يمين وثلاث امتار يسار مع ان الغرفه ما تجي متر × متر بس مدري وش السالفه الين جاتني الفرصه المناسبه .. واحصل هالشايب اللي لو تقول له السلام عليكم .. يقول لك : وشو اشتريت صابون ..؟ قلت هذه فرصتك ايها المجرم العربيد السكير المنحط الدويشر قام الشايب وحط البطاقه في الصراف اشوي يوم طلعت الفلوس والميه تبرق كأنها ثغر زعيم التنسيم المتبسم وانا اتلّها من يد الشايب .. وجلست اسابق الزمن متوجهاً نحو زوليتي العزيزه واول شي سويته .. شريت لي كيلوين سمسم .. ونثرتها على الزوليه وقمت امارس هوايتي المحببه بعد يومين خلصت الفلوس ورجعت حليمه لعادتها القديمه <--- حليمه بولند .. لا تصدقين وتاخذين مقلب تحسبيني اناديك .. مغير المثل يقول كذا قلت مالي الا ارجع لصرافه ثانيه واشوف لي شايب والا حرمه واتل فلوسها مثل ما تل نور الشريف البالطو من سمير غانم في فلمهم الشهير يلا بنا نحب ..! واليوم الثاني جلست اجوب ارجاء القريه .. بحثاً عن صرافه حتى طاحت عيني الممتلئه بالغمص على صرافه تقع في زاويه صغيره وشكلها مخيف .. ولكن الحاجه لا تعرف الخوف وجلست انتظر شايب والا حرمه تدخل .. لين دخل شايب لا يقل عمره عن الشايب اللي قبل كم يوم .. ويوم طلعت فلوسه وانا اتلها تلةً اقوى من السابقه .. واشتريت سمسم .. وباقي الفلوس مدري وين راحت وعادت الطفره وعاد د/ ابليس يراودني عن نفسي مابقى الا يفصخني ورجعت اليوم التالي لصرافه جديده .. بحثاً عن ضحيه جديده وبعد ربع ساعه دخلت حرمه وسحبت فلوسها .. يوم طلعت الفلوس وانا اسحبها وانحاش .. مادريت الا اللي ماسكني مع رقبتي .. وانا اللي تجمّدت اعضائي ماكنه الا جاثوم يوم طالعت الا العسكري اللي لازمني واخذني للدوريه .. قام وقال لي اسمع وانا اخوك : اذا سويت ذنب دايم .. وربي ستر عليك المره الاولى والمره الثانيه .. ترى ربي ماراح يسترك على طول .. بيجي يوم وبتنفضح الله سبحانه وتعالى ما سترك الا يبيك تراجع نفسك وتتوب .. واذا ماراجعت نفسك وتبت راح يفضحك الله .. وهالشي اللي حصل معك .. وللمعلوميه انا مراقبك من اول يوم سرقة فيه .. بس ماقدرت امسكك لانك كنت سريع وانا ماكنت قريب منك .. واليوم الثاني حاولت بس ماقدرت .. لكن اليوم الثالث الله مكّني منك هات فلوس هالحرمه ورح وانا اخوك ولا عاد تتعودها لانك هالمره طحت في واحد ابن حلال مايستفاد من الدرس: 1- الامتناع عن اكل السمسم المتناثر على جنبات الزوليه لانه غير كويس 2- الابتعاد عن نغزات الشيطان واذا نغزك تعوّذ منه مو تقوم تدق النجر مثل البليه اللي فوق 3- ان المال الحرام يذهب حيث أتى .. وشوفوا الناس اللي تاكل الحرام هل فلوسها فيها بركه او لا ملاحظه* ليش ما نحاول ننصح الناس بطريقه محششه دام هالشي بيدينا وداعة الله |
|
|
|
| أدوات الموضوع | |
| انواع عرض الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| المساجد النبوية( التي صلى فيها النبي صلى الله عليه وسلم) | القلب الشجاع | منتدى المدينة المنورة | 8 | 25 Apr 2008 05:23 PM |
| خبر مؤسف ... ليتني مافتحت الرساله | جداوي كووول444 | المنتدى العام | 21 | 04 Apr 2008 03:59 AM |
| دباب جاي من المستقبل | الطائر المهاجر | منتدى عالم السيارات و الدراجات النارية | 12 | 23 Feb 2008 12:06 PM |
| الكلمه التي لاتتحرك فيها الشفاه $$$$$$ | صعب توصلني | المنتدى الإسلامي | 4 | 29 Jan 2008 12:47 PM |
| ::..الجملة التي لا تتحرك فيها الشفاه..:: | دموع الشوق | المنتدى الإسلامي | 4 | 06 Nov 2007 11:51 PM |
العرض العادي
